Read Mandeali प्रकासना री गल्ला 17 Bible Online

प्रकासना री गल्ला 17 - Mandeali bible

प्रकासना री गल्ला 17

¹होर जिन्हा सात स्वर्गदूता वाले स्यों सात डोंगें थे, तिन्हा मन्झा ले एकिये आई किन्हें मुंजो ये बोल्या कि, “एथी आऊ, हांऊँ तूजो दसणा कि परमेसरा किहाँ तेस्सा बडी वेस्या यानि बाबेल सैहरा जो सजा देणी, जो बौह्त सारे पाणीया गास बैठिरी।

²तेस्सा साउगी धरती रे राजे व्यभिचार कितेया, होर धरती रे रैहणे वाले सभ माह्णुंआं जो आपणा बणीरा सराब पयाया यानि तिन्हें सारे माह्णुंआं ले बुरे काम कुराये, क्यूंकि तेस्से जनानिये लोका जो मूर्ति पूजा करणा सखाया था।”

³तेबे पवित्र आत्मा मेरे पर आई होर स्वर्गदूत मुंजो बियाबान जंगला मन्झ लई गया। तेबे मैं एक जन्नानी देखी जो लाल रंगा रे राक्सा रे गास बैठी किन्हें सुआरी करी करही थी। होर जेसरे सात मूंड होर दस सींग थे, जेसरे सरीरा पर परमेसरा रे निंदा करणे रे नाऊँ लिखिरे थे।

⁴तेस्से ज्नाने बैंगनी होर लाल रंगा रे कपड़े पैहनीरे थे, होर तेस्से आपणे आपा जो सोने रे जेवर होर अनमोल पात्थर होर मैन्हगे मोतिया किन्हें सजाई किन्हें रखीरा था। होर तेस्से आपणे सीधे हाथा मन्झ एक सोने रा डोंगा लेईरा था, जो तेस्सा रे बुरी कामा किन्हें होर व्यभिचारा री दुस्ट चीजा किन्हें भरीरा था।

⁵होर तेस्सा रे माथे पर एक लकोई रे मतलबा वाल़ा नांऊँ लिखिरा था। तिन्हें बोल्या, “हांऊँ बडा बाबेल सैहर आ, होर हांऊँ धरती री सभ वेस्या री, होर दुस्ट चीजा री माऊ ई।”

⁶होर मैं देख्या कि से परमेसरा रे पवित्र लोका रा खून पी किन्हें मुताली गईरी थी, जिन्हा जो लोके यीसू मसीह पर भरोसा रखणे री वजहा ले मारी दितिरा था। होर हांऊँ तेस्सा जो देखी किन्हें बड़ा हरान हुई गया।

⁷तिन्हें स्वर्गदूते मेरे किन्हें बोल्या, “तू हरान मत हो। हांऊँ एस्सा ज्नानिया रा होर तेस राक्सा रा जेस पर से सुआर आ, होर जेसरे सात मूंड होर दस सींग ऐं, तेता री ल्कोईरी गल हांऊँ तुजो दस्हा।

⁸जो राक्स तैं देख्या, ये पैहले ता जिउंदा था, पर ऐबे जिउंदा नी आ। से डुगहे गड्ढे ले निकल्ने वाल़ा आ, होर परमेसरा तेसरा नास करी देणा। होर धरती रे रैहणे वाले जिन्हा लोका रे नांऊँ संसारा जो रचणे ले पैहले ले ही जिन्दगी री कताबा मन्झ नी लिखिरे, तिन्हा सभिया एस राक्सा जो दबारा जिउंदे देखी किन्हें हरान हूंणां।”

⁹“एस्सा गल्ला जो समझणे रे कठे ज्ञाना री जरूरत ई कि, राक्सा रे सात मूंड तेस सैहरा रे सात पहाड़[47] जो दसे, जेता पर से ज्नाने बैठी किन्हें राज करी करही।

¹⁰होर ये सात राजेया जो होर तिन्हारे राजा जो भी दसे। तिन्हा मन्झ पांज ता मरी चुकिरे, होर तिन्हा मन्झा ले छठुआं राजा हाले राज करी करहा, होर आखरी वाल़ा राजा हली तक नी आईरा। होर जेबे तेस आऊंणा, ता कुछ टैम तक ही तेस राज करणा।

¹¹होर जो राक्सा बौह्त पैहले जिउंदा था, होर पर ऐबे नी हाया, से ही आठुआ राजा। पर से आठुआ राजा तिन्हा साता मन्झा ले कोई एक हूंणा, होर आखरी मन्झ तेस राजे रा नास पक्का हूंणा।”

¹²“होर जो दस सींग तैं पैहले देखे थे तिन्हा दस राजेया जो दसाहें, जिन्हें हली तक राज करणा सुर्हू नी कितिरा। तिन्हा दस राजेया जो तेस राक्सा साउगी राज करणे रा हक दितिरा, पर तिन्हा सिर्फ एक घंटे तक ही राज करणा।

¹³इन्हा सभी राजेया एक ही काम करणे रे कठे राजी हूंणा, होर तिन्हा आपणी-आपणी सामर्थ होर हक तेस राक्सा जो देई देणा।”

¹⁴“तिन्हा दस राजेया होर राक्सा छेलू साउगी युद्ध करणा। पर छेलूआ होर तेसरे साथीया स्यों हराई देणे, क्यूंकि छेलु राजेया रा राजा, होर प्रभुआ रा प्रभु आ। तेसरे साथी स्यों जिन्हों परमेसरे चुणिरा होर सादिरे होर जो भरोसे रे लायक ऐं।”

¹⁵फेरी स्वर्गदूते मेरे किन्हें बोल्या कि, “जो बौह्त सारे पाणीया तैं देखया, जिन्हा पर वेस्या बैठिरी। से तिन्हा सभी लोका जो दसां, जो लग-लग देसा रे, होर हर कुला रे, होर हर जातिया रे, होर लग-लग भासा बोलणे वाले लोक ऐं।

¹⁶से टैम आऊंणा जेबे से राक्स होर जो दस सींग यानि दस राजे जो तेसरे साउगी ऐं, तिन्हा तेस्सा वेस्या किन्हें नफरत करणी, जो तेस पर बैठीरी। तिन्हा तेस पर वार करणा होर से नांगा करी देणा, होर तेसरे मासा रा कुछ हिस्सा खाई देणा, होर बाकि आगी मन्झ फुकी देणा।

¹⁷होर से ज्नाने, जो तैं देखी, ये से महान सैहर जो धरती रे सभ राजेया पर राज करही। तेस्सा किन्हें ये सभ कुछ इधी कठे हुआ, क्यूंकि परमेसरे ही तिन्हारे मना जो आपणे मकसदा जो पूरा करणे रे कठे बदली रा, होर एस वजहा ले जेबे तक परमेसरे जो बोलिरा, से पूरा नी हो, इन्हें सभिये राजे आपणा हक राक्सा जो देई दितिरा था।”