Read Mandeali 1 पतरस 2 Bible Online

1 पतरस 2 - Mandeali bible

1 पतरस 2

¹इधी कठे सभ किस्मा रे बैर-भाव दूर करहा। दूजेया जो धोखा नी देआ, होर पाखंड मत बणा; होर दूजेया किन्हें हिर्ख नी रखा, होर बदनामी नी करहा।

²जिहां नंऊँऐं जम्मिरे बच्चे माऊआ रे दुधा री इच्छा रखे, तुस्से भी परमेसरा रे बचना जो सीखणे री इच्छा रखा, ताकि आत्मिक रूपा ले स्याणे बणी सको। होर तेबे आखरी मन्झ परमेसरा तुस्से एस संसारा री बुरी गल्ला ले पूरी तरहा बचाई लेणे।

³क्यूंकि जिहां पवित्र सास्त्रा मन्झ लिखिरा कि, “तुस्से चखी लितिरा की प्रभु भला।”[3]

⁴तुस्से यीसू मसीह रे वाले आईरे, जो जिउंदा पात्थर आ। तेस जो संसारा रे माह्णुंऐ बेकार समझी किन्हें काढी दितेया, पर परमेसरे तेस जो कोणे रा पात्थर करी किन्हें चुणी लितेया, क्यूंकि से तेसरी नजरा मन्झ कीमती आ।

⁵होर तुस्से सभ विस्वासी भाई बैहण भी जो एक जिउंदे पात्थरा साहीं ऐं। परमेसर एकजुट हूंणे रे कठे जोड़ी करहा, जेस मन्झ परमेसरा री आत्मा वास करही, ताकि तुस्से भी तेस कामा री वजहा ले जो यीसू मसीहे आस्सा रे कठे कितिरा, याजका साहीं एह्ड़ा बलिदान चढ़ाऊआ जो परमेसरा जो ग्रहण करणे रे लायक हो,

⁶ये तेह्ड़ा ही आ जेहड़ा पवित्र सास्त्रा मन्झ भी लिखिरा कि परमेसर बोल्हा, “हांऊँ सिय्योन सैहरा मन्झ एक कोणे रा पात्थर रख्या करहा, जो कीमती आ होर चुणिरा आ, एता पर जो विस्वास करघा तेस कधी भी सर्मिन्दा नी हूंणां।”[4]

⁷इधी कठे तुस्से जे मसीह यीसू पर विस्वास करहे ये विस्वासी लोका रे कठे कीमती पात्थर आ। पर विस्वास नी करणे वाले लोका रे कठे पवित्र सास्त्रा मन्झ लिखिरा कि, “से पात्थर जेस जो राज मिस्त्रिये बेकार जाणेया था सेई पात्थर कोणे रा पात्थर बणी गया।”

⁸होर फेरी पवित्र सास्त्रा मन्झ ये भी लिखिरा कि, “से एह्ड़ा पात्थर आ, जेता ले लोका जो ठेस लगी, होर एह्ड़ी चट्टान ई की जेता ले स्यों ठोकर खाएं,” क्यूंकि स्यों लोक परमेसरा रे बचना जो नी मनणे रे कठे ठोकर खाहें, होर परमेसरे ये नियुक्त कितिरा था कि तिन्हा किन्हें एह्ड़ा ही हूंणा।[5]

⁹पर तुस्से एह्ड़े लोक नी ऐं, तुस्से परमेसरा रे चुणिरे लोक ऐं। होर परमेसरा रे याजक लोक, जो राजे होर पवित्र लोक, होर परमेसरा रे आपणे लोक ऐे, तिन्हें तुस्से नहयारे मन्झा ले आपणी नौखे प्रयासे मन्झ सादी लईरे ताकि तुस्से परमेसरा रे नौखे कामा रा प्रचार करी सको।[6]

¹⁰तुस्से पैहले परमेसरा रे लोक नी थे, पर ऐबे तुस्से परमेसरा रे लोक ऐं, पैहले तुस्सा पर अनुग्रह नी हुईरा था, पर ऐबे परमेसरे तुस्सा पर दया कितिरी।

¹¹हे लाडले भाईयो होर बैहणो, हांऊँ तुस्सा ले अर्ज करहा कि, तुस्से आपणे आपा जो एस संसारा मन्झ परदेसी होर यात्री जाणी किन्हें हर एक सरीरा री पापा री इच्छा ले दूर रैहया, क्यूंकि स्यों हमेसा तुस्सा रे खलाफ युद्ध करहा ई।[7]

¹²तुस्सा रे ओरे परे रैहणे वाले लोक जो परमेसरा पर विस्वास नी करदे बोली सके कि तुस्सा रे काम बुरे। एह्ड़ी खरी जिन्दगी जीया ताकि स्यों तुस्सा रे भले कामा जो देखी किन्हें मसीह रे दबारा वापस आऊणें रे ध्याड़े परमेसरा जो महिमा दे।[8]

