Read Mandeali 1 यहून्ना 4 Bible Online

1 यहून्ना 4 - Mandeali bible

1 यहून्ना 4

¹हे लाडले भाईयो होर बैहणो, हरेक तेस माह्णुं पर विस्वास नी करहा जो ये बोल्हा की मेरे मन्झ परमेसरा री आत्मा ई; पर आत्मा जो परखा कि, स्यों परमेसरा री तरफा ले ई कि नी ई; क्यूंकि बौह्त सारे झूठे नबी संसारा मन्झ ऐं जो परमेसरा री तरफा ले नी ऐं।

²परमेसरा रा आत्मा तुस्से एस तरहा प्छ्याणी सक्हा ऐं कि, जो कोई आत्मा मनी लैंहीं कि, यीसू मसीह माह्णुं रा रूप धारण करी किन्हें एस धरती मन्झ आया; से परमेसरा री तरफा ले आ।

³होर जो कोई आत्मा यीसू जो नी मन्नदा, से परमेसरा री तरफा ले नी आ, होर सेई मसीह रे व्रोधी री आत्मा ई; जेसरे बारे मन्झ तुस्से सुणी चुकिरे कि, से आऊणें वाल़ा आ, होर ऐबे भी संसारा मन्झ आ।

⁴हे लाडले बच्चेयो, तुस्से परमेसरा रे ऐं; इधी कठे तुस्से तिन्हा झूठे नबिया पर जीत पाई लईरी, क्यूंकि जो पवित्र आत्मा तुस्सा मन्झ आ, से तेस सैताना ले बडा आ जो एस संसारा मन्झ आ।

⁵स्यों झूठे नबी संसारा रे ऐं, इधी कठे स्यों संसारा री गल्ला करहा ऐं, होर संसारा रे लोक तिन्हारी सुणहां।

⁶आस्से परमेसरा रे ऐं; जो परमेसरा जो जाणहां, से आस्सा री सुणहां; जो परमेसरा जो नी जाणदा से आस्सा री नी सुणदा, एस तरहा आस्से सत्या री आत्मा होर भटकाणे वाली आत्मा जो प्छ्याणी लैहां ऐं।

⁷हे लाडले भाईयो होर बैहणो, आस्से आपु मन्झ प्यार रखे, क्यूंकि प्यार परमेसरा ले आ; होर जो कोई एक दूजेया किन्हें प्यार करहा, से परमेसरा रे बच्चे ऐं; होर परमेसरा जो जाणहां।

⁸जो एक दूजेया प्यार नी करदा, से परमेसरा जो नी जाणदा, क्यूंकि परमेसर प्यार आ।

⁹जो प्यार परमेसर आस्सा किन्हें करहा, से एस तरहा सूझा कि परमेसरे आपणा एकलौता मह्ठा संसारा मन्झ भेज्या, ताकि आस्से तेसरे ज्रीए सच्ची जिन्दगी पाए।

¹⁰प्यार एता मन्झ नी आ कि आस्से परमेसरा किन्हें प्यार कितेया; पर प्यार एता मन्झ आ कि परमेसरे आस्सा किन्हें प्यार कितेया; होर आस्सा रे पापा रे प्रायस्चिता रे कठे आपणा मह्ठा भेज्या।

¹¹हे लाडले भाईयो होर बैहणो, जेबे परमेसरे आस्सा किन्हें एह्ड़ा प्यार कितेया, ता आस्सा जो भी एक दूजे किन्हें प्यार रखणा चहिए।

¹²परमेसरा जो कधी केसिए नी देख्या; अगर आस्से एक दूजे किन्हें प्यार रखे, ता परमेसर आस्सा मन्झ वास करहा ऐं, होर तेसरा प्यार आस्सा मन्झ सिद्ध हुंहाँ।

¹³एता ले आस्से जाणहां ऐं कि, आस्से परमेसरा मन्झ वास करहा ऐं, होर से आस्सा मन्झ वास करहा; क्यूंकि परमेसरे आपणी पवित्र आत्मा मन्झा ले आस्सा जो दितिरा।

¹⁴होर आस्से से मह्ठा देखी भी लया होर गुआही भी देहां ऐं कि, बापू परमेसरे आपणा मह्ठा, संसारा रा उद्धारकर्ता रे रूपा मन्झ भेज्या।

¹⁵जो कोई ये मनी लैहां कि, यीसू परमेसरा रा मह्ठा आ; परमेसर तेस मन्झ वास करहा ऐं, होर से परमेसरा मन्झ वास करहा।

¹⁶होर आस्से जाणी गये होर आस्सा जो विस्वास आ की परमेसर आस्सा किन्हें प्यार रख्हा। परमेसर प्यार आ, जो प्यारा मन्झ वास करहा ऐं, से परमेसरा मन्झ वास करहा ऐं; होर परमेसर तेस मन्झ वास करहा ऐं।

¹⁷एता ले ई प्यार आस्सा मन्झ सिद्ध हुआ कि, न्याय रे ध्याड़े आस्सो हिम्मत हो कि परमेसरा आस्सा जो सजा नी देणी; जिहां मसीह संसारा मन्झ रैहन्दे हुए परमेसरा मन्झ वास करहा था, तेह्ड़ा ई आस्से भी परमेसरा मन्झ वास करहा ऐं।

¹⁸एह्ड़े प्यारा मन्झ डर नी हुन्दा, पर सिद्ध प्यार डरा जो दूर करी देहां, क्यूंकि डरा ले सजा मिल्हा ई, होर जो डरहा, तेस मन्झ परमेसरा रा प्यार सिद्ध नी हुआ।

¹⁹आस्से परमेसर होर दूजेया किन्हें इधी कठे प्यार करहा ऐं कि, पैहले परमेसरे आस्सा किन्हें प्यार कितेया।

²⁰अगर कोई बोले कि, “हांऊँ परमेसरा किन्हें प्यार करहा,” पर आपणे विस्वासी भाई होर बैहणा किन्हें नफरत रख्हा; ता से झूठा आ, क्यूंकि जिन्हा विस्वासी भाई होर बैहणा जो स्यों देखाएं किन्हें फेरी भी तिन्हा किन्हें प्यार नी करदा, ता से परमेसरा ले भी जो तिन्हें कधी नी देखिरा, से तेस किन्हें प्यार नी रखी सक्दा।

²¹होर तेस ले आस्सा जो ये हुक्म मिलिरा कि, जो कोई आपणे परमेसरा किन्हें प्यार रख्हा, से आपणे विस्वासी भाई होर बैहणा किन्हें भी प्यार रखे।