Read Mandeali प्रकासना री गल्ला 19 Bible Online

प्रकासना री गल्ला 19 - Mandeali bible

प्रकासना री गल्ला 19

¹सामर्थी स्वर्गदुता री गल्ला करणे रे बाद स्वर्गा मन्झ मैं बौह्त सारे लोका री गाणा गाणे साहीं अवाजा सुणी, जो ये गाई करहे थे, “हालेलूय्याह![48] आस्सा रे परमेसरा री महिमा हो, से सामर्थी आ, होर आस्सा रा उद्धार करहा।

²तेसरी बढ़ाई करहा, क्यूंकि से सही होर सच्चा न्याय करहा, तिन्हें तेस बड़े सैहरा जो सजा दिती जो बड़ी वेस्या साहीं आ, क्यूंकि तिन्हें संसारा रे लोका जो भरमाया कि स्यों पाप करहे, परमेसरे तेस ले तेसरे बुरे कामा रा बदला लितेया, क्यूंकि तिन्हें परमेसरा रे सेऊआदारा जो मारी दितिरा था।”

³फेरी तिन्हें दूजी बारी गाया, “हालेलूय्याह! से आगी रा धुँआ जो तेस्सा वेस्या जो नास करा से कधी नी बुझणा।”

⁴तेबे चौबी अगुवे होर चारो प्राणिये राजगद्दी पर बैठिरे परमेसरा रे पैरा पर पई किन्हें तेसरी अराधना किती। तिन्हें बोल्या, “आमीन, हाल्लेलूयाह!”

⁵फेरी मैं राजगद्दी मन्झा ले केसी जो ये बोलदे हुए सुणेया कि, “तुस्से जो आस्सा रे परमेसरा रे सेऊआदार ऐं, होर तेसरा डर मन्हें, क्या छोटे क्या बडे, सभ तेसरी बड़ाई करा।”

⁶फेरी मैं एह्ड़ी अवाज सुणी जो बौह्त लोका रे चिंगणे वाली अवाज साहीं थी, होर तिन्हारी अवाज बौह्त तेज चलने वाली समुद्रा री लैहरा री अवाज साहीं होर बादला री गर्जना साहीं बड़ी भारी थी। मैं तिन्हो ये गांदे हुए सुणेया, “हाल्लेलूयाह! परमेसर आस्सा रा प्रभु सर्वसक्तिमान आ होर सभ लोका पर राज करहा।

⁷आऊआ, आस्से खुस होर मग्न हो, होर तेसरी बढ़ाई करो, क्यूंकि से जो छेलू आ तेसरा ब्याह हूंणे वाली होर तेसरी लाड़ीये (तेस पर विस्वास करणे वाले लोका जो) आपणे आपा जो सजाई किन्हें तेसरे कठे त्यार करी लईरा।

⁸होर तेस्सा जो चमकदार होर मलमल रे कपड़े पैन्ह्णे जो दितिरे, जो पवित्र होर सुद्ध ऐं; होर छेलुए दितिरे।” क्यूंकि ये परमेसरा रे पवित्र लोका रे भले कामा रे प्रतीक ऐं।

⁹होर तेबे स्वर्गदूते मेरे किन्हें बोल्या, “ये लिख: कि धन्य ऐं स्यों, जो छेलू रे ब्याहा जो मनाणे री धामा मन्झ सादे गईरे।” फेरी तिन्हें मेरे किन्हें बोल्या, “ये बचन परमेसरा री वखा ले आईरे सच्चे बचन ऐं।”

¹⁰होर जेबे मैं ये सुणेया ता जो मेरे किन्हें ये गल्ला करी करहा था, हांऊँ तेसरे पैरा पर पई किन्हें तेसरी अराधना करणे ही वाल़ा था। पर तिन्हें मेरे किन्हें बोल्या, “देख, एह्ड़ा मत कर, सिर्फ परमेसरा री ही अराधना कर। क्यूंकि हांऊँ तुस्सा साहीं होर तुस्सा रे सभ विस्वासी भाई बैहणा साहीं परमेसरा रा एक सेऊआदार आ। जिन्हारी एक ई गुआही कि यीसू ही तिन्हारा प्रभु आ।” यीसूए जो ये सच्च जाहिर कितिरा से ही लोका जो परमेसरा री खबरा री भविस्यवाणी करणे री सामर्थ देहां।

