Read Mandeali 1 पतरस 3 Bible Online

1 पतरस 3 - Mandeali bible

1 पतरस 3

¹हे लाड़ियो, तुस्से भी आपणे-आपणे लाड़े रे अधीन रैहया। इधी कठे कि अगर तिन्हा मन्झा ले कुछ परमेसरा पर विस्वास करणे वाले नी हो, ता तिन्हा तुस्सा रे कुछ बोले बगैर तुस्सा री जिन्दगी जो देखी किन्हें विस्वास करणा। जेबे तिन्हा देखणा कि किहाँ तुस्से परमेसरा री इज्जत करहे, होर पवित्र जिन्दगी जीए, तिन्हा मसीह पर विस्वास करणा।

³होर तुस्सा री सुन्दरता बाहर सूझणे वाली चीजा मन्झ नी हो, जिहां कि बाला रा स्वांग करणा, होर सोने रे गैहणे पैन्ह्णा, या मैहंगे-मैहंगे कपड़े पैन्ह्णा।

⁴बल्की तुस्सा री सुन्दरता एस गल्ला ले जाहिर हुईं कि तुस्सा रे दिला मन्झ क्या यानि नम्रता होर सांत मन जो की तुस्सा रे गैहणे ऐं, जेता री परमेसरा री नजरा मन्झ बडी कीमत ई।

⁵होर बौह्त पैहले जो ज्नानिया परमेसरा पर आस रखी थी होर जिन्हों भरोसा था कि तेस आपणे वादे पुरे करणे; स्यों ज्नानिया आपणे आपा जो एस तरहा ही सजाई थी। होर इधी कठे स्यों आपणे लाड़े रे अधीन भी रही थी।

⁶जिहां सारा भी अब्राहमा जो माल्का बोली किन्हें तेसरे अधीन रैंहयां थी। यानि अगर तुस्से दूजे री मदद करो होर एता मन्झ कोई डरा री गल नी हो तेबे तुस्सा सारा री मह्ठीया साहीं बणना।

⁷तिहां ईं हे लाड़ेयो, तुस्से भी आपणी-आपणी लाड़ीया साउगी बड़ी समझदारी किन्हें जिन्दगी बिताऊआ। याद रखा की स्यों तुस्सा ले कमजोर ईं, इधी कठे तिन्हारी इज्जत करा, क्यूंकि तुस्से दुहें तेस अनंत जिन्दगी रे दान रे साझीदार हो, जो परमेसरे बड़े अनुग्रहा किन्हें दितिरा। एह्ड़ा इधी कठे करहा की जेबे तुस्से दुहें प्रार्थना करहे ता परमेसर तुस्सा री सुणी ले।

⁸आखरी मन्झ हांऊँ तुस्सा किन्हें ये बोलणा चाहां कि सभ आपु मन्झ एकता रखा, एक दूजे रा ध्यान रखा, आपणे परिवारा समझी किन्हें एक दूजे किन्हें प्यार करहा, एक दूजे पर दया करहा, होर नम्र बणा।

⁹बुराई रे बदले बुराई मत करा; होर ना गाली रे बदले गाली देआ; पर आसरीवाद ई देआ; क्यूंकि परमेसरे तुस्से इधी कठे सादिरे ताकि तुस्से दूजेया जो आसीस दो, होर अगर तुस्से एह्ड़ा करहे ता परमेसरा भी तुस्सा जो आसीस देणी।

¹⁰क्यूंकि पवित्र सास्त्रा मन्झ लिखिरा, “जो कोई खरी जिन्दगी जीणे री इच्छा रख्हा, होर खरे ध्याड़े देखणा चाहां; से आपणी जीभा ले बुरी गल्ला नी करहे, होर एह्ड़ी गल्ला नी करहे जो सच्ची नी हो।

¹¹से बुराई करणा छाडी दे, होर भलाई ई करहे, होर एक दूजे किन्हें सांति किन्हें जिन्दगी जीणे री कोसिस करहे।

