Read Mandeali 2 पतरस 1 Bible Online

2 पतरस 1 - Mandeali bible

2 पतरस 1

¹हांऊँ समौन पतरस तुस्सा रे कठे ये चिठ्ठी लिखी करहा। हांऊँ यीसू मसीह रा सेऊआदार होर चुणिरा चेला आ। हांऊँ ये चिठ्ठी तुस्सा सभी रे कठे लिखी करहा, जो आस्सा साहीं तेस कीमती विस्वास रा साझा करहे, जो आस्सा जो आस्सा रे परमेसर होर उद्धारकर्ता यीसू मसीहे दितिरा। से आस्सो परमेसरा री नजरा मन्झ धर्मी बणा।

²हांऊँ प्रार्थना करहा कि जिहां तुस्से आस्सा रे परमेसर होर प्रभु यीसू मसीह रे बारे मन्झ आपणे ज्ञाना मन्झ बढ़दे जाहें, परमेसर तुस्सा जो होर भी ज्यादा अनुग्रह होर सांति देंदा रहे।

³परमेसरे आपणी सामर्था रे ज्रीए आस्सा जो से सब कुछ देई दितिरा, जेसरे ज्रीए आस्से सच्ची भक्ति री जिन्दगी जी सका ऐं। ये इधी कठे हुईरा की क्यूंकि आस्से परमेसरा जो जाणहां ऐं, होर तिन्हें ही आस्से आपणी खराई होर महिमा री वजहा ले आपणे लोक हूंणे रे कठे सादीरे।

⁴होर तेसरी खराई होर महिमा री वजहा ले तिन्हें आस्सा किन्हें महान होर कीमती वादे कितिरे। इन्हा वादे रे ज्रीए आस्से एस संसारा मन्झ जो बुरी इच्छा ई तेता ले बची सके, जो लोका रा नास करही। होर आस्से परमेसरा रे आपणे स्वभाव मन्झ साझी हुई जाये।

⁵होर एस वजहा ले कि तुस्से परमेसरा रे स्वभाव रे साझी बणे, तुस्से सभ तरहा रा जतन करहा कि मसीह पर विस्वास ही नी पर सद्गुण वाली जिन्दगी भी जी सको। होर सद्गुण वाली जिन्दगी ही नी पर ये भी जाणा की कियां समझदारी किन्हें काम करणा।

⁶होर समझदारी किन्हें काम करणा ही नी पर आपणे हर एक कामा मन्झ धीरज रखा, होर हर कामा मन्झ धीरजा ही नी पर दुखा मन्झ सबर भी रखा; होर दुखा मन्झ सबर रखणा ही नी पर सच्ची भक्ति री जिन्दगी भी जिया।

⁷होर सच्ची भक्ति री जिन्दगी जीणा ही नी पर आपणे परिवारा साहीं दूजे विस्वासी भाई बैहणा किन्हें प्यार भी करहा।

⁸क्यूंकि अगर ये गुण तुस्सा मन्झ ऐं, होर ये गुण तुस्सा मन्झ बढ़दे ही जाऐ ता तुस्से आस्सा रे प्रभु यीसू मसीह रे बारे मन्झ एस तरीके किन्हें जाणना, जेता ले तुस्सा री जिन्दगी बेकार होर निकम्मी नी हूणी।

⁹होर जेस माह्णुं मन्झ ये गुण नी हाए, से धुंधला देख्हा या ता काणा। होर से भूली बैठीरा कि परमेसरे से तेसरे पैह्ल्के पापा ले धोई किन्हें पवित्र कितिरा।

¹⁰इधी कठे हे भाईयो होर बैहणो, हर से काम करणे री पूरी कोसिस करहा, जेता ले तुस्से आपणे आपा जो होर दूजे लोका जो जाहिर करी सको कि परमेसरे पक्का तुस्से चुणिरे; होर आपणे लोक हूंणे रे कठे सादीरे। क्यूंकि अगर एह्ड़ा करघे, ता तुस्सा कधी भी पापा मन्झ नी पऊणा।

¹¹ठीक एस तरहा परमेसरा बड़े आदर साउगी अनंत राजा मन्झ दाखल करणा, जेथी आस्सा रा प्रभु होर उद्धारकर्ता प्रभु यीसू मसीहा जुग-जुग रे कठे राज करणा।

¹²हालांकि तुस्से इन्हा सच्ची गल्ला जो पैहले ले जाणहां ऐं, जो मसीह रे बारे मन्झ लोके तुस्सा जो सखाईरी थी; होर तुस्से तेस मन्झ मजबूत बणी रैंहयां ऐं, तेबे भी मां तुस्सा जो इन्हा गल्ला रे बारे मन्झ याद कुरांदे रैहणा।

¹³आस्सा रे प्रभु यीसू मसीहे मुंजो ये गल दसीरी कि मेरे मरणे रा टैम जल्दी आऊणें वाल़ा आ। इधी कठे हांऊँ सोच्हा कि मेरे कठे ये ठीक आ कि, मेरे ऐबे जिउंदे रैहन्दे ही इन्हा गल्ला रे बारे मन्झ तुस्सा जो याद कुरांदा ही रहूँ।

¹⁵हांऊँ इधी कठे इन्हा गल्ला जो लिखणे री कोसिस करी करहा कि मेरे मरणे ले बाद तुस्से इन्हा सभ गल्ला जो हमेसा याद करी सको।

¹⁶जेबे आस्से चुणिरे चेले तुस्सा जो प्रभु यीसू मसीह रे दबारा वापस आऊंणा होर तेसरी सामर्था रे बारे मन्झ दसेया था, ता आस्से चुतुराई किन्हें मन घड़न्त कहाणीया नी सुणाई री थी। बल्की आस्से आपणी हाखिया ले तेसरी महानता देखी थी।

¹⁷आस्से तेस किन्हें पवित्र पहाड़ा पर थे जेबे परमेसर बापूए तेस जो आदर होर महिमा दिती, तेस परमेसरा री वखा ले यानि तेस बड़ी महिमा ले तेसरे कठे ये अवाज आई कि, “ये मेरा लाडला मह्ठा आ, जेस ले हांऊँ बौह्त खुस आ!” आस्से आपु स्वर्गा ले ये अवाज आऊंदे सुणीरी।

¹⁹आस्से ये भी जाणहां ऐं की नबिया रे ज्रीए मसीह रे बारे मन्झ लिखिरे बचन बिलकुल सच्चे। होर एता पर ध्यान देणे ले तुस्सा रा फायदा आ, क्यूंकि ये बचन भ्याग हूंणे तक नह्यारे मन्झ चम्कणे वाले दिऊये साहीं ऐं, होर जेबे तक मसीह री ज्योति तुस्सा रे दिला मन्झ नी चमकदी, एस्सा तुस्सा जो प्रयासा देंदे रेहणा जिहां भ्यागा रा तारा पुरे संसारा जो ज्योति देआ।

²⁰पर ये जरूरी ई कि पैहले ये जाणी लऊआ कि नबिया री गल्ला जो तुस्से पवित्र सास्त्रा मन्झ पढ़े, स्यों नबिया रे आपणे विचार नी हुंदे।

²¹क्यूंकि कोई भी भविस्यवाणी माह्णुं री इच्छा ले नी लिखीरी, पर पवित्र आत्मे लोका रे विचार जो काबू करी किन्हे तिन्हा ले स्यों गल्ला लिखाई, जो परमेसरा तिन्हा ले लिखाणा चाहां था।