¹¹फेरी मैं स्वर्गा जो खुलिरा देख्या, होर तेथी मेरे साम्हणें एक चिटा घोड़ा था। होर जो तेस पर एक सुआर था, तेस जो भरोसे रे लायक, होर सच्चा बोल्या जाहाँ था। से धार्मिकता किन्हें आपणे दुसमना रा न्याय करहा होर तिन्हारे बरखलाफ युद्ध करहा।

¹²होर तेसरी हाखिया आगी री लपटा साहीं चमकी करहा ई थी, होर तेसरे मूंडा पर बौह्त सारे राज ताज थे। होर तेसरे सरीरा पर एक नांऊँ लिखिरा था, जेसरा मतलब तेस जो छाडी किन्हें होर कोई नी जाणदा था।

¹³होर तिन्हें सुआरे खूना मन्झ डबोई रे कपड़े पैहनीरे थे, होर तेसरा नांऊँआ, परमेसरा रा बचन।

¹⁴होर स्वर्गा री सेना तेसरे पीछे-पीछे जाई करहा ई थी स्यों भी चिटे घोड़े पर सुआर थी, तिन्हें चिटे मलमल रे कपड़े पैन्ही रे थे जेता मन्झ कोई दाग नी था।

¹⁵तेसरे मुंहा ले एक पैन्नी तलवार निकला ई, जेता ले तेस सारे जाति-जातिया रे लोक हराणे, होर तेस लोहे रे राजदंडा किन्हें तिन्हा पर राज करणा। तेस सर्वसक्तिमान परमेसरा रा भयानक गुस्सा जाहिर करणा, जिहां अंगूरा रा रस तेसरे गड्ढे मन्झ जुक्की किन्हें काढी जाहाँ।

¹⁶होर तेसरे कपड़े होर सीधी जाँघा पर जो नांऊँ लिखिरा, से ये आ: “राजेया रा राजा होर प्रभुआ रा प्रभु।”

¹⁷फेरी मैं एक स्वर्गदूता जो सूरजा पर खड़ीरे देख्या, होर तिन्हें उच्ची अवाजा मन्झ पुकारी किन्हें आसमाना रे बौह्त गास उडणे वाले सभ मास खाणे वाले चिड़ुआ किन्हें बोल्या, “आऊआ परमेसरा री बडी (मास वाली धाम) धामा मन्झ कट्ठे हुई जाऊआ।

¹⁸तुस्से आऊआ होर राजेया री, होर सेना रे अधिकारिया री, होर ताकतवर स्पाहीया री, होर घोड़े रा होर तिन्हारे सुआरी री ल्हासा रा मास खाऊआ। होर क्या अजाद, क्या गुलाम, क्या छोटे, क्या बडे, तुस्से केसी भी मरिरे रा मास खाई सके।”

¹⁹फेरी मैं तेस राक्सा जो देखेया जो समुद्रा ले निकली किन्हें आईरा था, होर तेसरे साउगी धरती रे राजे होर तिन्हारी सेना भी थी। स्यों चिटे घोड़े पर बैठीरे सुआर होर तेसरी सेना रे बरखलाफ लड़ने रे कठे आईरे थे।

²⁰होर से पैहला राक्स होर तेस साउगी से दूजा राक्स जो झूठे भविस्यवाणी करहा, पखड़ी गया। एस झूठे भविस्यवाणी करणे वाले तेस राक्सा री जगहा चिन्ह दसे, होर स्यों सभ लोक भरमाए कि से सभ लोक तेसरी अराधना करहे, जिन्हें आपणे माथे पर तेसरी छाप लगाई री थी, होर तेसरी मूर्ति री अराधना कितिरी थी। स्यों दुहें जिन्दे जी आगा री झीला मन्झ पाई दिते, जो हमेसा गन्धका किन्हें भख्दी रही।

²¹तेबे तेस चिटे घोड़े री सुआरे सभी जो तलवारा किन्हें मारी दितेया जो तेसरे मुंहा ले निकला ई थी। तेबे आसमाना रे मास खाणे वाले चिड़ुए तिन्हारी ल्हासा रा मास तेबे तक खांदे रहे जेबे तक स्यों रजी नी गये।