¹²क्यूंकि प्रभु री हाखिया धर्मी माह्णुंआं पर लगी रैंहयां ईं, होर तेसरे कान तिन्हारी प्रार्थना वखा जो लगी रैंहयां ऐं। पर प्रभु बुराई करणे वाले रे विरोध मन्झ रैंहयां।”[14]

¹³होर अगर तुस्से हमेसा खरा करणे री कोसिस करहे, ता कोई भी तुस्सा जो नुकसान नी पुजाई सकदा।

¹⁴होर अगर खरा करी किन्हें भी तुस्से दुःख सहन करहे ता परमेसरा तुस्सा जो आसीस देणी। तुस्से तिहां करहा जिहां यसायाह नबिये लिखिरा: “जो लोक तुस्सा जो धमकी दे तिन्हा ले नी डरा, होर नी घबराऊआ की लोका क्या करणा।”

¹⁵पर मसीह जो प्रभु जाणी किन्हें तेसरी इज्जत करहा, होर आपणे मना मन्झ तेसरा डर मन्हा। होर कोई तुस्सा ले तेस आसा रे बारे मन्झ कुछ पूछे, जो आस्से सभ विस्वासी लोक साझा करहे, ता तेस जो जवाब देणे रे कठे हमेसा त्यार रैहया। पर एह्ड़ा नम्रता होर आदर भाव किन्हें करहा,

¹⁶ताकि तुस्सा री अंतरात्मा तुस्सा जो दोस नी लगाए। जेबे लोका देखणा कि तुस्से सही काम करहे, क्यूंकि तुस्से मसीह रे लोक ऐे; तेबे तिन्हा तुस्सा रे बरखलाफ बुरी गल्ला बोलणे री वजहा ले सर्मिन्दा हूंणा।

¹⁷क्यूंकि अगर परमेसरा री इच्छा आस्सा रे कठे येई, ता खरी गल येई कि आस्से भले काम करणे री वजहा ले दुःख सहन करहे, ना की बुरे काम करी करणे री वजहा ले।

¹⁸हांऊँ एह्ड़ा इधी कठे बोल्हा क्यूंकि मसीह सिर्फ एक ही बारी आस्सा रे पापा रे कठे दुःख सहन करी किन्हें मारी दितेया। से एक धर्मी माह्णुं था जो आस्सा अधर्मिया रे कठे मरी गया, ताकि से आस्सा जो परमेसरा रे नेडे ल्याई सके; तिन्हें तेसरा सरीर खत्म करी दितेया पर तेसरी आत्मा जिउंदी।

¹⁹फेरी तेसरी आत्मे जाई किन्हें तिन्हा दूजी आत्मा जो खुसी री खबर सुणाई, जिन्हों परमेसरे तेस जगहा मन्झ कैद करी रखिरा, जेथी मरिरे लोका री आत्मा ई।

²⁰ये तिन्हा लोका री आत्मा जिन्हें बौह्त टैम पेहले परमेसरा रे हुक्मा जो नी मन्नेया था, जेबे नूह जहाज बणाया करहा था परमेसरे सबर करी किन्हें रुकी रैंहयां कि, लोक पाप करणा छाडी दे, पर जेबे जल प्रलया मन्झ सभ लोक डूबी किन्हें मरी गये ता सिर्फ आठ ही लोक बचे जो जहाजा पर कोहे।

²¹पुराणे टैम मन्झ तिन्हारा पाणी ले बची जाणा ऐबे रे उद्धारा रा एक उदाहरण आ, जो आस्सो बपतिस्मा लेणे पर मिला। जेस पाणी मन्झ आस्से बपतिस्मा ले से आस्सा रे सरीरा रा मैल दूर नी करदा, पर ये एक नसाणी की आस्से आपणी सुद्ध अंतरात्मा ले परमेसरा ले माफी मांगी लेईरी। आस्सो माफी मिली सकी क्यूंकि यीसू मसीह मरिरे मन्झ ले दबारा जिउंदा हुईरा,

²²होर से स्वर्गा मन्झ चली गईरा। ऐबे से तेथी परमेसरा रे सीधी वखा जो आ, जो सभी ले खास जगहा ई; होर से सभ स्वर्गदूत होर अधिकारी होर सामर्था गास राज करहा।[15]