Read Mandeali 2 पतरस 3 Bible Online

2 पतरस 3 - Mandeali bible

2 पतरस 3

¹हे लाडले भाईयो होर बैहणो, ऐबे हांऊँ तुस्सा जो ये दूजी चिठ्ठी लिख्हा। होर इन्हा दुहीं चिठिया रे ज्रीए मैं तुस्सा जो तिन्हा गल्ला जो याद कुराई किन्हें जिन्हों तुस्से पैहले जाणांहे, तुस्सा रे मना मन्झ साफ विचार पैदा करणा चाहां।

²हांऊँ एह्ड़ा इधी कठे करहा क्यूंकि, बौह्त पैहले नबिया रे ज्रीए बोली गईरी गल्ला जो होर आस्सा रे उद्धारकर्ता प्रभु यीसू मसीह री सखाईरी गल्ला जो हांऊँ तुस्सा जो याद कुराणा चाहां, जेस जो चुणिरे चेले तुस्सा जो किन्हें सखाईरा था।

³सभी ले पैहले ये जाणी लो कि, आखरी ध्याड़े मन्झ मसीह रे दबारा वापस आऊणें ले पैहले एह्ड़े लोक हूंणे, जिन्हा तुस्सा रा मजाक डूआणा, क्यूंकि तुस्से ये विस्वास करहे की मसीहा वापस आऊंणा। एह्ड़े लोक आपणी बुरी इच्छा रे मताबक आपणी जिन्दगी जीये।

⁴तिन्हा बैहस करी किन्हें बोलणा कि, “यीसू प्रभुए वापस आऊणें रा वादा कितिरा था, पर हल्ली तक से नी आया। जो पैहले आस्सा रे अगुवे थे स्यों ता मरी गये, कुछ नी बधल्या। परमेसरा रे संसारा जो रचणे ले टैमा ले ही सभ कुछ तेह्ड़ा ही चलदा आईरा।”

⁵तिन्हा एह्ड़ा बोल्णा, क्यूंकि बौह्त पैहले परमेसरे आपणे हुकमा ले धरती होर आसमान बणाईरा था। होर तिन्हें आपणे सब्दा ले धरती जो पाणी ले लग कितेया, होर पाणी रे ज्रीए ही सुकिरी जमीना जो बाहर लेई आया।

⁶होर एस पाणी ले तेस टैमा रे संसारा जो नास कितेया। तिन्हें बड़ी भारी बरखा भेजी, जेता ले धरती मन्झ बाढ़ आई होर सारे प्राणी नास हुई गये।

⁷पर तेस ही हुकमा ले परमेसरे आज का आसमान होर धरती रखिरी ताकि तेता जो आगी किन्हें भस्म करहे। ये तिन्हें तेस ध्याड़े रे कठे बचाई रखीरा, जेस ध्याड़े तेस हुकमा जो नी मन्नणे वाले रा न्याय करी किन्हें तिन्हारा नास करणा।

⁸हे लाडले भाईयो होर बैहणो, ये गल जो हांऊँ तुस्सा किन्हें बोली करहा कि एस गल्ला जो कधी देखेया भुलदे कि, प्रभु री नजरा मन्झ एक ध्याड़ा हजार साला रे बराबर आ, होर हजार साल एक ध्याड़े रे बराबर। (तेसरे कठे एक ध्याड़ा होर एक हजार साल सभ एक बराबर ऐं)

⁹पर कुछ लोक सम्झ्हा ऐं कि, प्रभु आपणे दबारा वापस आऊणें के वादे जो पूरा करणे मन्झ देर करदा लगिरा, पर प्रभु एह्ड़ी देर नी करदा लगीरा। एता रे बजाय से तुस्सा रे बारे मन्झ सबर करी करहा, क्यूंकि से नी चाहन्दा कि से केसी जो भी तेसरे बरखलाप पाप करणे री वजहा ले नास करहे; बल्की ये चाहां कि सभीरा मन बदली जाये, पाप करणा छाडी दे, होर तेसरे वाले आये।[2]

