Read Mandinka 1 Musa 9 Bible Online

1 Musa 9 - Mandinka bible

1 Musa 9

¹Alla neemata Nuha ma, aniŋ a dinkewolu. A ko ì ye ko, “Ali ke jiidilaalu ti, ali ye siyaa, ka tara duniyaa karoo bee la.

²Duniyaakono daafeŋolu bee be sila la ali la le: kunoolu, kuruntu feŋolu aniŋ baakono ñewolu. Ì bee be tara la ali la maroo le koto.

³Feŋ-wo-feŋ, niŋ a be baluwo le to, aduŋ a ka taama bankoo le kaŋ, wolu bee be ke la ali ye domori feŋolu le ti, ko ŋa fiifeŋolu dii ali la ñaameŋ. Saayiŋ ŋa feŋolu bee le dii ali la.

⁴Bari ali kana suboo domo, yeloo be meŋ bala, kaatu yeloo, baluwo be wo le bala.

⁵Niŋ moo-wo-moo ye a ñoŋ moo faa, ka a yeloo boŋ, m be a juloo joo la a maarii to le. A joo ñanta ke la a faŋo niyo le ti. Niŋ daafeŋo ye moo faa, wo daafeŋo ñanta faa la le.

⁶Niŋ moo-wo-moo ye a ñoŋ hadamadiŋo yeloo boŋ, wo maarii fanaa yeloo ñanta boŋ na le, kaatu nte Alla ye hadamadiŋo daa m faŋo sawuroo le la.

⁷Ali ke jiidilaalu ti, ali ye siyaa. Ali janjaŋ duniyaa kono, ali ye a karoo bee fandi.”

⁸Bituŋ Alla naata a fo Nuha niŋ a dinkewolu ye, mennu be a fee ko,

⁹“Nte la karoo la, m be kambeŋo le londi la n niŋ ali teema, aniŋ ali koomalankoolu,

¹⁰aniŋ daafeŋolu mennu bee be ali fee: kunoolu, beeyaŋolu, aniŋ daafeŋ koteŋ toomaalu mennu bee be ali fee duniyaa kono ko meŋ nankamoo fintita kuluŋo kono.

¹¹N te n na kambeŋo la kuwo tiñaa la: niilamaa feŋolu bee te kasaara la waamoo la kotenke, aduŋ waame nene te soto la kotenke ka duniyaakono feŋolu kasaara.”

¹²Bituŋ Alla tententa ka a fo ko, “Ñiŋ ne mu kambeŋo taamanseeroo ti, ŋa meŋ londi n niŋ ali teema, aniŋ daafeŋolu mennu bee be ali fee, aniŋ jamaani koteŋolu mennu be naa:

¹³Ŋa kullimaaroo ke tawaloolu bala. Ate le be ke la kambeŋo taamanseeroo ti n niŋ duniyaakono feŋolu teema.

¹⁴Niŋ ŋa tawaloolu ke saŋo bala, aduŋ kullimaaroo fintita,

¹⁵n hakiloo be bula la n na kambeŋo la, meŋ be n niŋ ali teema, aniŋ niilamaa feŋolu bee. Waamoo te ke la kotenke ka niilamaa feŋolu bee kasaara.

¹⁶Niŋ ŋa kullimaaroo je tawaloolu bala, a be n hakiloo bulandi la kambeŋo le la, ŋa meŋ londi n niŋ ali teema, aduŋ kambeŋ ne mu, meŋ maŋ dandulaa soto.”

¹⁷Alla ko a ye ko, “Ñiŋ kullimaaroo, wo le mu kambeŋo taamanseeroo ti n niŋ ali teema aniŋ daafeŋ koteŋ toomaalu bee, mennu be duniyaa kono.”

¹⁸Nuha dinkewolu mennu fintita naŋ kuluŋo kono, wolu le mu Semu ti, Hamu aniŋ Yafeti. Hamu, ate le mu Kanaani faamaa ti.

¹⁹Duniyaa moolu bee bota Nuha ñiŋ dinkee saboo le bala.

²⁰Nuha keta senelaa le ti. Ate le keta moo foloo ti, meŋ ye wayini* yiri kankaŋo doo.

²¹Kabiriŋ a ye wayinoo miŋ, a siirata. A ye i laa a la tiriliisoo* koto, a kenseŋo.

²²Bituŋ Hamu meŋ mu Kanaani faamaa ti, wo le ye a faamaa je laariŋ, a kenseŋo. A taata a fo a kotoo fuloo ye, mennu be banta.

²³Bituŋ Semu niŋ Yafeti ye faani baa taa, ì ye a laa ì sañoo kaŋ. Ì taata ì koo la, ì ye ì faamaa kenseŋo muuri a la. Ì ñaa tarata tilindiŋ dulaa doo to, wo ye a tinna ì maŋ ì faamaa kenseŋo je.

²⁴Kabiriŋ siiroo bota Nuha ñaato, a naata a loŋ, a dinkee labaŋo ye meŋ ke a la.

²⁵Bituŋ a kumata ko, “Dankoo be Kanaani[9] ye. A be ke la jondiŋ joŋo le ti a kotooñolu ye.”

²⁶A kumata kotenke ko, “Tentoo be Yaawe* ye, Semu la Alla! Allamaa a ye Kanaani ke Semu la joŋo ti.

²⁷Allamaa Alla ye Yafeti la bankoo lafaa, Allamaa a koomalankoolu ye sabati Semu koomalankoolu kono. Allamaa a ye Kanaani ke Yafeti la joŋo ti.”

²⁸Kabiriŋ waamoo bota a la, Nuha baluuta fo sanji keme saba sanji taŋ luulu.

²⁹Nuha la baluwo tiloo bee taata kaañaŋ sanji keme kononto sanji taŋ luulu le fee, bituŋ a naata faa.