Read Mandeali 1 यहून्ना 2 Bible Online

1 यहून्ना 2 - Mandeali bible

1 यहून्ना 2

¹हे मेरे बच्चेयो, हांऊँ तुस्सा जो ऐं गल्ला इधी कठे लिख्हा कि, तुस्से पाप नी करो; होर अगर कोई पाप करहा, ता आस्सा रे बापू परमेसरा वाले एक मददगार आ जो आस्सा रे पापा री माफी रे कठे अर्ज करहा होर से यीसू मसीह आ, होर से धर्मी आ।

²मसीह आस्सा रे कठे बलिदान हुआ ताकि तेसरे ज्रीए आस्सा रे पापा रा प्रायस्चित हो: होर सिर्फ आस्सा रा ई नी, पर सारे संसारा रे लोका रे पापा रा भी प्रायस्चित हो।

³अगर आस्से परमेसरा रे हुक्मा जो मन्नघे, ता एस गल्ला ले आस्सा जो पता लगा कि आस्से तेस जो जाणहां ऐं।

⁴जो कोई ये बोल्हा कि, “हांऊँ तेस जो जाणी गईरा,” होर तेसरे हुक्मा जो नी मन्नदा, ता से आदमी झूठा आ; होर तेस मन्झ परमेसरा री सच्चाई नी ई।

⁵पर जो कोई परमेसरा रे बचना जो मन्हां ऐं, तेस मन्झ सच्चे परमेसरा रे कठे प्यार सिद्ध हुई गईरा, आस्सा जो एता ले पता चल्हा आ कि, आस्से तेस मन्झ वास करहा ऐं।

⁶जो कोई ये बोल्हा कि, हांऊँ तेस मन्झ वास करहा, तेस जो चहिए कि से आपु भी तेह्ड़ा ई जीए जिहां यीसू जिया था।

⁷हे लाडले भाईयो होर बैहणो, हांऊँ तुस्सा जो कोई नंऊँआं हुक्म नी लिख्दा, पर सेई पुराणा हुक्म जो सुर्हू ले तुस्सा जो मिलीरा; ये पुराणा हुक्म से ही बचन आ, जेस जो तुस्से मसीही मन्झ विस्वास कितिरे टैमा सुणीरा था।

⁸फेरी हांऊँ तुस्सा जो नंऊँआं हुक्म लिख्हा; होर जेसरी सच्चाई मन्झ यीसू भी चलेया होर तुस्से भी एस सच्चाई मन्झ चलाए; क्यूंकि न्हयारा मिट्दा लगीरा होर सच्चाई रा प्रयासा चमक्दा रैंहयां।

⁹जो कोई ये बोल्हा कि, “हांऊँ प्रयासा मन्झ चलीरा,” पर आपणे विस्वासी भाई होर बैहणा किन्हें नफरत करहा, से हल्ली तक नह्यारे मन्झ चलीरा आ।

¹⁰जो कोई आपणे भाई होर बैहणा किन्हें प्यार करहा, से प्रयासे मन्झ चला आ, होर तेस मन्झ एह्ड़ी कोई गल नी हुणी की से केसी जो पाप कुराहें।

¹¹पर जो कोई आपणे भाई होर बैहणा किन्हें बैर रख्हा, से नह्यारे मन्झ आ, होर से नह्यारे मन्झ चल्हा; होर से नी जाणदा कि, केथी जाहाँ, क्यूंकि नह्यारे तेसरी हाखिया अंधी करी दितिरी।

¹²हे मेरे बच्चेयो, हांऊँ तुस्सा जो इधी कठे लिख्हा कि, यीसू मसीह रे नांऊँआं ले तुस्सा रे पाप माफ हुई गईरे।

¹³हे बडे बजुर्गो, हांऊँ तुस्सा जो इधी कठे लिख्या करहा कि, जो सुर्हू ले आ, तुस्से तेस जो जाणहां ऐं; हे जुआनो हांऊँ तुस्सा जो इधी कठे लिख्हा कि, तुस्से तेस दुस्ट सैताना पर जीत पाई लईरी; हे बच्चेयो, मैं तुस्सा जो इधी कठे लिखिरा कि, तुस्से बापू परमेसरा जो जाणी लईरा।

¹⁴हे बडे बजुर्गो, मैं तुस्सा जो इधी कठे लिखिरा कि, जो पुरे संसारा जो रचणे ले पैहले से था, तुस्से तेस जो जाणी लईरा, हे जुआनो, मैं तुस्सा जो इधी कठे लिख्हा कि, ताकतवर हो, होर परमेसरा रा बचन तुस्सा मन्झ वास करहा ऐं, होर तुस्से तेस दुस्ट सैताना पर जीत पाई लईरी।

