Read Mandinka 2 Samuweli 23 Bible Online

2 Samuweli 23 - Mandinka bible

2 Samuweli 23

¹Ñinnu le mu Dawuda la kuma labaŋolu ti: Yese dinkewo Dawuda la kumoo, moo meŋ Alla ye a buuñaa, la kumoo, Yaakuba la Alla ye moo meŋ tomboŋ, Banisirayilankoolu la suukuu diimaa laalaa.

²Yaawe* la Nooroo dunta n na le ka diyaamu, a la kiilaariyaa be n daa kono.

³Banisirayilankoolu la Alla diyaamuta, Banisirayila semberaŋ bere baa ko n ye le ko, “Niŋ moo ye moolu mara tiliŋo kono, niŋ a ye maraloo ke Alla ñaasilaŋo kono,

⁴a ka muluŋ ne ko tiloo boo foloo soomandaa, niŋ saŋo maŋ tawali soto luŋo meŋ na, a ka faramansa ñaameŋ, niŋ samaa teyita, meŋ ka ñaamoolu fintindi naŋ bankoo kono.”

⁵Fo n na dimbaayaa maŋ tiliŋ Alla fee baŋ, kaatu a niŋ ŋa kambeŋo le siti fo abadaa, jikoo meŋ te buruka la. A be maakoyiri baa le ke la n ye. N lafita meŋ-wo-meŋ na, fo Alla te m maakoyi la, a ye ke baŋ?

⁶Bari moo jawoolu ka muluŋ ne ko ŋaniŋolu, ì ye mennu fayi, kaatu moo buka i sika buloo la,

⁷moo-wo-moo be ŋaniŋolu maa la, a ka nee jooraŋo le taa waraŋ sooroo daa. Ì be daameŋ, ì ka jani wo le to.

⁸Ñinnu le mu Dawuda la kelejawaroolu toolu ti: Yosebu-Basebeti Takemoninkoo le keta ñiŋ saboo la ñaatonkoo ti. A ye a la sooroo wulindi kee keme seyi kamma, aduŋ a ye ì bee faa kataba kiliŋ.

⁹Meŋ be a nooma ñiŋ kelejawara saboo kono, mu Eleyasa le ti. Dodo dinkewo le mu, aduŋ a bota Ahohi kaabiiloo le kono. A be nuŋ Dawuda fee le kabiriŋ Filisitinkoolu benta ka keloo ke. Banisirayilankoolu borita le,

¹⁰bari a niŋ a la jooraŋo loota le, a ye Filisitinkoolu faa fo a bataata, a buloo jaata a la hawusaroo* bala. Wo luŋo Yaawe ye kañee baa le ke. Kabiriŋ keloo banta, Banisirayilankoolu muruta Eleyasa be daameŋ, ì ye kelejooraŋolu bondi furewolu bala.

¹¹Meŋ be wo nooma le keta Samma Akee dinkewo ti, Hararinkoo. Kabiriŋ Filisitinkoolu benta dulaa to, daameŋ kunkoo be faariŋ soso meseŋolu la, Banisirayilankoolu la kelediŋolu borita ì ma le.

¹²Bari Samma loota kunkoo le teema. A ye jee kanta, a ye Filisitinkoolu faa, aduŋ Yaawe ye kañee baa dii a la le.

¹³Katiri waatoo kee saboo mennu be ñiŋ kee kende taŋ saboo kono, taata Dawuda yaa Adullamu berehuwo kono, wo ye a tara, Filisitinkoolu la kelediŋ kafoo be daakaariŋ Refayimu Wulumbaŋo kono.

¹⁴Wo waatoo Dawuda tarata tatoo le kono, aduŋ Filisitinkoolu la daakaa tarata Betilehemu le.

¹⁵Bituŋ Betilehemu koloŋ jiyo ye Dawuda meeyaa, aduŋ a kumata ko, “Hee, niŋ moo si soto noo, meŋ si jiyo bii n ye naŋ Betilehemu saatee dundaŋ daa koloŋo to.”

