Read Mandeali प्रकासना री गल्ला 10 Bible Online

प्रकासना री गल्ला 10 - Mandeali bible

प्रकासना री गल्ला 10

¹फेरी मैं एक होर सामर्थी स्वर्गदूत स्वर्गा ले उतरदे देख्या, जो बादल किन्हें ढख्ही रखिरा था। होर एक मेघ-धनुसे तेसरे मुंडा जो घेरी रखीरा था। होर तेसरा मुंह सूरजा साहीं चमकी करहा था, होर तेसरे पैर आगी रे खम्बे साहीं थे।

²तिन्हें आपणा सीधा पैर समुद्रा पर, होर पुठा पैर धरती पर रखीरा था। होर तेसरे हाथा मन्झ एक छोटी कताब थी, जो खुलीरी थी।

³से स्वर्गदूत बड़ी जोरा री अवाजा किन्हें चिंगेया, जिहां सेर दहाड़ा आ। होर जेबे से चिंगेया ता सात भारी अवाजे तेस जो जबाब दितेया, जिन्हारी अवाज भारी गर्जना साहीं थी।

⁴होर जेबे सात गर्जना री अवाज बोली बैठी, ता जो कुछ मैं सुणेया तेता जो लिखणे ही वाल़ा था, पर मैं स्वर्गा ले ये अवाज सुणी कि, “जो गल्ला तैं सात गर्जना ले सुणीरी, तिन्हा जो ल्कोई किन्हें रख, होर लिख्दा देख्या।”

⁵होर जेस स्वर्गदूता जो मैं समुद्र होर धरती पर खड़ीरे देख्या, तिन्हें आपणा सीधा हाथ कसम खाणे रे कठे स्वर्गा वखा जो चक्या।

⁶होर तिन्हें परमेसरा री जो जुग-जुग जिउंदा आ, होर जिन्हें जे स्वर्ग होर तेसरी सभ चीजा, धरती होर तेता री सभ चीजा, होर समुद्रा जो होर जो कुछ तेस मन्झ आ रचेया, तेसरी कसम खाई किन्हें बोल्या, “ऐबे केसी गल्ला रे देरी नी हूणीं सभ कुछ पूरा हूणा।[39]

⁷होर जिहां ही सातुऐ स्वर्गदूता रा तुरही बजाणे रा टैम आऊंणा, ता परमेसरा आपणी ल्कोईरी योजना जाहिर करणी, जेसरे बारे मन्झ तिन्हें आपणे नबिया किन्हें बोलिरा था, जो तेसरी सेऊआ करहे थे।”

⁸तेबे मैं दबारा सेई अवाज सुणी, जो स्वर्गा ले मेरे किन्हें गलाई करही थी, तेस अवाजे मेरे किन्हें बोल्या कि “जा, तेस्सा कताबा जो ले जो तेस स्वर्गदूता रे हाथा मन्झ ई, जो समुद्र होर जमीना पर खड़ीरा।”

⁹होर जेबे मैं स्वर्गदूता वाले जाई किन्हें बोल्या, “ये छोटी कताब मुंजो देई दे।” होर तिन्हें मेरे किन्हें बोल्या, “ले एता जो खाई ले; ये कताब म्खीरा साहीं मीठी, पर बाद मन्झ तेता रे कौड़ेपना ले तेरे पेट मन्झ पीड़ हूणीं।” इधी कठे मैं से कताब लिती, जो स्वर्गदूते पकड़ीरी थी होर से खाई लिती। होर ये सच्च था कि तेता रा स्वाद म्खीरा साहीं था। पर जेबे हांऊँ तेता जो खाई बैठया, ता मेरा पेटा मन्झ तेस कौड़ेपना ले पीड़ हुई।

¹¹तेबे मेरे किन्हें ये बोल्या गया कि, “जरूरी आ कि परमेसर जो गल्ला तुस्सा जो बोलणे रे कठे दितिरी, तिन्हों दबारा बौह्त सारे जाति होर देसा रे लोका जो, लग-लग भासा बोलणे वाले जो होर राजेया जो बोली देआ।”