Read Mandeali प्रकासना री गल्ला 22 Bible Online

प्रकासना री गल्ला 22 - Mandeali bible

प्रकासना री गल्ला 22

¹फेरी स्वर्गदूते मुंजो जिन्दगी देणे वाले पाणी री नदी दसी, जो सीसे साहीं साफ थी, होर से पाणी परमेसरा री राजगद्दी ले निकला था जो छेलू री भी राजगद्दी थी,

²ये नदी सैहरा री गलिया रे बीचो बीच जाहीं थी। होर तेस नदी रे दुहें कनारे पर जिन्दगी देणे वाल़ा डाल लगिरा था, होर तेस डाला मन्झ बारा किस्मा रे फल लगिरे थे; होर से डाल हर म्हीने लग-लग किस्मा रे फल देहां था। होर तेस डाला रे पातर धरती पर रैहणे वाले जाति-जाति रे लोका जो भले चंगे रखणे री दुआई।

³परमेसरा ले स्रापित कोई चीज तेस सैहरा मन्झ नी हूंणां। परमेसर होर छेलू री राजगद्दी तेस सैहरा मन्झ हूणीं, होर परमेसरा रे सेऊआदारा तेसरी अराधना करणी।

⁴होर तिन्हा परमेसर आम्हणें-साम्हणें देखणा, होर तेसरा नांऊँ तिन्हारे माथे पर लिखिरा हूंणां।

⁵होर फेरी तेथी कधी कोई रात नी हूणीं। होर तेस सैहरा मन्झ सूरज होर दिऊये रे प्रयासे ज्रूरत नी हूणीं, क्यूंकि प्रभु परमेसरा तिन्हा जो प्रयासा देणा। होर ये लोक जो तेथी रहे तिन्हा जुग-जुग राज करणा।

⁶तेता ले बाद स्वर्गदूते मेरे किन्हें बोल्या कि, “जो गल्ला तुस्सा किन्हें बोलिरी, स्यों भरोसे रे लायक, होर सच्ची ई। प्रभु परमेसर जिन्हें आपणी आत्मा सभी नबिया जो दितिरी, तिन्हें ही आपणे स्वर्गदूता जो एथी आऊणें रे कठे आदेस दितेया कि, आपणे सेऊआदारा जो स्यों गल्ला दसे। जिन्हारा बौह्त जल्दी पूरा हूंणां जरूरी आ।”

⁷“सुण, हांऊँ जल्दी आऊणें वाल़ा आ। धन्य ऐं स्यों, जो एस कताबा मन्झ लिखिरी भविस्यवाणी री गल्ला जो मन्हां ऐं।”

⁸हांऊँ सेई यहून्ना आ, जो ये गल्ला सुणहां, होर देख्हा था। होर जेबे मैं ये गल्ला सुणी होर देखी, ता हांऊँ अराधना करणे रे कठे तेस स्वर्गदूत रे पैरा मन्झ पई गया, जो मुंजो ये गल्ला दस्हा करहा था।

⁹होर तिन्हें मेरे किन्हें बोल्या, “देख, एह्ड़ा मत कर, सिर्फ परमेसरा री ही अराधना कर। क्यूंकि हांऊँ भी तेरे साहीं होर तुस्सा रे सभ विस्वासी भाई बैहणा साहीं आ; जो भविष्यवाणी करहे, होर एस कताबा मन्झ लिखिरी भविष्यवाणी री गल्ला मनणे वाले सभ लोका साहीं परमेसरा रा एक सेऊआदार आ।”

¹⁰तिन्हें मेरे किन्हें दबारा बोल्या, “एस कताबा मन्झ लिखिरी भविस्यवाणी री गल्ला जो लकोई किन्हें मत रख, क्यूंकि इन्हा गल्ला रा पूरा हूंणे रा टैम नेडे आई गईरा।

¹¹होर इधी कठे जो लोक बुरे काम करहे, स्यों बुरे काम करदे रहे; होर जो नीच काम करहे, स्यों नीच काम करदे रहे। होर जो धर्मी आ, से धार्मिकता रे काम करदा रहे; होर जो पवित्र आ, से पवित्र बणा रहे।”

¹²तेबे प्रभु यीसूए बोल्या, हांऊँ जल्दी आऊणें वाल़ा आ! होर हर लोका जो तिन्हारे कामा रे मताबक इनाम देणे रे कठे या सजा देणे रे कठे आई करहा।

¹³“हांऊँ अल्फा होर ओमेगा यानि सुर्हूआत होर अंत होर पैहला होर आखरी भी हांऊँ ई आं।”

¹⁴धन्य ऐं स्यों, जो आपणे कपड़े धोई लैहां ऐं, क्यूंकि तिन्हा जो दुराजे ले हुई किन्हें सैहरा मन्झ दाखल हूंणे रा हक मिलणा। होर तिन्हा जो जिन्दगी देणे वाले डाला ले फल खाणे रा भी हक मिलणा।

¹⁵पर कुत्ते साहीं अपवित्र लोक, होर जादू टोणा करणे वाले, होर व्यभिचार करणे वाले, होर हत्या करणे वाले लोक, होर मूर्तिया री अराधना करणे वाले लोक, होर हरेक लोक जो झूठ बोलणा पसंद करहे, तिन्हा सभिया एस सैहरा ले बाहर रैहणां।

¹⁶“मैं यीसू आ, होर मैं आपणे स्वर्गदूत इधी कठे भेजे कि, स्यों तुस्सा सभी जो कलीसिया रे लोका रे कठे ये गल्ला बोली सके। हांऊँ राजा दाऊदा रा बंस आ, होर हांऊँ तेज चमकणे वाल़ा भ्यागा रा तारा आ।”

¹⁷होर परमेसर री आत्मा, होर छेलु री नौंईं लाड़ी यीसू किन्हें बोल्हा ई कि, “आऊआ!” होर जो भी इन्हा गल्ला जो सुणी करहा से भी बोले कि, “आऊआ!” होर जो सोखा हो, से आये, होर जिन्दगी देणे रा पाणी मुफ्ता मन्झ पीये।

¹⁸हांऊँ यहून्ना चेतावनी देहां कि हर एक जो एस कताबा मन्झ लिखिरी भविस्यवाणी री गल्ला सुणहां, अगर तुस्सा मन्झ ले कोई माह्णुं एस कताबा मन्झ लिखिरी गल्ला मन्झ कुछ बढ़ाए, ता परमेसरा भी एस कताबा मन्झ लिखिरी विपत्तिया जो देई किन्हें तुस्सा री सजा बढ़ाणी।

¹⁹होर अगर तुस्सा मन्झ ले कोई एस भविस्यवाणी री कताबा मन्झ लिखिरी गल्ला मन्झा ले कुछ काढी दे, ता परमेसरा तेस जो एस कताबा मन्झ लिखिरी आसिसा नी देणी; यानि पवित्र सैहरा मन्झा दाखल हूंणे रा हक नी देणा, होर जिन्दगी देणे वाले डाला ले फल खाणे रा भी हक नी देणा।

²⁰यीसू ही इन्हा गल्ला री गुआही देहां कि यूयाँ ऐं गल्ला सच्ची। से ये बोल्हा कि, “हां, हांऊँ जल्दी आऊणें वाल़ा आ!” तेबे मैं यहून्ने जबाब दितेया, आमीन, हे प्रभु यीसू आ!

²¹हांऊँ प्रार्थना करहा कि प्रभु यीसू सभ परमेसरा रे पवित्र लोका जो आपणा अनुग्रह देंदा रहे। आमीन।