¹⁶Wo to le kelejawara saboo dunta Filisitinkoolu la daakaa kono, ì ye jiyo bii wo koloŋo to, ì ye a samba Dawuda ye. Bari a maŋ soŋ na a miŋ na. A ye a taa le, a ye a boŋ Yaawe ye.

¹⁷A ko, “Hee Yaawe, Allamaa n tanka la ka ñiŋ miŋ. Fo ñiŋ kewolu maŋ i niyolu le laa ka ñiŋ jiyo bii naŋ?” Bituŋ a maŋ soŋ a miŋ na. Ñinnu le mu ñiŋ kelejawara saboo la kee kendeyaa kuwolu ti.

¹⁸Saayiŋ Abisayi Seruya dinkewo, Yowabu kotoo, le keta kelejawara too boriŋ taŋ saboo la ñaatonkoo ti. A ka kee keme saba kelendi, a ye ì bee faa niŋ a la sooroo la. Aduŋ a too naata bo komeŋ wo kelejawara saboo.

¹⁹Ate le too bota ñiŋ kee taŋ saboo bee ti, aduŋ a keta ì la ñaatonkoo le ti, bari hani wo a too maŋ bo ko wo kee saboo.

²⁰Benaya Yehoyada dinkewo keta nuŋ kelejawara baa le ti. A bota Kabuseeli le, aduŋ a ye kee kendeyaa baalu le ke. A nene ye Mowabinka kelejawara fula le faa. A nene ye jatoo fanaa faa dinkoo kono luŋo meŋ sumayaa keta fo sanjiyo jiita kalaasi dunkuliŋ feemaa ti.

²¹A ye Misiranka kee mendiŋ baa le fanaa faa. Sooroo tarata Misirankoo bulu ñaa-wo-ñaa, bari Benaya ye a boyinkaŋ niŋ dokoo le la. A ye sooroo saba Misirankoo buloo kono, a ye a faa niŋ a faŋo la sooroo la.

²²Ñinnu le keta Benaya Yehoyada dinkewo la baara kuwolu ti. A fanaa keta moo darajariŋ baa le ti wo kelejawara saboo koolaa.

²³Ì ye ate le la kuwolu sikandi wo kee taŋ saboo kono, bari a maŋ tara wo kee saboo kono. Aduŋ Dawuda ye ate le ke a kantalaalu la ñaatonkoo ti.

²⁴Ñinnu le tarata ñiŋ kee taŋ saboo kono: Asaheli Yowabu baadiŋo, Elihanani Dodo dinkewo Betilehemunkoo,

²⁵Samma Harodinkoo, Elika Harodinkoo,

²⁶Helesi Palitinkoo, Ira Ikesi dinkewo Tekowankoo,

²⁷Abiyesa Anatotinkoo, Mebunnayi Husankoo,

²⁸Salimoni Ahohi koomalankoo, Maharayi Netofankoo,

²⁹Heledi Baana dinkewo Netofankoo, Itayi Ribayi dinkewo meŋ bota Kibeya Benjamini tundoo kaŋ,

³⁰Benaya Piratoninkoo, Hidayi meŋ bota Kaasi wulumbaŋolu daala,

³¹Abi-Aliboni Aribatinkoo, Asimaweti Barihumunkoo,

³²Eliyaaba Saaliboninkoo, Yaseni dinkewolu,

³³Yonatani Samma dinkewo Hararinkoo, Ahiyamu Sarari dinkewo Hararinkoo,

³⁴Elifeleti Ahasibayi dinkewo Maakatinkoo, Eliyamu Ahitofeli dinkewo Kilohankoo,

³⁵Hesiro Karimelinkoo, Paarayi Aribinkoo,

³⁶Ikali Natani dinkewo Sobankoo, Bani Kadu lasili moo,

³⁷Seleki Ammoninkoo, Naharayi Beerotinkoo, Yowabu Seruya dinkewo la kelejooraŋ sambalaa,

³⁸Ira Itirinkoo, Karebu Itirinkoo,

³⁹aniŋ Uriya Hitinkoo. Ì bee kaañanta moo taŋ saba niŋ woorowula le fee.