Read Mandeali याकूब 5 Bible Online

याकूब 5 - Mandeali bible

याकूब 5

¹हे अमीर लोको सुणी लेया; तुस्से आपणे आऊणें वाले दुःखा पर चिंगी -चिंगी किन्हें रोआ।

²तुस्सा री जायदाद बर्बाद हुई जाणी होर तुस्सा रे कपड़े जो दीमक खाई गई।

³तुस्सा रे सोने होर चांदी रे रंग उडी गईरे; होर से उडीरा रंग तुस्सा रे बरखलाफ गुआही देणी; होर जिहां आग सभ कुछ भस्म करी देहां ईं, तिहां ईं परमेसरा तुस्सा जो सख्त सजा देणी। तुस्से जे आखरी टैमा मन्झ जायदाद कठी कितिरी जेबे जे परमेसर न्याय करणे वाल़ा आ।

⁴देखा, जिन्हें मजदूरे तुस्सा रे डोहर्रिया मन्झ काम कितेया, तुस्से तिन्हारी मजदूरी धोखे किन्हें रोकी रखिरी; सेई मजदूर चिंगी किन्हें पुकारेया करहा, होर खेता मन्झ काम करणे वाले री पुकार सर्वसक्तिमान परमेसरा रे काना तक पूजी गईरी।

⁵धरती पर तुस्सा री जिन्दगी बौह्त मजे वाली रही होर बौह्त सुख भोगेया, एह्ड़ा करी किन्हें तुस्से आपणे आपा जो तेस डांगरे साहीं पाली पोसी किन्हें मोटा तगड़ा करी लईरा जेहड़ा नी जाणदा कि से काटी देणा।

⁶तुस्से धर्मी लोका जो दोसी बणाई किन्हें मारी दितेया; जेह्ड़ा तुस्सा रा सामना नी करी सकदा।

⁷इधी कठे हे भाईयो होर बैहणो, प्रभु रे आऊणें तक सबर रखा, जिहां किसान भी कीमती फसला रे कठे इंतजार करदा रैंहयां, एता रे कठे से सुर्हूआती बरखा ले लई किन्हें बादा री बरखा तक लगातार सबर रखी किन्हें इंतजार करदा रैंहयां।

⁸इंहां ही तुस्से भी सबर रखा, होर आपणे दिला जो मजबूत करा, क्यूंकि प्रभु रा आऊंणा नेडे आ।

⁹हे भाईयो होर बैहणो, एक दूजे रे बारे मन्झ सिकायत मत करहा, नी ता परमेसरा तुस्सा रा न्याय करणा, होर न्याय करणे वाल़ा दुराजे वाले आई किन्हें खड़ी गईरा।

¹⁰हे भाईयो होर बैहणो, दुःख उठाणे होर सबर रखणे रे कठे नबिया जो उदाहरण समझा, जिन्हें प्रभु रे नांऊँआं ले गल्ला किती।

¹¹आस्से सबर रखणे वाल़ेया लोका जो धन्य बोल्हा ऐं; तुस्से अय्यूब नांऊँआं रे माह्णुं रे सबरा रे बारे मन्झ सुणेया, होर ये भी कियां प्रभुए तेस जो तेसरे सबरा रा इनाम दितेया। होर तुस्से जाणांहे की प्रभुए ये इधी कठे कितेया, क्यूंकि प्रभु दयालु होर करुणामय आ।

¹²पर हे भाईयो होर बैहणो, सभी ले खरी गल ता येई कि, कसम देख्या खांदे, ना ता स्वर्गा री, ना ता धरती री, ना केसी होरी चीजा री, पर तुस्सा री गल “हां री हां,” होर “ना री ना” हो, ताकि परमेसर तुस्सा जो सजा नी दे।

¹³अगर तुस्सा मन्झ कोई दुःखी हो, ता से प्रार्थना करहे; अगर खुस हो, ता से बड़ाई रे गाणे गाए।

¹⁴अगर तुस्सा मन्झ कोई ब्मार हो, ता कलीसिया रे अगुवे जो सादे होर स्यों प्रभु रे नांऊँआं ले तेल मली किन्हें तेसरे कठे प्रार्थना करहे।

¹⁵होर विस्वासा री प्रार्थना किन्हें तेस रोगिया बची जाणा होर प्रभुआ से ठीक करी देणा; होर अगर तिन्हें पाप भी कितिरे हो, ता परमेसरा स्यों माफ करी देणे।

¹⁶इधी कठे तुस्से आपु मन्झ एक दूजे रे साम्हणें आपणे-आपणे पाप मनी लऊआ, होर एक दूजे रे कठे प्रार्थना करा; ताकि तुस्से ठीक हुई जाओ, धर्मी माह्णुंआं री प्रार्थना ले बौह्त कुछ हुई सक्हा।

¹⁷एलिय्याह नबी भी ता आस्सा साहीं दुःख सुख भोगी माह्णुं था; होर तिन्हें मन लगाई किन्हें प्रार्थना किती कि, बरखा नी पये; होर साढे तीन साला तक जमीना पर बरखा नी पये।

¹⁸फेरी तिन्हें प्रार्थना किती, होर आसमाना ले बरखा हुई, होर जमीना मन्झ नाज हुआ।

¹⁹हे भाईयो होर बैहणो, अगर तुस्सा मन्झ कोई सच्चाई रे पैंडे ले भटकी जाए, होर कोई तेस भटकीरे माह्णुं जो वापस लई आये,

²⁰ता से ये जाणी ले कि जो कोई केसी भटकीरे पापी जो वापस लई आहुंघा, परमेसरा तेस भटकीरे माह्णुं रे कई पाप माफ करी देणे, होर तेस जो हमेसा री मौता ले बचाई लेहां।