Read Mandeali प्रकासना री गल्ला 16 Bible Online

प्रकासना री गल्ला 16 - Mandeali bible

प्रकासना री गल्ला 16

¹फेरी मैं मन्दरा ले केसी जो उच्ची अवाजा मन्झ तिन्हा सात स्वर्गदूता किन्हें ये बोल्दे हुए सुणेया कि, “जाऊआ, होर परमेसरा रा गुस्सा जो सात डोंगें मन्झ आ, तिन्हो धरती पर दली देआ।”

²इधी कठे पैहले स्वर्गदूते जाई किन्हें आपणा डोंगें मन्झ ले परमेसरा रे गुस्से जो धरती पर दली दितेया। होर जिन्हा लोके पर राक्सा री छाप लगिरी थी, होर जो तेसरी मूर्ति री अराधना करहा ऐं थे, तिन्हारे सरीर मन्झ भयानक फोड़े निकले, जो बौह्त पीड़ा दे थे।

³दूजे स्वर्गदूते जाई किन्हें आपणे डोंगें मन्झ ले परमेसरा रे गुस्से जो समुद्रा पर दली दितेया। होर झटपट समुद्रा रा पाणी मरिरे माह्णुं रे खूना साहीं बदली गया, होर एता री वजहा ले समुद्रा रा हर एक जानवर मरी गया।

⁴होर त्रीजे स्वर्गदूते जाई किन्हें आपणे डोंगें मन्झ ले परमेसरा रे गुस्से जो दराऊआ होर पाणी रे सोते पर दली दितेया। होर स्यों खूना मन्झ बधली गये।

⁵होर मैं तेस स्वर्गदूता जो, जेस जो सारे पाणी पर हक आ, तेस जो परमेसरा किन्हें ये बोल्दे सुणेया कि, “हे पवित्र परमेसर, तू जो था, होर जो हाया, तैं संसारा जो ये सजा देई किन्हें बिलकुल सही न्याय कितिरा।

⁶क्यूंकि तिन्हें परमेसरा रे पवित्र लोका रा, होर तेरे नबिया रा खून बहाई किन्हें स्यों मारी दिते। इधी कठे तैं ऐबे तिन्हा जो खून पीणे जो दे, क्यूंकि स्यों एता रे लायक ऐं।”

⁷दबारा मैं तेस बेदी मन्झा केसी जो ये बोलदे हुए सुणा कि, “हां, हे सर्वसक्तिमान प्रभु परमेसर, जो सजा तैं इन्हा लोका जो दिती, से बिलकुल सच्ची होर सही ई।”

⁸होर चौथे स्वर्गदूते जाई किन्हें आपणे डोंगें मन्झ ले परमेसरा रे गुस्से जो सूरजा पर दली दितेया। होर सूरजा जो आपणी डरोणी होर भयानक गर्मी किन्हें माह्णुंआं जो फुखी किन्हें जख्मी करणे री सक्ति दिती।

⁹होर माह्णुं सूरजा रे तेज गर्मी किन्हें फुखी गये। तेबे तिन्हें आपणे बुरी कामा जो छाडी किन्हें होर परमेसरा री महिमा करणे रे बजाय स्यों परमेसरा री निंदा करदे लगे। क्यूंकि तिन्हा कैहरा जो भेजणे रा हक सिर्फ परमेसरा वाले आ।

¹⁰होर पान्जुए स्वर्गदूते जाई किन्हें आपणे डोंगें मन्झ ले परमेसरा रे गुस्से जो तेस राक्सा री राज्य पर दली दितेया, होर तेसरे राज्य मन्झ न्हयारा छाई गया। होर लोक बड़ी पीड़ा रे मारे आपणी-आपणी जीभ चाब्दे लगे।

¹¹होर आपणी पीड़ा होर फोड़े री वजहा ले तिन्हें परमेसरा री निंदा किती, जो स्वर्गा मन्झ रैहया। हालांकि ऐबे तिन्हारी हालत इतनी खराब थी, फेरी भी तिन्हें आपणे बुरे काम करणा नी छाडे।

