Read Mandeali प्रकासना री गल्ला 3 Bible Online

प्रकासना री गल्ला 3 - Mandeali bible

प्रकासना री गल्ला 3

¹तिन्हें मेरे किन्हें ये बोल्या कि, “सरदीस सैहरा री कलीसिया रे दूत जो ये संदेस लिख कि: हांऊँ ई आ जेस वाले परमेसरा री सात आत्मा ई होर जिन्हें आपणे हाथा मन्झ सात तारे लितिरे। हांऊँ तुस्सा किन्हें ये बोल्हा कि: हांऊँ जाणहां कि तू क्या काम करहा, होर तुस्से मेरे पर आपणे विस्वासा जो लेई किन्हें जिउंदे ता सूझा, पर मेरा हुक्म नी मनणे री वजहा ले असली मन्झ तुस्से मरी गईरे।”

²इधी कठे, “जागी जाऊआ, होर मेरे पर जो विस्वास हाल्ले भी तुस्सा रा बचिरा तेस विस्वासा जो खत्म हूंणे रे पैहले आपणे विस्वासा जो मजबूत करहा। क्यूंकि मैं तेरे केसी भी कामा जो आपणे परमेसरा री नजरा मन्झ पूरा नी पाया।

³इधी कठे तिन्हा उपदेसा जो याद करा, जो तुस्से सभी ले पैहले सुणीरे थे, होर तिन्हा पर विस्वास कितेया था, होर पाप करणा छाडी देआ। होर अगर तुस्से त्यार नी रहे, ता तुस्सा जो तेस टैमा रा पता नी चलणा, जेबे मां तुस्सा जो सजा देणे रे कठे आई जाणा, क्यूंकि मां चोरा साहीं अचानक आई जाणा।

⁴पर हां, सरदीस सैहरा री कलीसिया मन्झ ऐबे भी कुछ एह्ड़े लोक ऐं, जिन्हें आपणे कपड़े पाप करी किन्हें गंदे नी किते, तिन्हा चिटे कपड़े पैन्ही किन्हें मेरे साउगी चलणा, क्यूंकि स्यों एस लायक ऐं।

⁵जो लोक जीत हासिल करहे, तिन्हों इंहां ई चिटे कपड़े पैहनाए जाणे, होर मां तिन्हारा नांऊँ जिन्दगी री कताबा[16] मन्झा ले कधी भी नी टाहणा। मां आपणे बापू होर तेसरे स्वर्गदूता रे साम्हणें ये बोलणा कि ये मेरे लोक ऐं।[17]

⁶जो मेरी गल्ला सुणदा लगीरा, से बड़े ध्याना किन्हें सुणें कि आत्मा कलीसिया किन्हें क्या बोल्हा।”

⁷तिन्हें मेरे किन्हें ये बोल्या, “होर फिलेदेलफिया सैहरा री कलीसिया रे दूत जो ये संदेस लिख कि: हांऊँ ई आ जो पवित्र होर सच्चा आ, होर जेस वाले राजा दाऊदा री चाबी। जेसरे खोलिरे जो कोई बंद नी करी सक्दा, होर बंद कितिरे जो कोई खोल्ही नी सक्दा। हांऊँ तुस्सा किन्हें ये बोल्हा कि:

⁸हांऊँ जाणहां कि तू क्या काम करहा, होर तेरी सामर्थ थोह्ड़ी ई, पर तैं मेरी गल्ला मन्ही री, होर जो विस्वास तेरा मेरे पर आ, से विस्वास तैं नी छाडेया। इधी कठे मैं तेरे साम्हणें एक दुराजा खोल्ही किन्हें रखिरा, जेस जो कोई बंद नी करी सक्दा।

⁹सुणा, मां सैताना रे मण्डली रे लोक, जो आपणे आपा जो परमेसरा रे चुणिरे लोक (यहूदी लोक) बोल्हे, पर स्यों हाये नी, स्यों झूठ बोल्हा ऐं, होर स्यों मां तेरे बसा मन्झ करी देणे। मां एह्ड़ा करणा कि तिन्हा आई किन्हें तेरे पैरा पर आपणा मूंड झुकाई देणा, होर तिन्हा ये जाणी लैणा कि, मैं तेरे किन्हें प्यार करहा।