¹³प्रभु जो इज्जत देणे रे कठे, माह्णुंआं रे ज्रीए तय कितिरे हर एक अधिकारिया रे अधीन रैहया, क्यूंकि ये ही प्रभु री इच्छा ई, राजे रे अधीन रैहया क्यूंकि से सभी पर राज करहा।

¹⁴होर हाकमा रे अधीन रैहया, जेस जो राजे नियुक्त कितिरा, क्यूंकि स्यों गलत काम करणे वाले जो सजा देणे होर सही काम करणे वाले री बढ़ाई रे कठे भेजिरे।

¹⁵क्यूंकि परमेसरा री इच्छा येई कि, आस्सा रे खरे कामा जो देखी किन्हें आस्सा रे बरखलाफ दोस लगाणे वाले, जो परमेसरा जो नी जाणदे तिन्हा नर्क्कले लोका रा मुंह बंद हुई जाये।

¹⁶होर तुस्से आपणे आपा जो अजाद समझा, क्यूंकि तुस्से पापा रे कैदा मन्झ नी ऐं, होर प्रभु यीसू मसीहे तुस्से पैहले ले ही अजाद करी दितिरे। पर आपणी एस्सा अजादी जो बुराई करणे रे कठे आड़ नी बणाऊआ। एता रे बजाय आपणे कामा ले एस्सा गल्ला जो जाहिर करहा की तुस्से सच्चे परमेसरा रे गुलाम ऐे।

¹⁷सभिरा आदर करा, सारे विस्वासी भाई बैहणा किन्हें प्यार रखा, परमेसरा ले डरा, राजे री इज्जत करा।

¹⁸हे सेऊआदारो, अगर तुस्से विस्वासी हो होर दूजे रे घरा काम करहे ता आपणे माल्का री गल्ला जो मन्हा होर हमेसा तिन्हारी इज्जत करहा। ना सिर्फ भले होर नम्र दीन माल्का किन्हें पर निर्दयी माल्का किन्हें भी एह्ड़ा ही करहा।

¹⁹क्यूंकि अगर आस्से बिना गलती रे दुःख सहन करहे, होर आस्से एह्ड़ा ये सोची किन्हें करहे कि परमेसर सभ कुछ जाणहां तेबे परमेसर आस्सा ले खुस हुआ।

²⁰क्यूंकि अगर तुस्से गलती करी किन्हें मार भी खाध्ही ता तेता मन्झ बड़ाई करणे री कोई वजहा नी की तुस्से एस्सा सजा जो बड़े सबरा किन्हें सहन कितेया। पर अगर तुस्से खरे काम करी किन्हें दुःख सहन करहे, होर फेरी भी सबर रखे ता परमेसरा एता ले खुस हुआ।

²¹होर एक वजहा ये भी की परमेसरे तुस्से चुणिरे कि तुस्से मसीह रे कठे दुःख सहन करो। मसीहे भी तुस्सा रे कठे दुःख उठाया, होर एह्ड़ा करी किन्हें तिन्हें तुस्सा रे कठे एक उदाहरण छाडेया कि, तुस्से भी तेसरे पद चिन्हा पर चली सको।

²²पवित्र सास्त्रा मन्झ लिखिरा कि, “तिन्हें कोई पाप नी कितेया होर तिन्हें कधी भी झूठ नी बोल्या, एक बारी भी नी।”[9]

²³जेबे लोके यीसू जो गाली दिती तिन्हें बदले मन्झ कोई भी गाली नी दिती, होर जेबे लोके तेस जो दुःख दितेया ता तिन्हें केसी जो भी धमकी नी दिती। एता रे बजाय तिन्हें परमेसरा पर भरोसा रखेया कि से तेसरी मदद करहे, क्यूंकि से जाणहां था की परमेसर सभीरा न्याय सही करहा।[10]

²⁴जेबे यीसू मसीह मारी दितेया, ता क्रूसा प्रयाल्हे तेस जो आपणे सरीरा मन्झ आस्सा रे पापा री सजा मिली, ताकि आस्से पाप करणा छाडी दे, होर धार्मिकता री जिन्दगी जीणा सुर्हू करी दे। तेसरे मार खाणे ले तुस्से चंगे[11] हुए।[12]

²⁵क्यूंकि तुस्से पैहले तिन्हा भेडा साहीं थे, जो आपणे रस्ते ले भटकी गईरी थी। पर ऐबे तुस्से मसीह वाले वापस आई गईरे जो तुस्सा रा रखवाला होर पुहाल आ।[13]