Read Mandinka 1 Mansoolu 1 Bible Online

1 Mansoolu 1 - Mandinka bible

1 Mansoolu 1

¹Kabiriŋ Mansa Dawuda taata fo a kotoota baake, nenoo buka bo noo a la, hani niŋ ì ye a muuri niŋ muurilaŋolu la.

²Bituŋ a la dookuulaalu ko a ye ko, “M̀ maarii mansa, m̀ bula ŋà sunkutoo ñini i ye meŋ be tara la i kunna aniŋ ka i topatoo. A si kari i laa i kara la ka nenoo bo i la.”

³Wo to le ì ye sunkutu ñiimaa ñini Banisirayila bee kono, aduŋ ì naata Abisaki le je, meŋ bota Sunamu saatewo to. Ì ye a samba naŋ mansa yaa.

⁴Sunkutoo ñiŋ ñiiñaata baake le. A tarata mansa kunna ka a topatoo, bari mansa niŋ a maŋ kafu ka a loŋ musoo ti.

⁵Saayiŋ Dawuda dinkewo Adoniya, meŋ baamaa mu Hakiti ti, ye a faŋ sikandi le ka a fo ko, “Nte le be ke la mansa ti.” Bituŋ a ye keleraŋ sareetoolu* niŋ suwoolu parendi, aniŋ kee taŋ luulu mennu be tara la bori la a ñaato.

⁶Adoniya faamaa nene maŋ a niyo kuyandi ka a fo a ye ko, “Muŋ ne ye a tinna i ye ñiŋ maañaa ke?” Aduŋ fanaa a ñiiñaata baake le, aniŋ ate le wuluu siŋo be Abusalomu kaŋ.

⁷Adoniya niŋ Seruya dinkewo Yowabu, keta kaŋ kiliŋ ti, aniŋ Piriisi* Abiyata, ka Adoniya maakoyi.

⁸Bari moo doolu be jee le mennu maŋ laa Adoniya kaŋ. Wolu le mu Piriisi Sadoki ti, Yehoyada dinkewo Benaya, Annabilayi Natani, Simeyi aniŋ Reyi, aniŋ Dawuda faŋo kantalaalu.

⁹Bituŋ Adoniya ye saajiyolu bo sadaa* ti, kooreeto ninsoolu, aniŋ ninsiriŋ batundoolu, dulaa to meŋ ka kumandi Saa Beroo la, Rokeli woyoo daala. A ye Mansa Dawuda dinkewolu niŋ mansa la ñaatonkoolu bee kumandi, mennu bota Yahuuda.

¹⁰Bari a maŋ Annabilayi Natani kumandi, waraŋ Benaya waraŋ Dawuda kantalaalu aniŋ a faŋo doomaa, Sulemani.

¹¹Wo to le Natani ko Sulemani baamaa, Batiseba ye ko, “Fo ite maŋ a moyi ko Hakiti dinkewo Adoniya keta mansa le ti, aduŋ m̀ maarii Dawuda maŋ a loŋ?

¹²Wo to saayiŋ naa ŋa i yaamari i si i faŋo niyo tankandi noo ñaameŋ, aniŋ i dinkewo Sulemani niyo.

¹³Taa Mansa Dawuda yaa, aduŋ i si a fo a ye ko, ‘M maarii mansa, fo i maŋ kali nte ye, i la dookuulaa ko n dinkewo Sulemani le be sii la i noo to ka ke mansa ti? Wo to a keta noo ñaadii le saayiŋ Adoniya keta mansa ti?’ ”

¹⁴Natani ko a ye fanaa ko, “Bituŋ niŋ i be diyaamu kaŋ Mansa Dawuda ye, m be duŋ na naŋ ne ŋa i la kumoo bambandi.”

¹⁵Bituŋ Batiseba taata mansa kaŋ a la laabuŋo kono. A kotoota baake le, aduŋ Abisaki, sunkutoo meŋ bota Sunamu, wo le tarata a topatoo kaŋ.

¹⁶Batiseba ñoyita duuma mansa ñaatiliŋo la. Mansa ko a ye ko, “I lafita muŋ ne la?”