¹⁰जेबे तुस्से दुखी थे ता तेता जो सबरा साउगी सहन करणे रे कठे तुस्से मेरी गल्ला जो मन्नेया, होर एस वजहा ले मां भी तू परीक्सा रे टैमा बचाई रखणा। ये परखणी रा टैम सभ संसारा रे लोका पर आऊंणा।

¹¹हाऊँ जल्दी तुस्सा वाले वापस आऊणें वाल़ा। मेरे पर तुस्सा रा जो विस्वास आ, तेता जो मजबूत बणाई किन्हें रखा, ताकि कोई भी तुस्सा रे जीता रे इनामा जो छिनी नी ले, जो ताजा साहीं आ।

¹²जो लोक जीत हासिल करहे। से मां आपणे परमेसरा रे मन्दरा मन्झ एक खम्भे साहीं बनाणा, होर तेस जो तेथी ले फेरी कधी बाहर नी निकल्ना पऊणा। होर मां तेस पर आपणे परमेसरा रा नांऊँ लिखणा (ये दसणे रे कठे कि से परमेसरा रा), होर परमेसरा रे सैहरा रा नाऊँ, जेस जो नंऊँआं यरुस्लेम बोले। ये सेई सैहर आ, जो परमेसरा री वखा ले स्वर्गा ले उतरणे वाल़ा आ। होर मां तेस पर आपणा नांऊँ भी लिखणा। (ये दसणे रे कठे कि से मेरा)[18]

¹³जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा।”

¹⁴फेरी तिन्हें मेरे किन्हें ये बोल्या कि, “लौदिकिया सैहरा री कलीसिया रे दूत जो ये संदेस लिख कि: हांऊँ ई आ जेस जो आमीन बोले, क्यूंकि हांऊँ भरोसे रे लायक आ, होर मैं परमेसरा रे बारे मन्झ गुआई देहां कि से सच्चा। हांऊँ ई आ जेसरे ज्रीए परमेसरे सारी सृस्टी री रचना किती। हांऊँ तुस्सा किन्हें ये बोल्हा कि:

¹⁵हांऊँ जाणहां कि तू क्या काम करहा, तू तेस पाणी साहीं आ, जो ना ता ठंडा आ होर ना गर्म। खरा हुन्दा कि तू ठंडा या गर्म हुन्दा यानि तू मुंजो पूरी तरहा ले मनदा या ता नी मनदा।

¹⁶इधी कठे कि तू गुणगुणा यानि तेरा मन मुंजो मनणे रे कठे डांवाडोल करी करहा, होर पाणी साहीं कधी ठंडा या गर्म हुई जाहाँ, इधी कठे हांऊँ तुजो पूरी तरहा ले छाडणे वाल़ा।

¹⁷तू सोच्हा कि हांऊँ अमीर आ, होर मेरे वाले सभ कुछ आ होर मुंजो केसी गल्ला री कमी नी ई। पर तू ये सच्चाई नी जाणदा कि, तू अभागा, बेकार होर गरीब होर काणा, होर नांगा आ।

¹⁸इधी कठे हांऊँ तुजो सलाह देहां कि, आगी मन्झ तपाईरा सोना मेरे ले खरीदी ले, ताकि तू सच्चे अमीर हुई जाए। होर चिटे कपड़े लई ले पैन्ही ले, ताकि आपणे नांगेपना री वजहा ले तू लोका रे साम्हणें सर्मिन्दा नी हो। होर आपणी हाखी मन्झ लगाणे रे कठे मेरे ले ये लेप भी लेई ले, ताकि तू देखी सके।

¹⁹हांऊँ जिन्हा जो प्यार करहा, तिन्हा सभी जो डांटहा होर सुधारी देहां, इधी कठे सही काम करणे रे कठे उत्साही बणा, होर गुणगुणे हूंणे साहीं आपणे पापा जो करणा छाडी दे।

²⁰सुणा! हांऊँ एक माह्णुं साहीं दुराजे वाले खड़ही किन्हें खटखटाया करहा, अगर कोई मेरी अवाज सुणी किन्हें दुराजा खोलगा, ता मां तेस वाले अंदर आई किन्हें खाणा, खाणा होर तेस मेरे साउगी।

²¹जो लोक जीत हासिल करहे, तिन्हा मेरे साउगी मेरी राजगद्दी पर बैठणा, जिहां हांऊँ भी जीत हासल करी किन्हें आपणे बापू साउगी बापू री राजगद्दी पर बैठी गया।

²²जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा।”