Read Mandeali प्रकासना री गल्ला 21 Bible Online

प्रकासना री गल्ला 21 - Mandeali bible

प्रकासना री गल्ला 21

¹फेरी मैं नंऊँआं आसमान होर नौंईं धरती देखी, क्यूंकि पैहला आसमान होर पैहली धरती नी रही, होर समुद्र भी नी रैंहयां।

²फेरी मैं पवित्र सैहर नंऊँआं यरुस्लेम, स्वर्गा ले परमेसरा वाले उतरदे देख्या। होर से तेस्सा नौंईं लाड़ीया साहीं था, जिहां जे से आपणे नंऊँऐं लाड़े रे कठे सजी री हो, होर तेस किन्हें ब्याह करणे रे कठे त्यार हुई गईरी हो।

³फेरी मैं परमेसरा री राजगद्दी मन्झा ले केसी जो उच्ची अवाजा मन्झ ये बोल्दे सुणेया कि, “सुण! ऐबे ले परमेसरा रे रैहणे री जगहा माह्णुंआं रे बीचा मन्झ हुआ करणी, होर तेस तिन्हा साउगी रैहणां, होर स्यों तेसरे लोक हूंणे। होर परमेसरा आपु तिन्हा जो आपणे लोक बोलणा, होर तिन्हा साउगी रैहणां, होर तिन्हा भी से आपणा परमेसर मनणा।

⁴होर तेस तिन्हारी हाखिया ले सभ आंसू पुन्झी देणे। होर एता ले बाद मौत नी रैहणीं, होर ना दुःख, होर ना रोणा होर ना पीड़ा रैहणीं। क्यूंकि पैहले री धरती ऐबे नी रही।”

⁵होर जो राजगद्दी पर बैठिरा था, तिन्हें बोल्या, “ऐबे हांऊँ सभ कुछ नंऊँआं बनाई करहा।” फेरी तिन्हें बोल्या कि, “जो कुछ मैं बोल्या तेता जो लिखी ले, क्यूंकि मेरे ये बचन भरोसे रे लायक होर सच्चे ऐं।”

⁶फेरी तिन्हें मेरे किन्हें बोल्या, “सभ गल्ला पूरी हुई गईरी। हांऊँ अल्फा होर ओमेगा यानि सुर्हूआत होर अंत हांऊँ ई आं। जो भी सोखा तेस जो मां हमेसा री जिन्दगी देणे वाले पाणी रे सोते मन्झा ले मुफ्त पयाणा।

⁷जो लोक जीत हासिल करहे, तिन्हा इन्हा सभी आसिसा रे वारस हूंणां: मां तिन्हारा परमेसर हूंणां, होर तिन्हा मेरे लोक (बच्चे ) हूंणां।

⁸पर जो मेरे पर विस्वास नी रखदे, स्यों तेस आगी री झीला मन्झ पाई देणे जो गन्धका किन्हें भख्दी रैंहयां ई, जो कि दूजी मौत ई। होर तिहां ही सभ लोक, जो दूजेया रे साम्हणें मुंजो मनणे ले डरे, होर बुरे काम होर खून करहे। जो व्यभिचारी ऐं होर जादू टोणा करहे, होर मूर्तिया री अराधना करहे; होर झूठ बोल्हे, तेस आगी री झीला मन्झ पाई देणे।”

⁹फेरी सात स्वर्गदूता मन्झा ले जिन्हें आपणे-आपणे डोंगें मन्झ सात आखरी कैहर भरी किन्हें धरती रे लोका पर डयाई दिति। तिन्हा मन्झा ले एकिये मेरे वाले आई किन्हें बोल्या, “एथी आऊ, मां तुजो से नौंईं लाड़ी दसणी, जेस्सा रा ब्याह छेलू किन्हें हूंणे वाल़ा।”

¹⁰होर पवित्र आत्मा मेरे पर आई गई, होर तेस सामर्था रे ज्रीए एक मुंजो एक बडे होर उच्चे प्हाड़ा पर पुजाई दितेया, फेरी मुंजो पवित्र सैहर नंऊँआं यरुस्लेम, स्वर्गा ले परमेसरा वाले उतरदे हुए दसेया।

¹¹होर परमेसरा री महिमा ले से सैहर चमकी करहा था; जेसरी चमक कीमती पात्थर यसब साहीं थी, जो सीसे साहीं साफ था।