¹⁷A ye a jaabi ko, “M maarii, ite faŋo le ye i kali nte ye i la dookuulaa, Yaawe* i la Alla too la ko, i dinkewo Sulemani le be ke la mansa ti i noo to, aduŋ a be sii la i la mansasiiraŋo kaŋ.

¹⁸Bari a juubee, Adoniya fele a keta mansa ti, aduŋ ite, m maarii mansa maŋ wo loŋ.

¹⁹A hayinaŋ a ye saajii jamaa bo sadaa ti, ninsituuraalu, aniŋ ninsiriŋ batundoolu. A ye i dinkewolu bee kumandi sadaa to le, aniŋ Piriisi Abiyata niŋ i la kelediŋolu la kuntiyo Yowabu, bari a maŋ i dinkewo Sulemani kumandi.

²⁰M maarii mansa, Banisirayila bee ñaa be looriŋ ite le kaŋ ka a loŋ i bulu jumaa le be sii la mansasiiraŋo kaŋ ite m maarii mansa noo to.

²¹Niŋ i maŋ wo ke, niŋ i beleta doroŋ ka kafu i mumuñolu ma, ì be nte niŋ n dinkewo Sulemani mantoora la le.”

²²Kabiriŋ Batiseba be diyaamu kaŋ mansa ye, Annabilayi Natani futata.

²³Bituŋ ì ko mansa ye ko, “Annabilayi Natani naata le.” Wo le to a naata, a ñoyita ka a foŋo loo bankoo to mansa ñaatiliŋo la.

²⁴Bituŋ Natani ko, “M maarii mansa, fo ite le ko Adoniya le be sii la i noo to mansasiiraŋo kaŋ ka ke mansa ti baŋ?

²⁵Bii faŋo a taata le ka beeyaŋ sadaa jamaa bondi: saajiyolu, ninsituuraalu, aniŋ ninsiriŋ batundoolu. A ye i dinkewolu bee kumandi le, ka taa Yowabu, i la kelediŋolu la kuntiyo, aniŋ Piriisi Abiyata. Saayiŋ teŋ faŋo ì niŋ a be domoroo niŋ miŋo le la, aduŋ ì ka ñiŋ ne fo ko, ‘Allamaa Mansa Adoniya mee la.’

²⁶Bari a maŋ nte, i la dookuulaa kumandi, aniŋ Piriisi Sadoki, aniŋ Yehoyada dinkewo Benaya, aniŋ i dinkewo meŋ sonta i ye, Sulemani.

²⁷Fo ñiŋ mu kuu le ti m maarii mansa faŋo ye meŋ ke, aduŋ i maŋ a fo ntolu, i la dookuulaalu ye meŋ ñanta sii la mansasiiraŋo kaŋ m maarii mansa noo to?”

²⁸Bituŋ Mansa Dawuda diyaamuta, a ko, “Batiseba kumandi n ye.” Wo le to a naata, aduŋ a loota mansa ñaatiliŋo la.

²⁹Bituŋ mansa ye i kali ñiŋ kaloo la ko, “A be koyiriŋ ñaameŋ ko Yaawe be baluuriŋ ne, ate meŋ ye n tankandi n na mantoora kuwolu bee ma.

³⁰Ko ŋa n kali i ye nuŋ ñaameŋ Yaawe too la, Banisirayila la Alla, m be a timmandi la le bii. I dinkewo Sulemani le be ke la mansa ti niŋ m bota jee, aduŋ ate le be sii la mansasiiraŋo kaŋ n noo to.”

³¹Bituŋ Batiseba ñoyita duuma a ye a foŋo loo bankoo to, aduŋ a ñoyiriŋo mansa ñaatiliŋo la ko, “Allamaa m maarii Mansa Dawuda baluu la.”

³²Mansa Dawuda ko ì ye ko, “Ali Piriisi Sadoki kumandi naŋ, Annabilayi Natani, aniŋ Yehoyada dinkewo Benaya.” Kabiriŋ ì naata mansa ñaatiliŋo la,

³³a ko ì ye ko, “Ali n na mansakundaa dookuulaalu taa ali niŋ ì ye taa. N dinkewo Sulemani si sele m faŋo la bahalewo* kaŋ, ali niŋ a ye taa Kihoni woyoo to.

