Read Mandeali 1 यहून्ना 5 Bible Online

1 यहून्ना 5 - Mandeali bible

1 यहून्ना 5

¹जेसरा ये विस्वास आ कि यीसू ई मसीह ऐं, से परमेसरा रा बच्चा आ होर जो कोई बापू परमेसरा किन्हें प्यार करहा, से तेस किन्हें भी प्यार करहा ऐं, जो तेस बापू रे बच्चे ऐं।

²जेबे आस्से परमेसरा किन्हें प्यार करहा ऐं, होर तेसरे हुक्मा जो मन्हां ऐं, ता एता ले ई आस्से जाणी लैहां ऐं कि आस्से परमेसरा रे बच्चेया किन्हें प्यार करहा ऐं।

³जो आस्सा रा प्यार परमेसरा किन्हें ये आ, होर से एता मन्झ आ कि आस्से तेसरे हुक्म मन्हें; होर तेसरे हुक्म मन्ना कठण नी ऐं।

⁴क्यूंकि जो कोई परमेसरा रा बच्चा आ, से संसारा पर जीत हासल करहा। होर जो जीत संसारा जो हराई देई, से आस्सा रा विस्वास ही आ।

⁵संसारा जो जितने वाल़ा कुणहां? से ही जे विस्वास करहा कि यीसू ही परमेसरा रा मह्ठा आ।

⁶यीसू मसीह रे बारे मन्झ सोचा, जेस जो परमेसरे भेजीरा ये तेबे जाहिर हुआ जेबे यहून्ना बपतिस्मा देणे वाल़े यीसू जो पाणी मन्झ बपतिस्मा दितेया; होर तेबे भी जाहिर हुआ जेबे यीसू मसीह मरी गया ता तेसरे सरीरा ले खून बैह्या; होर परमेसरा री पवित्र आत्मे ये गुआही दिती कि यीसू मसीह परमेसरा री तरफा ले आईरा था होर पवित्र आत्मा सच्चा री गुआही देआ।

⁷होर एस गुआही जो देणे वाले तीन ऐं;

⁸आत्मा, जो परमेसरा री आत्मा ई। पाणी, जो मसीहा रा बपतिस्मा। होर खून, जो यीसू मसीह री मौत ई। होर तीन्हो एक ई गला री गुआही देहां ऐं।

⁹जेबे आस्से माह्णुंआं री गुआही मनी लैहां ऐं, ता परमेसरा री गुआही जो आस्से की नी मनी सकदे; होर परमेसरा री गुआही येई कि, तिन्हें आपणे मह्ठे रे बारे मन्झ गुआही दितिरी।

¹⁰जो परमेसरा रे मह्ठे पर विस्वास करहा; से आपणे मना मन्झ विस्वास करहा कि जो कुछ परमेसरे बोलिरा से सच्चा आ। जिन्हें जे परमेसरा पर विस्वास नी कितेया; तिन्हें परमेसरा जो झूठा ठैहराया, क्यूंकि तिन्हें तेस गुआही पर विस्वास नी कितेया, जो परमेसरे आपणे मह्ठे रे बारे मन्झ दिती।

¹¹होर से गुआही सेई कि, परमेसरे आस्सा जो अनंत जिन्दगी दिती; होर ये जिन्दगी तेसरे मह्ठे यीसू रे ज्रीए आस्सो मिलिरा।

¹²जेस वाले मह्ठा वास करहा आ, तेस वाले अनंत जिन्दगी ई; होर जेस वाले परमेसरा रा मह्ठा वास नी करदा आ, तेस वाले अनंत जिन्दगी भी नी ई।

¹³हांऊँ ये चिठ्ठी तिन्हा लोका जो लिख्हा आ, जो परमेसरा रे मह्ठा रे नांऊँआं पर विस्वास करहा ऐं, मै यूँ गल्ला इधी कठे लिखीरी; कि तुस्से जाणी सको कि, अनंत जिन्दगी तुस्सा री ई।

¹⁴जो हिम्मत आस्सा जो परमेसरा रे साम्हणें हुंहाँ ईं, से येई कि, अगर आस्से तेसरी इच्छा रे मताबक कुछ मांगे ता से आस्सा री सुणहां।

¹⁵होर जेबे आस्से जाणहां ऐं कि, जो कुछ आस्से परमेसरा ले मांघ्हा ऐं, से आस्सा री सुणहां, ता ये भी जाणहां ऐं कि, जो कुछ आस्से तेस ले मान्गेया, से आस्से तेस ले पाई लईरा।

¹⁶अगर कोई आपणे विस्वासी भाई होर बैहणा जो एह्ड़ा पाप करदे देखे, जेसरी सजा मौत नी हो, ता तेसरे कठे प्रार्थना करहा, होर परमेसरा तेस प्रार्थना री वजह ले तेस जो जिन्दगी देणी, जिन्हें एह्ड़ा पाप कितिरा हो। एक पाप एह्ड़ा भी आ जेसरी सजा मौत ई होर एसरे बारे मन्झ मै प्रार्थना करणे रे कठे नी बोल्दा।

¹⁷सब तरहा रा बुरे काम ता पाप आ, पाप एह्ड़ा भी हुआ जेसरी सजा मौत नी ई।

¹⁸आस्से जाणहां ऐं कि जो कोई परमेसरा रे बच्चे ऐं, से बार-बार पाप नी करदा, क्यूंकि परमेसरा रे मह्ठे यीसू मसीह तिन्हो बचा होर दुस्ट सैतान तिन्हारा कुछ नी बिगाड़दा।

¹⁹आस्से जाणहां ऐं कि, आस्से परमेसरा रे ऐं, होर सारा संसार तेस दुस्ट सैताना रे कब्जे मन्झ आ।

²⁰होर ये भी जाणहां ऐं कि, परमेसरा रा मह्ठा प्रभु यीसू मसीह आईरा होर तिन्हें आस्सा जो समझ दितिरी कि, आस्से तेस सच्चे परमेसरा जो जाणें, होर आस्से तेसरे मह्ठे यीसू मसीह मन्झ जो सच्च आ, वास करहा ऐं। सच्चा परमेसर होर अनंत जिन्दगी सेई आ।

²¹हे बच्चेयो, आपणे आपा जो तिन्हा मूर्तिया ले बचाई किन्हें रखा जो तुस्सा रे दिला मन्झ परमेसरा री जगहा लेई।