¹²होर तेस सैहरा रे चारों वखा जो बडी होर उची कान्धा थी, होर तेस्सा कान्धा रे बारा दुराजे थे, होर हर दुराजे पर एक-एक स्वर्गदूत बठाई रे थे। होर तिन्हा दुराजे पर इस्राएल देसा रे बारा गोत्रा रे नांऊँ लिखिरे थे।

¹³होर सैहरा रे चारों वखा जो तीन-तीन दुराजे थे: पूर्व दिसा वखा जो तीन दुराजे, उत्तर दिसा वखा जो तीन दुराजे, दक्षिण दिसा वखा जो तीन दुराजे, होर पस्चिम दिसा वखा जो तीन दुराजे थे।

¹⁴होर सैहरा री कान्धा री नींऊँआं बारा पात्थरा पर टिकिरी थी। होर हर एक पात्थरा पर छेलू रे बारा चुणिरे चेले रे नांऊँ एक-एक करी किन्हें लिखीरे थे।

¹⁵होर जो स्वर्गदूत मेरे साउगी गल्ला करेया करहा था, तेस वाले तेस सैहरा जो, होर तेसरे दुराजे जो, होर तेसरी कान्धा जो नापणे रे कठे एक सोने री छटी थी।

¹⁶होर से सैहरा वर्गाकार रूपा मन्झ था, जेसरी चारों पासे एक बराबर थे होर स्वर्गदूते आपणी नापणे री छटी किन्हें से सैहर नापेया: तेता री लम्बाई 2,220 किलोमीटरा री थी। होर तेसरी चौड़ाई होर उचाई भी तेसरी लम्बाई रे बराबर थी।

¹⁷होर स्वर्गदूते सैहरा री कान्धा री उचाई नापी जिहां माह्णुं नाप्हा ऐ। से तेस कान्धा री उचाई छयाट मीटर थी।

¹⁸होर सैहरा री कान्ध कीमती पात्थर यसबा री बणीरी थी, होर सैहर सुद्ध सोने रा बणीरा था, जो सीसे साहीं साफ था।

¹⁹होर तेस सैहरा री कान्धा री निंऊँआं बारा हर किस्मा रे कीमती पात्थरा किन्हें सजाई किन्हें बणाईरी थी, पैहली नींऊ यसबा री थी, दूजी नीलमणि री, होर त्रीजी लालड़ी री, चौथी मरकता री थी।

²⁰होर पान्जुहीं नींऊ गोमेदका री बणीरी थी, छठवीं माणिक्य री, सातवीं पीतमणी री, आठवीं पेरोजा री, नौंही पुखराजा री, दसवीं लहसनिया री, ग्याहरुहीं धुम्रकांता री, होर बारुहीं नींऊ कीमती पात्थर याकुता री बणीरी थी।

²¹होर बारा दुराजे भी बारा मोतिया रे बणिरे थे, एक-एक दुराजा एक-एक मोतिया रा बणीरा था। होर सैहरा री गलिया सुद्ध सोने री बणीरी थी, जो साफ सीसे साहीं थी।

²²होर मैं तेस सैहरा कोई मन्दर नी देख्या, क्यूंकि सर्वसक्तिमान प्रभु परमेसर, होर छेलू तेस ई सैहरा मन्झ थे, इधी कठे तेथी मन्दरा री जरूरत नी।

²³होर तेस सैहरा मन्झ सूरज होर चाँदनी रे प्रयासे ज्रूरत नी थी, क्यूंकि परमेसरा री महिमा तेस सैहरा जो प्रयासा करही, होर छेलू भी दिऊये साहीं तेस सैहरा जो चमका।

²⁴तेस सैहरा री चमक एस धरती रे जाति-जातिया रे लोका जो प्रयासा देहीं, होर धरती रे सारे राजे आपणी-आपणी सान री चीजा एस सैहरा मन्झ लई आऊणीं।

²⁵होर तेसरे सैहरा रे दुराजे कधी बंद नी रैंहणें, स्यों हमेसा खुली रैहणे, क्यूंकि तेथी कधी रात नी हूणीं।

²⁶होर एस धरती रे जाति-जातिया रे लोका भी आपणी-आपणी साना री चीजा एस सैहरा मन्झ लई आऊणीं।

²⁷होर तेस सैहरा मन्झ कोई असुद्ध चीज या दुस्ट काम करणे वाल़ा, या झूठ बोलणे वाल़ा, तेस मन्झ दाखल नी हुई पाणा। पर सिर्फ तिन्हा लोका ही दाखल हूंणा, जिन्हारा नांऊँ छेलू री जिन्दगी री कताबा मन्झ लिखिरे।