¹⁰पर प्रभुआ जरुर वापस आऊंणा, जिहां एक चोर अचानक आं तिहां ही प्रभुआ भी आऊंणा। तेस ध्याड़े आसमाना मन्झ गड़गड़ाहटा री अवाज हूणीं होर तेस लुप्त हुई जाणा। होर जो कुछ आसमाना मन्झ आ यानि सूरज, चांद होर तारे आगा किन्हें पूरी तरहा नास हुई जाणे। होर तेस ध्याड़े परमेसरा लोका रा न्याय करणे रे कठे जो कुछ तिन्हें धरती पर कितिरा जाहिर करणा।

¹¹जेबे कि परमेसरा एस तरीके किन्हें इन्हा सभी चीजा रा नास करणा; ता तुस्सा जो पवित्र होर सच्ची भक्ति री जिन्दगी जीणी चहिए।

¹²होर जेबे तुस्से तेस ध्याड़े रा इंतजार करहे जेबे परमेसरा एस संसारा रा न्याय करदे आऊंणा, ता तेसरे ध्याड़े जो जल्दी लेई आऊणें रे कठे कोसिस करहा। तेस ध्याड़े, आगिया आसमान फुखी किन्हें नास करी देणा, होर आसमाना मन्झ जेह्ड़ी भी चीजा, सूरज, चांद, तारे सभीया तपी किन्हें गली जाणा।

¹³पर आस्से विस्वासी लोक परमेसरा रे कितिरे वादे रे मताबक एक नंऊँऐं आसमान होर नौंईं धरती रा इंतजार करेया करहा ऐ, जेथी परमेसरा री धार्मिकता वास करही।

¹⁴इधी कठे, हे लाडले भाईयो होर बैहणो, जेबे तुस्से तेस ध्याड़े रा इंतजार करहे जेबे परमेसरा संसारा रा न्याय करणा, ता पूरी कोसिस करा कि आपणे आपा जो बेदाग होर बेकसूर होर तेसरे साउगी सांति मन्झ रखी पाओ।

¹⁵होर आस्सा रे प्रभु रे सबरा जो एक एह्ड़ा मौका समझा, जेथी लोक पाप करना छाडी सके, फेरी परमेसर तिन्हारे उद्धार करी किन्हें तिन्हा ओ आऊणें वाले न्याय ले बचाई सक्हा। होर ये ही गल परमेसरा रे ज्रीए दितिरे ज्ञाना रे मताबक पौलुसे भी आपणी चिठ्ठी मन्झ तुस्सा रे कठे लिखी जो आस्सा रा लाडला विस्वासी भाई आ।

¹⁶से आपणी सभ चिठ्ठीया मन्झ जो तिन्हें सारे विस्वासी लोका रे कठे लिखी, तिन्हें स्यों ही गल्ला लिखी जो तुस्सा रे कठे भी लिखीरी। पर तेसरी चिठिया मन्झ कुछ गल्ला जो समझणा कठण आ। जो लोक कम पढ़ी लिखिरे होर आपणे विस्वासा मन्झ कमजोर ऐं, स्यों इन्हा कठण गल्ला रे मतलबा जो तोड़े मरोड़े, जिहां स्यों पवित्र सास्त्रा रे बाकि बचना रा मतलब भी तोड़ मरोड़ करहा ऐं, एह्ड़ा करी किन्हें स्यों आपु ही परमेसरा रे ज्रीए नास हूंणे री वजहा बणहां ऐं।

¹⁷हे लाडले भाईयो होर बैहणो, तुस्से लोक पैहले ले ई जाणहां ऐं कि युयां गल्ला हूणीं। इधी कठे चतन्न रैहया, परमेसरा री व्यवस्था जो नी मनणे वाले लोक तुस्सा जो झूठ बोली किन्हें नी भड़काए, एह्ड़ा करी किन्हें तुस्सा सच्ची गल्ला पर विस्वास करणा छाडी देणा, जिन्हा गल्ला पर तुस्से पैहले विस्वास कितिरा था।

¹⁸एता रे बजाय आस्सा रे प्रभु, होर उद्धारकर्ता यीसू मसीह रे अनुग्रहा जो होर ज्यादा ले ज्यादा मैहसूस करदे रैहया। होर तेसरे बारे मन्झ जो तुस्से समझ रखे तेता मन्झ बढ़दे जाऊआ। तेसरी बढ़ाई ऐबे, होर जुग-जुग हुन्दी रहे। आमीन।