¹⁵तुस्से ना ता संसारा ले होर ना संसारा मन्झा री चीजा ले प्यार रखा; अगर कोई संसारा किन्हें प्यार रख्हा, ता तेस मन्झ बापू परमेसर रा प्यार नी आ।

¹⁶क्यूंकि जो कुछ संसारा मन्झ आ, सरीरा ई इच्छा, होर हाखिया चाहत होर कमाई रा बडयाई, से बापू परमेसरा री तरफा ले नी आ, पर संसारा री वखा ले ही आ।

¹⁷होर संसार होर ऐसरी इच्छाएं दुहें मिट्दी जाहीं, पर जो परमेसरा री इच्छा पर जिहां, से हमेसा बणी रैंहयां।

¹⁸हे बच्चेयो, ये आखरी टैम आ जेबे मसीह वापस आऊंणा, होर जेह्ड़ा तुस्से सुणिरा कि, मसीह रा व्रोधी आऊणें वाल़ा आ, तेसरे मताबक ऐबे भी बौह्त सारे मसीह रे व्रोधी खड़े हुई गईरे; एता ले आस्से जाणहां ऐं कि, ये आखरी टैम आ।

¹⁹जो मसीह रे व्रोधी निकली रे स्यों आस्सा री कलीसिया मन्झा ले ई निकली रे, पर स्यों आस्सा रे आपणे नी थे, अगर स्यों आस्सा रे आपणे हुंदे ता स्यों आस्सा साउगी रैहन्दे, पर स्यों आस्सा जो छाडी किन्हें चली गये; जेस ले ये पता लगी जां कि तिन्हा मन्झ ले कोई भी आस्सा रा आपणा नी था।

²⁰पर मसीहे पवित्र आत्मा देई किन्हें तुस्सा रा अभिसेक कितिरा, इधी कठे तुस्से सच्चाईया जो जाणहां ऐं।

²¹मैं तुस्सा जो इधी कठे नी लिखिरा कि तुस्से सच्चाईया जो नी जाणहां ऐं, पर इधी कठे की तुस्से तेस जो जाणहां ऐं, होर कोई झूठ, सच्चाई री तरफा ले नी आ।

²²झूठा कुणहां? सिर्फ से, जो यीसू रे मसीह हूंणे रा इनकार करहा; होर मसीह रा व्रोधी सेई आ, जो बापू परमेसर होर मह्ठे रा इनकार करहा।

²³जो कोई मह्ठा रा इनकार करहा तेसरे वाले बापू परमेसर भी नी आ, जो मह्ठा जो मनी लैहां तेसरे वाले बापू परमेसर भी आ।

²⁴जो सच्चा संदेस तुस्से मसीह पर विस्वास करदे टैमा सुणीरा था तेस जो तुस्से आपणे दिला मन्झ रखा। होर जो तुस्से सुणेयां; अगर तुस्से तेस जो मनघे, ता तुस्सा भी मह्ठे होर बापू परमेसरा दुंहीं मन्झ वास करणा।

²⁵परमेसरे आस्सा जो अनंत जिन्दगी देणे रा वादा कितिरा।

²⁶हांऊँ ये गल्ला तिन्हा लोका रे बारे मन्झ लिख्या करहा, जो तुस्सा जो झूठी उपदेस देई किन्हें धोखा देणे री कोसिसा मन्झ लगी रहें।

²⁷पर मसीहे पवित्र आत्मा देई किन्हें तुस्सा रा अभिसेक कितिरा, होर तुस्सा मन्झ वास करहा; इधी कठे तुस्सा जो सच्चाई स्खाणे वाले केसी री ज्रूरत नी हाई। क्यूंकि जो कुछ तुस्सा जो सिखणे री ज्रूरत हुन्घी से सभ कुछ तुस्सा जो पवित्र आत्मा स्खाई देणा, होर जो कुछ गल्ला से स्खाहां से सच्ची हुई, होर कधी झूठी गल नी स्खान्दा। जिहां पवित्र आत्मा तुस्सा जो करणे रे कठे स्खाईरा तिहां ही तुस्से मसीह साउगी बणी किन्हें रैहया।

²⁸हे लाडले भाईयो होर बैहणो, मसीह मन्झ वास करहा; कि जेबे तेस दबारा वापस आऊंणा, ता आस्सा जो हिम्मत हो, होर आस्से तेसरे साम्हणें बेजत नी हो।

²⁹तुस्से जाणहां ऐं कि मसीही धर्मी जण आ, ता ये भी जाणांहे कि जो कोई धार्मिकता रा काम करहा, से परमेसरा रा बच्चा आ।