Read Mandinka 1 Musa 49 Bible Online

1 Musa 49 - Mandinka bible

1 Musa 49

¹Yaakuba ye a dinkewolu kumandi, a ko ì ye ko: Ali bee ye beŋ ñoo kaŋ, ŋa naa kuma fo ali ye, meŋ be ke la ali la siniŋ saama.

²Ali beŋ ñoo kaŋ, ali ye kumoo moyi, alitolu Yaakuba dinkewolu. Ali lamoyiri ke ali faamaa Isirayila la.

³Rubeni, ite le mu n diŋ foloo ti, n semboo, n semboo ye ite le foloo wuluu. Ñaaboo palaasoo be ite le bulu, aniŋ semboo.

⁴I be le komeŋ waamoo, moo te meŋ manankuŋ noo la. Bari i te tara la ñaaboo palaasoo to kotenke. Kaatu i ye laañooyaa tuluŋo ke i faamaa la laaraŋo le kaŋ, i ye n na laaraŋo kosondi.

⁵Simeyoni niŋ Lewi, ali baadimmaa fuloo! Ali la hawusaroolu* le mu fitinoo kelejooraŋolu ti.

⁶Allamaa n daa nene kana bula ali la feere sitoolu to. Allamaa n daa nene kana kafu ali la kafoo kono. Kabiriŋ ali kamfaata, ali ye moofaa le ke,[72] ali ye tuuraalu tonkoliŋ fasoolu kuntu tawunteeyaa kono.

⁷Dankoo ye laa ali kaŋ ali la kamfaa saŋaroo kamma la, aniŋ ali la jusu jawuyaa. Ali koomalankoolu be janjaŋ na Banisirayila, ì ye tara janjandiŋ a lasili doolu kono.

⁸Yahuuda, i faadiŋolu be ke la i tentulaa le ti, i la noo juloo le be tara la i jawoolu kaŋ, i faadiŋolu be naa le ka ñoyi i ñaatiliŋo la.

⁹Yahuuda, n dinkewo, ite ka muluŋ ne ko jatadiŋo, meŋ ka i baluu suboo la ka ke sembemaa ti. I ka i saba le, i ye i tiliŋ ko jatoo, ko jatamusoo, jumaa le be haañi la ka i maa?

¹⁰Yahuuda niŋ mansayaa te fata la ñoo ma, a koomalankoolu be tu la maraloo la le, fo janniŋ maralilaa kuntiyo faŋo be naa la, meŋ, duniyaa moolu la buuñaa be tara la a ye.

¹¹Ite Yahuuda, i be i la falimusoo siti la wayini* yiroo le bala, a diŋo ye tara sitiriŋ wayini yiribuloo bala. I be i la duŋ feŋo kuu la wayinoo le la, i ye i la waramboo kuu wayinoo la.

¹²I ñaakesoo le be faramansa la ka tambi wayinoo* la, i ñiŋo le be koyi la ka tambi keekewo la.

¹³Sebuluni, ite be sabati la baadaa le la, daameŋ be ke la tendaa ti kuluŋolu ye. I la bankoo naanewo be taa le fo Sidoni saatewo maafaŋo la.

¹⁴Isakari, ite be le ko fali sembemaa, ka i laa dunoo koto.

¹⁵I be a je la wo le to, dahaa diyaa mu meŋ ti, aniŋ bankoo niiseewoo mu meŋ ti. I ka i sañoo jimi dunoo le ye, i keta joŋo le ti ka foriseetoo dookuwo ke.

¹⁶Dani, ite be ke la maralilaa le ti i la moolu ye, ali be ke la ko Banisirayila lasili koteŋolu.

¹⁷Dani, i be ke la le ko sila batu saa, sirinka batu saa kunamaa, ka suwoo kiŋ a tonkoliŋo to, fo a borindilaa si boyi naŋ a koo la duuma.

¹⁸Yaawe*, m Maarii, m be lamoyiri ke kaŋ i la tankoo le la.

¹⁹Kadu, suŋ koorewolu le be ite boyinkaŋ na, bari i be ì kele la le, i ye ì bayi.

²⁰Aseri, neema be ke la i la senebankoo ye, i la domoroo be ke la mansakee domoroo le ti.

²¹Nafutali, i be ke la le ko minaŋo, meŋ maŋ tara maroo kono, ka diŋ kendoolu wuluu.

²²Yusufa, ite ka muluŋ ne ko yiri dinnaa, yiri dinnaa meŋ be woyoo daala. A buloolu be sele kaŋ sansaŋ baloo la.

²³Kalabeñetiyolu ye i kamfandi le, ka i buŋ ì la kalabeñoolu la ì la i koŋo kaŋ.

²⁴Bari i la kaloo tuta bambandiŋ ne, i buloo tariyaata, a bambanta. I semboo bota Yaakuba la Sembetii Baa le bulu, Isirayila Kantalaa, Isirayila la Bere baa.

²⁵Allamaa n na Alla ye i maakoyi. Allamaa Alla Tallaa neema la i ma. A ye neema ke i ye samaajiyo la ka bo santo, a ye neema ke i ye ka bo duuma. A ye neema ke i ye musu jiidilaalu la, aniŋ beeyaŋolu.

²⁶Nte, i faamaa, nte le la neemoo kuliyaata n na moo foloolu ti, ka tambi konko baalu la. Yusufa, Allamaa ñiŋ neemoo jii la i kaŋ, a ye tara i ye, kaatu ite le mu tomboŋ moo ti i faadiŋolu kono.

²⁷Benjamini, ite ka muluŋ ne ko suluu saŋaroo, a ye mutaroo ke soomandaa, a ye a talaŋ-talaŋ wulaaroo.

²⁸Ñinnu le mu Banisirayila lasili taŋ niŋ fuloo ti. Ñiŋ ne keta kumakaŋo ti, ì faamaa ye meŋ fo ì ye, kabiriŋ a be neemoo daani la ì ye, ì bee kiliŋ-kiliŋ naa niŋ ì fansuŋ taa taata.

²⁹Bituŋ Yaakuba ye kaŋo dii, a ko ì ye ko, “Sambii nte be kafu la n na moolu kaŋ. Ali m baadee m faamaañolu daala berehuwo kono, meŋ be Makipela kunkoo kono Mamure daala, Kanaani bankoo kaŋ. Iburayima ye ñiŋ berehuwo niŋ kunkoo ñiŋ saŋ Efuroni Hitinkoo ma le ka ke baadeedulaa ti.

³¹Ì ye Iburayima baadee ñiŋ dulaa le to, aniŋ a musumaa Saara. Ì ye Isiyaaka fanaa niŋ a la musoo Rebeka baadee jee le to, aduŋ ŋa Leya fanaa baadee jee le to.

³²Kenoo ñiŋ niŋ berehuwo meŋ be a kono, bee santa Hitinkoolu le bulu.”

³³Kabiriŋ Yaakuba pareeta ñiŋ kumakaŋolu dii kaŋ a dinkewolu la, a ye i laa, a niyo jiita, a kafuta a bonsuŋolu ma.