Read Mandeali 1 यहून्ना 3 Bible Online

1 यहून्ना 3 - Mandeali bible

1 यहून्ना 3

¹सोचा, बापू परमेसरे आस्सा किन्हें केह्ड़ा प्यार कितेया, ताकि आस्से परमेसरा रे बच्चे कैहलाई सके, होर सच्चे आस्से तेसरे बच्चे हाए भी; एस वजहा ले संसारा रे लोक आस्सा जो नी जाणदा, क्यूंकि संसारा रे लोक बापू परमेसरा जो भी नी जाणदा।

²हे लाडले भाईयो होर बैहणो, ऐबे आस्से परमेसरा री बच्चे ऐं, होर हल्ली तक आस्सा जो नी पता कि आस्सा आगे क्या बणना! जो भी हो आस्से ये जाणहां ऐं कि, मसीह रे दबारा वापस आऊणें पर आस्सा भी तेस साहीं हूंणां, क्यूंकि जेह्ड़ा से आ, आस्सा से तेह्ड़ा ई देखणा।

³होर जो कोई मसीह पर ये आस रख्हा, से आपणे आपा जो तेह्ड़ा ई पवित्र करहा, जेह्ड़ा मसीह आपु पवित्र आ।

⁴कोई अगर बार-बार पाप करदा रहे, से मूसा री व्यवस्था रा वरोध करहा; होर व्यवस्था री गल्ला जो नी मनणा, पाप आ।

⁵होर तुस्से जाणहां ऐं कि, यीसू मसीह इधी कठे आया कि, पापा जो दूर करहे; होर तेस मन्झ कोई पाप नी आ।

⁶जो कोई मसीह मन्झ वास करहा ऐं, से बार-बार पाप नी करदा रैहन्दा; जो कोई पाप करहा, तिन्हें ना ता मसीह देखिरा, होर ना जाणिरा।

⁷हे लाडले बच्चेयो, तुस्से केसी रे धोखे मन्झ देख्या आऊंदे, जो भलाई रे काम करहा से धर्मी जण आ, ठीक जिहां मसीह धर्मी जण आ।

⁸जो कोई बार-बार पाप करहा, से सैताना रा आ, क्यूंकि सैतान संसारा रे रचणे रे पैहले ले ही पाप करदा आईरा; परमेसरा रा मह्ठा इधी कठे आया ताकि से सैताने रे कामा रा नास करहे।

⁹जो कोई परमेसरा रे बच्चे से बार-बार पाप नी करदा; क्यूंकि परमेसरा री जिन्दगी तेस मन्झ ई वास करहा ऐं, से पाप करी नी सक्दा, क्यूंकि से परमेसरा रा बच्चा आ।

¹⁰परमेसरा रे बच्चे होर सैताने रे बच्चे जो तुस्से इंहां जाणी सक्हा ऐं; हरेक आदमी जो भले काम नी करदा होर आपणे भाई होर बैहण किन्हें प्यार नी रखदा, से परमेसरा रा नी आ।

¹¹जो खबर तुस्से सुर्हू ले सुणेयां, से ये आ कि, आस्से एक दूजे किन्हें प्यार करहे।

¹²होर आस्से आदमा रे मह्ठे कैना साहीं नी बणे, जो तेस दुस्ट सैताना ले था, होर जिन्हें जे आपणे भाई री हत्या किती; क्यूंकि तेसरे आपणे काम बुरे थे, होर तेसरे भाई रे काम धार्मिकता रे थे।

¹³हे भाईयो होर बैहणो, अगर संसारा रे लोक तुस्सा किन्हें बैर करहा ता हरान मत हूंणां।

¹⁴आस्से जाणहां ऐं कि, आस्से मौता ले पार हुई किन्हें अनंत जिन्दगी मन्झ आई पुज्ही रे; क्यूंकि आस्से भाई होर बैहणा किन्हें प्यार रख्हा ऐं, जो प्यार नी रख्दे, से मौता री दसा मन्झ रैंहयां ऐं।

¹⁵जो कोई आपणे भाई होर बैहणा किन्हें बैर रख्हा, से हत्यारा आ; होर तुस्से जाणहां ऐं कि केसी हत्यारे मन्झ अनंत जिन्दगी नी रैहन्दी।

¹⁶आस्से प्यार एता ले जाणेया कि, यीसू मसीहे आस्सा रे कठे आपणे प्राण देई दिते; इधी कठे आस्सा जो भी भाई होर बैहणा रे कठे आपणे प्राण देणे चहिए।

¹⁷पर जेस केसी वाले संसारा री धन दौलत हो, होर से आपणे भाई होर बैहणा जो गरीब देखी किन्हें तरस नी खाणा चाहे, ता तेस मन्झ परमेसरा रा प्यार किहाँ बणी रही सक्हा?

¹⁸हे लाडले बच्चेयो, आस्सा री बोली होर गल्ला मन्झ ई नी, पर काम होर सच्चाई किन्हें भी प्यार सूझणा चहिए।

¹⁹जेबे आस्से दूजेया किन्हें प्यार करघे ता आस्सा जाणी लैणा कि आस्से सच्चाई रे ऐं; होर अगर बुरे कामा री वजहा ले भी आस्सा री अंतरात्मा परमेसरा रे साम्हणें आस्सो दोसी बणाहां, ता भी आस्से हिम्मता किन्हें परमेसरा रे साम्हणें जाई सक्हा ऐं, क्यूंकि आस्से जाणांहे कि परमेसर आस्सा री अंतरात्मा ले बडा आ होर से सभ कुछ जाणहां।

²¹हे लाडले भाईयो होर बैहणो, अगर आस्सा री अंतरात्मा आस्सा जो दोसी नी ठैहराए ता परमेसरा रे साम्हणें आस्सा जो हिम्मत हुंहाँ ईं।

²²होर जो कुछ आस्से मांघ्हा ऐं, से आस्सा जो परमेसरा ले मिल्हा; क्यूंकि आस्से तेसरे हुक्मा जो मन्हां ऐं; होर जो तेस जो खरा लग्हा आस्से तेह्ड़ा ई करहा ऐं।

²³होर तेसरा हुक्म ये आ कि आस्से तेसरे मह्ठा यीसू मसीह रे नांऊँआं पर विस्वास करहे होर जेह्ड़ा तिन्हें आस्सा जो हुक्म दितिरा, तेता रे ई मताबक आस्से एक दूजे किन्हें प्यार करहे।

²⁴होर जो परमेसरा रे हुक्मा जो मन्हां, स्यों परमेसरा मन्झ वास करहा; होर परमेसर तिन्हा मन्झ वास करहा, होर इंहां ईं, तेस पवित्र आत्मा ले जो तिन्हें आस्सा जो दितिरा, एता ले आस्से जाणहां ऐं कि, परमेसर आस्सा मन्झ वास करहा।