Read Mandeali यहूदा 1 Bible Online

यहूदा 1 - Mandeali bible

यहूदा 1

¹हांऊँ यहूदा एस चिठ्ठी जो लिखी करहा। हांऊँ यीसू मसीहा रा सेऊआदार होर याकूबा रा छोटा भाई आ। परमेसरे जिन्हा लोका जो आपणे गास विस्वास करणे रे कठे सादिरे, हांऊँ तिन्हा लोका जो ये चिठ्ठी लिखी करहा। बापू परमेसर तुस्सा किन्हें प्यार करहा होर यीसू मसीहा रे ज्रीए तुस्से सुरक्षित ऐं।

²हांऊँ प्रार्थना करहा कि परमेसर तुस्सा जो बौह्त सारा अनुग्रह, सांति होर प्यार देंदा रहे।

³हे लाडले भाईयो होर बैहणो, हालांकि हांऊँ मना ले चाहां था कि परमेसरा ले आस्सा जो मिलणे वाले उद्धारा रे बारे मन्झ तुस्सा जो लिखूं जेसरे आस्से सभ साझी ऐं, पर ऐबे मैं ये जरूरत मैहसूस किती कि हांऊँ तुस्सा जो इधी कठे लिखूं कि तुस्से हिम्मत पाई किन्हें सच्चे उपदेसा रा बचाव करी सको, परमेसरे आस्सा जो ये सच्चाई आपणे पवित्र लोका रे कठे एक बारी ही देई दितिरी जेस्सा कधी नी बदलना।

⁴क्यूंकि यीसू मसीह पर विस्वास करणे रा ढोंग करणे वाले कुछ लोक तुस्सा री कलीसिया किन्हें जुड़ी गईरे। ये परमेसरा री इज्जत नी करदे होर गलत उपदेस दें कि आस्से लुचपन करी सके, क्यूंकि परमेसर आस्सा रे पाप माफ करी देआ। स्यों प्रभु यीसू मसीहा रा इनकार करहा ऐं जो आस्सा रा एक ऐं प्रभु होर माल्क आ। बौह्त टैम पैहले पवित्र सास्त्रा मन्झ लिखिरा था कि परमेसर आस्सो सजा देआ।

⁵हालांकि तुस्से इन्हा सच्ची गल्ला जो जाणांहे पर हांऊँ सिर्फ तुस्सा जो याद कुराणा चाहां। परमेसरे इस्राएली लोका जो मिस्र देसा री गुलामी ले छुड़ाई किन्हें बाहर लेई आया, पर बादा मन्झ परमेसरे तिन्हा सभी जो, जिन्हें तेस पर भरोसा नी रखेया बियाबान जंगला मन्झ ही मुकाई दिते।

⁶याद रखा परमेसरे केस तरीके से तिन्हा स्वर्गदूता जो सजा दिती, जो आपणे हका ले खुस नी थे, बल्की तिन्हें तिन्हा जो मिलिरे औहदे भी छाडी दिते, परमेसरे इन्हा दूता जो नह्यारे वाली जगहा मन्झ अनंत सांगला किन्हें बान्ही किन्हें रखिरा, जेस जो कोई तोड़ी नी सकदा, ताकि तेस महान न्याय रे ध्याड़े तिन्हारा न्याय कितेया जाये।

⁷इन्हा इस्राएली लोका होर स्वर्गदूता साहीं याद रखा कि सदोम होर गमोरा होर तेसरे ओरले परले सैहरा मन्झ रैहणे वाले लोका किन्हें क्या हुईरा था। स्यों लोक व्यभिचारी हुई गईरे थे होर हर प्रकारा रे नजायज यौन रिस्ते मन्झ पई गईरे थे, इधी कठे परमेसरे स्यों आगी किन्हें मारी दिते, होर ये झूठे उपदेस देणे वाले रे कठे एक चेतावनी की तिन्हा जो भी अनंतकाला री आगी ले सजा मिलणी।