¹²होर छठुहे स्वर्गदूते जाई किन्हें आपणे डोंगें मन्झ ले परमेसरा रे गुस्से जो बडी नदी फरात दराऊआ पर दली दितेया। जेस ले तेसरा पाणी सुक्की गया, होर तेस वजहा ले पूर्व ले आईरे राजा आपणी सेना जो लेई किन्हें तेस दराऊआ जो पार करी पाए।

¹³तेता ले बाद मैं तीन दुस्टात्मा जो देखेया, जो मिनके रे साहीं सूझी थी। तेता मन्झ ले एक अजगरा रे मुंहा ले निकलेया, होर एक पैहले होर दूजे राक्सा ले मुंहा ले निकलेया, होर एक झूठे भविस्यवाणी करणे वाले रे मुंहा ले निकलेया।

¹⁴इन्हा दुस्टात्मा जो चिन्ह दसणे रा हक दितिरा था, होर तिन्हें जाई किन्हें धरती पर राज करणे वाले सब लोका जो कठ्ठा कितेया, ताकि स्यों जाई किन्हें सर्वसक्तिमान परमेसरा साउगी तेस बडे ध्याड़े लड़ाई करी सके।

¹⁵दुस्टात्मा राज करणे वाले लोका जो होर तेसरी सेना जो तेस जगहा कठा कितेया, जेस जो इब्रानी भासा मन्झ हर-मगिदोन बोल्या जाहाँ। इधी कठे प्रभु यीसूए बोल्या कि, “एस गल्ला जो सुणा, मां चोरा साहीं अचानक आहूँणा। धन्य आ से माह्णुं जो मेरे आऊणें पर जागदा रैंहयां, होर आपणे कपड़े जो त्यार रखा। तेबे तिन्हा नांगे नी हूंणे होर जेबे लोका रे बीचा मन्झ जाणा, ता एह्ड़ा कुछ भी नी हूंणा जो तिन्हो बेज्जत करहे।”

¹⁷होर सातुवे स्वर्गदूते जाई किन्हें आपणे डोंगें मन्झ ले परमेसरा रे गुस्से जो बागर पर दली दितेया। होर स्वर्गा रे मन्दरा रे अंदर परमेसरा री राजगद्दी वाले ले मुंजो केसी रे बोलणे री अवाज आई कि, “सभ कुछ पूरा हुई गया।”

¹⁸फेरी बिजलिया चमकी होर गड़गड़ाहटा री अवाज हुई होर बादला री गर्जन हुई, होर एक बडा हिलण हुआ। धरती पर रैहणे वाले लोके, माह्णुं री सुर्हूआता ले लेई किन्हें ऐबे तक कधी नी एह्ड़ा बडा हिलण नी देखीरा था।

¹⁹होर तेस बडे सैहरा बाबेल रे तीन टुकड़े हुई गये, होर तेसरे ओरले-परले चारों वखा रे सैहर भी पई गये, क्यूंकि परमेसरे बडे बाबेल देसा रे लोका नास करणे रा जो वादा कितिरा था, होर से पूरा कितेया, तिन्हा जो बौह्त बड़ी सजा मिलणी। ये एह्ड़ा हूंणा जिहां कि तिन्हें नीट[46] सराब पितिरी हो, जो परमेसरे आपु तेस डोंगें मन्झ पाईरा जो तेसरे गुस्से जो दसा।

²⁰होर तेस टैम समुद्रा रे हर एक टापू आपणी जगहा ले झटपट हटी गये, होर प्हाड़ा जो पता तक नी चल्या।

²¹होर आसमाना ले माह्णुंआं रे प्र्याहले पर पंजाह किलो रे बडे-बडे सुणाट पये, इधी कठे तिन्हें परमेसरा री निंदा किती। क्यूंकि परमेसरा रे ज्रीए भेजिरे कैहरा ले लोका जो बड़ी पीड़ा सहन करणी पहूंआं ईं।