Read Mandeali प्रकासना री गल्ला 20 Bible Online

प्रकासना री गल्ला 20 - Mandeali bible

प्रकासना री गल्ला 20

¹फेरी मैं एक स्वर्गदूत स्वर्गा ले उतरदे देख्या; जेसरे हाथा मन्झ डुगहे गड्ढे री चाबी, होर एक बडी जंजीर थी।

²होर तिन्हें तेस अजगरा जो, यानि पुराणे सांपा जो, जेसरा नाऊँ सैतान भी आ, पकड़ी लेया। होर से बान्ही किन्हें डुगहे गड्ढे मन्झ डयाई दितेया, होर दुराजा बंद करी दितेया होर तेस पर मोहर ल्गाई दिती, ताकि हज़ार साल पुरे हूंणे तक से जाति-जातिया रे लोका जो दबारा नी भड़काई सके। होर जेबे से टैम खत्म हुई जाणा, ता तेस जो थोह्ड़ी देरा रे कठे अजाद करी दितेया जाए।

⁴फेरी मैं कुछ राजगद्दिया देखी, जिन्हा पर स्यों लोक बैठिरे थे, जिन्हारा मूंड यीसू मसीह रे बारे मन्झ खबर होर परमेसरा रे बचना सुनाणे री वजहा ले काटे गईरे थे। होर इन्हें लोके तेस राक्सा री, होर ना तेसरी मूर्ति री अराधना कितिरी थी, होर तिन्हें तेस राक्सा री छाप आपणे माथे होर आपणे हाथा पर लगाई री थी। स्यों मरिरे मन्झ ले जिउंदे हुई किन्हें राजगद्दिया पर बैठी गये। परमेसरे तिन्हो राज करणे रा हक दितेया, होर तिन्हें मसीह साउगी हज़ार साला तक राज कितेया।

⁵मरिरे मन्झ ले जिउंदे हूंणे वाले ये सभी ले पैहले थे, होर स्यों बौह्त ही ज्यादा पवित्र होर धन्य ऐं। होर तिन्हा पर दूजी मौता रा कोई हक नी आ। तिन्हा परमेसरा होर मसीह रे कठे याजक हूंणे, होर तिन्हा साउगी हज़ार साल तक राज करणा। होर हज़ार साल पुरे हूंणे तक कोई भी मरिरे लोक दबारा जिउंदे नी हुए।

⁷होर जेबे हज़ार साल पुरे हुई जाणे, ता सैतान कैदा ले अजाद कितेया जाणा।

⁸तेस देस-देसा रे लोका जो भरमाणे रे कठे बाहर निकलणा जो पुरे संसारा मन्झ फैलीरे। होर स्यों इन्हा देसा जो गोग होर मागोग बोल्हे, जिन्हारे बारे मन्झ यहेजकेल नबिये बोलिरा था। सैताना स्यों सभ तेस जगहा कट्ठे करणे जेथी तिन्हा सभिया लड़ाई करणी। होर तेस किन्हें बौह्त सारे लोक हूंणे जिन्हारी गिणती समुद्रा रे रेते बराबर हूणीं, जिन्हों कोई गिणी नी सकदा।[49]

⁹सैताना री सेना निकली किन्हें धरती रे हर जगहा पर गई, होर तिन्हें से सैहर घेरेया जेस किन्हें परमेसर प्यार करहा, जेथी तेसरे लोक रहे थे। पर स्वर्गा ले परमेसरा री वखा ले आग उतरी होर सारी सेना जो फुखी किन्हें नास करी दितेया।

¹⁰होर तिन्हारा भरमाणे वाल़ा सैतान जो भी आगा री झीला मन्झ पाई दितेया जाणा, जो हमेसा गन्धका किन्हें भख्दी रही। तेथी तेस साउगी राक्स होर से झूठी भविष्यवाणी करणे वाल़ा भी हूंणां, होर तिन्हा राती ध्याड़ी जुग-जुग रे कठे पीड़ा मन्झ तड़फदे रैहणां।

¹¹तेता ले बाद एक बड़ी चिटी राजगद्दी देखी, जेस पर परमेसर बैठिरा था, पर तेस जगहा ले धरती होर आसमान[50] गायब हुई गये, होर फेरी स्यों केसिए दबारा नी देखे।

¹²फेरी मैं क्या छोटे बडे सभ मरिरे लोका तेस राजगद्दी रे साम्हणें खड़ीरे देख्या। स्यों लोक जो पाणी मन्झ डूबी किन्हें मरिरे थे, होर स्यों मरिरे जो कब्रा मन्झ पईरे थे, होर स्यों लोक जो पताल लोक मन्झ थे, जेथी मरिरे रैंहयां ऐं, स्यों सभ तेस राजगद्दी साम्हणें खड़ी गये। होर कताबे खोल्ही गई जेता मन्झ जिन्दगी री कताब भी थी, होर तेस कताबा मन्झ लिखिरे मताबक होर तिन्हारे कितिरे कामा रे मताबक सभ मरिरे लोका रा न्याय कितेया गया। तिन्हा सभीरा न्याय तिन्हारे कामा रे मताबक कितेया गया।

¹⁴होर तिन्हा सभी जो जिन्हारा नांऊँ जिन्दगी री कताबा मन्झ नी लिखिरा था, तेस जो आगा रे झीला मन्झ पाई दितेया गया। फेरी तेता ले बाद ऐबे आगे मौत नी रही होर ना ही पताल लोक रहा जेथी मरिरे लोका रहे, क्यूंकि स्यों सभ लोक जिन्हारा नाऊँ जिन्दगी री कताबा मन्झ नी लिखिरा था तिन्हो पैहले ले ही आगा रे झीला मन्झ पाई दितेया गया। होर एता जो ई दूजी मौत बोल्या जाहाँ, जो कि आगी री झीला मन्झ मिलणे वाली सजा ई।