⁸ठीक इंहां ईं ये लोक जो यीसू मसीह पर विस्वास करणे रा ढोंग करहे, स्यों दावा करहे परमेसरे तिन्हो दर्सना मन्झ जाहिर कितिरा कि लुचपन करी किन्हें स्यों आपणे सरीरा जो असुद्ध करी सक्हा ऐं, होर तिन्हो केसी रे हका मन्झ रैहणे री जरूरत नी, होर स्यों महिमामय स्वर्गदूता रे बारे मन्झ बुराई करी सक्हा ऐं।

⁹पर प्रधान स्वर्गदूत मीकाईले भी इन्हा ढोंगीया साहीं नी कितेया, जेबे सैताने मीकाईले मूसा नबी री ल्हासा दबाणे रे बारे मन्झ बैहस किती कि, कुण तेस जो दबाई सक्हा, तेबे मीकाईल जो इन्हा सभी ले ज्यादा हक रखा तिन्हें सैताना किन्हें बुरा भला बोली किन्हें दोस नी लगाया। एता रे बजाय तिन्हें सिर्फ ये बोल्या कि, “प्रभु तुजो झिड़के।”

¹⁰पर ये लोक जिन्हा गल्ला जो नी समझ्दे, तेता रे बारे मन्झ बुरा-भला बोल्हा ऐं। होर जिन्हा गल्ला जो स्यों समझे होर जिन्हा गल्ला जो स्यों नासमझ जानवरा साहीं स्वभावा ले ही करहा ऐं, इन्हा पाप भरी गल्ला करणे ले ही स्यों आपणे आपा रा नास करी करहा ऐं।

¹¹तिन्हा जो बौह्त सजा मिलणी! तिन्हें आदमा रे मह्ठे कैना साहीं बुरे काम किते, जिन्हें आपणे भाई रा खून कितेया। जिहां बिलामे पैसा कमाणे रे कठे लोका ले पाप कुराया था, तिहां ही जल्दबाजी मन्झ झूठे उपदेस देणे वाले भी ये गलती किती। होर जिहां मूसा रे विरोध करणे री वजहा ले परमेसरे कोरहा जो नास करी दितिरा था, तिहां ही ये लोक भी नास किते जाणे, क्यूंकि ये लोक प्रभु रा बिरोध करी करहा ऐं।[1]

¹²जेबे ये लोक प्रभु रे प्यारा जो याद करदे हुए तुस्सा साउगी मण्डली रे खाणे मन्झ साझी हुए, स्यों एक खतरनाक चट्टाना साहीं ऐं, जो समुद्र मन्झ लुख्ही री होर तुस्सा जो डबोई सकी। स्यों तिन्हा बेसर्म रखवाले साहीं जो सिर्फ आपणे बारे मन्झ ही सोच्हे, ये तिन्हा बादला साहीं ऐं; जो हमेसा जमीना रे गास उडदे रहे होर जिन्हा के कधी बरखा नी हुन्दी। ये पतझड़ा रे डाला साहीं ऐं, जो दो बारी मरी चुकिरे, जिन्हा मन्झ फल नी लगदे, होर जड़ा ले पठी गईरे।

¹³समुद्रा री भयानक लैहरा साहीं जो गंदी झाग लेई आई, ये लोक भी बेज्जती रे काम करहे। तुस्सा जो इन्हा लोका रे पीछे नी चलना चहिए, जो डांवाडोल तारे साहीं ऐं जिन्हा कधी भी तुस्सा जो सही रस्ता नी दसी सकदे। इधी कठे प्रभुए तिन्हारे कठे न्याहरे री जगहा त्यार कितिरी, जेथी तिन्हा जुग-जुग रे कठे रेहणा।

¹⁴होर हनोक जो पैहला माह्णुं आदमा रे बादा सातवीं पीढ़ी मन्झ जमीरा था, तिन्हें इन्हा लोका रे बारे मन्झ भविस्यवाणी किती, जेबे तिन्हें एह्ड़ा बोल्या कि, “देखा, प्रभु आपणे हज़ारों हज़ार पवित्र स्वर्गदूता साउगी पक्का आऊंणा,

¹⁵कि सभी लोका रा न्याय करहे, होर जो परमेसरा री इज्जत नी करदे, तिन्हा जो तिन्हें बुरे काम होर लुचपन रे कठे दोसी ठैहराये होर तिन्हा डरावनी गल्ला रे कठे भी जो तिन्हें लोके परमेसरा रे विरोधा मन्झ बोलिरी।”

¹⁶ये लोक हमेसा परमेसरा रे खलाफ बोल्हे होर दूजेया री गलतिया काढे, होर आपणी इच्छा रे मताबक हमेसा बुरे काम करहे। स्यों आपणे बारे मन्झ बडी-बडी गल्ला बोल्हे होर दूजेया री तारीफ करणे रा ढोंग करहे, ताकि तिन्हो तेता ले कुछ फायदा मिली सके।

¹⁷पर हे लाडले भाईयो होर बैहणो, तुस्से तिन्हा गल्ला जो याद रखा; जो आस्सा रे प्रभु यीसू मसीह रे चुणिरा चेला बौह्त पैहले तुस्सा किन्हें बोली चुकिरे।

¹⁸स्यों तुस्सा किन्हें बोल्हा ऐं थे कि, “आखरी ध्याड़े मन्झ आस्सा रे प्रभु यीसू मसीह रे वापस आऊणें ले पैहले एह्ड़े मखौलिये हूंणे, जिन्हा प्रभु रा होर तेसरे लोका रा मजाक डूआणा।” ये एह्ड़े लोक ऐे जो आपणी बुरी इच्छा रे मताबक आपणी जिन्दगी जीये।

¹⁹ये एह्ड़े लोक ऐे, जो तुस्सा मन्झ फूट पाई किन्हें तुस्सा रा बंटवारा करी दे। स्यों आपणे स्वभावा ले ही सारे बुरे कामा जो करणा चाहें होर तिन्हा मन्झ पवित्र आत्मा नी।

²⁰पर हे लाडले भाईयो होर बैहणो, तुस्से जिन्हा पवित्र उपदेसा पर विस्वास रखे, तिन्हा पर मजबूती किन्हें बणी रैहणे रे कठे एक दूजे री मदद करदे रैहया। होर पवित्र आत्मा री सामर्था री अगुवाई पाई किन्हें प्रार्थना करदे रैहया।

²¹जिहां तुस्से प्रभु यीसू मसीह रा वापस आऊणें रा इंतजार करी करहे कि, से आपणी दया किन्हें तुस्सा जो अनंत जिन्दगी दे; ये जाणी किन्हें कि परमेसरा तुस्सा किन्हें प्यार करहा, हमेसा आपणी जिन्दगी मन्झ आगे बढ़दे रैहया।

²²होर तिन्हा लोका पर दया करहा जो नी जाणदे कि केस उपदेसा पर विस्वास करणा चहिए।

²³होर बौह्त लोका जो झपटी किन्हें न्याय री आगा मन्झा ले बचाऊआ, एह्ड़े होर लोका ऐं जिन्हा पर दया करणी चहिए पर तिन्हा ले तुस्सा जो चतन्न भी रेहणा चहिए। तुस्सा जो तिन्हारे कपड़े ले भी नफरत करणी चहिए एह्ड़ा समझी किन्हें जिहां कि तिन्हारे पापा री अभिलासे तिन्हारे कपड़े भी गंदे करी दितिरे हो।

²⁴एक ही परमेसर आ जो तुस्सा जो पऊणे ले बचाई सक्हा, होर जेबे तेस आपणी महिमा मन्झ तुस्से आपणे साम्हणें लेई आऊणें, तेबे से तुस्सा जो मगन होर बेकसूर रखी सक्हा। तिन्हें आस्सा रे, प्रभु यीसू मसीह रे ज्रीए आस्से बचाई लितिरे। सनातन काल ले लेई किन्हें महिमा, बड़ाई, होर गौरव, तेसरा था होर ऐबे भी तेसरा, होर जुग-जुग तेसरा ही रेहणा। आमीन।