³⁴Jee to Sadoki niŋ Natani si tuloo boŋ a kuŋo to ka a toloo Banisirayila mansa ti. Bituŋ ali si binoo fee, ali ye sari ka a fo ko, ‘Allamaa Mansa Sulemani mee la!’

³⁵Ali si bula a nooma ka muru naŋ. A si duŋ naŋ a ye sii n na mansasiiraŋo kaŋ. Ate le be ke la mansa ti n noo to, kaatu ŋa a tomboŋ ne ka ke maralilaa ti Banisirayila kunna, aniŋ Yahuuda.”

³⁶Yehoyada dinkewo Benaya ye mansa jaabi, a ko a ye ko, “A si ke wo ñaama! Allamaa Yaawe, m maarii mansa la Alla, ye a taamandi wo ñaama.

³⁷Ko Yaawe tarata nuŋ m maarii mansa fee ñaameŋ, Allamaa a ye tara Sulemani fanaa fee wo ñaama, ka a la mansasiiraŋo semboo warandi hani fo ka tambi m maarii Mansa Dawuda faŋo taa la!”

³⁸Bituŋ Piriisi Sadoki, Annabilayi Natani, Benaya Yehoyada dinkewo, ì niŋ Keretinkoolu niŋ Peletinkoolu mennu mu Dawuda kantalaalu ti, ye Sulemani selendi Mansa Dawuda la bahalewo kaŋ, aduŋ ì ye a dandaŋ Kihoni.

³⁹Piriisi Sadoki ye tulu keraŋ binoo taa, a ye meŋ bondi naŋ Yaawe la Tiriliisi Senuŋo* kono, a ye tuloo boŋ Sulemani kuŋo to ka a toloo. Bituŋ ì ye binoo fee, aduŋ moolu bee sarita ka a fo ko, “Allamaa Mansa Sulemani mee la!”

⁴⁰Aduŋ moolu bee bulata a nooma, ì be footaŋolu fee la ì seewooriŋ baa, aduŋ maakaŋo ye a tinna le fo bankoo ka jarajara.

⁴¹Kabiriŋ Adoniya niŋ a la luntaŋolu be naa domoroo baŋ na doroŋ, ì ye maakaŋo ñiŋ moyi. Yowabu fanaa ye footaŋo kumakaŋo moyi, aduŋ a kumata ko, “Muŋ maakaŋ baa le ka kuma saatewo kono teŋ?”

⁴²A be wo fo kaŋ doroŋ Yonatani futata, Piriisi Abiyata dinkewo. Adoniya ko a ye ko, “Naa, ite mu moo kendoo le ti, aduŋ kibaari betoo le be tara la i daa.”

⁴³Yonatani ye a jaabi ko, “Hanii, kibaari betoo nte, kaatu m̀ maarii Mansa Dawuda ye Sulemani le ke mansa ti.

⁴⁴A ye Sadoki le kii, Natani, Benaya, aniŋ Keretinkoolu niŋ Peletinkoolu ka Sulemani dandaŋ. Ì ye a selendi mansa la bahalewo le kaŋ,

⁴⁵aduŋ Piriisi Sadoki aniŋ Annabilayi Natani ye tuloo boŋ a kuŋo to Kihoni Woyoo to ka a ke mansa ti. Bituŋ ì bota jee ka duŋ saatewo kono, ì seewooriŋo be wuuri la, aduŋ moolu maakaŋo be warariŋ. Ali ka wo maakaŋo le moyi teŋ.

⁴⁶Wo bee koolaa, Sulemani siita mansasiiraŋo kaŋ ne saayiŋ.

⁴⁷Aduŋ fanaa mansa la dookuulaalu naata le ka m̀ maarii Mansa Dawuda jayi ka a fo ko, ‘Allamaa i la Alla ye Sulemani too darajandi ka tambi i too la, aniŋ a la mansasiiraŋo ye wara ka tambi i taa la.’ Mansa Dawuda jimita ka baturoo ke a la laaraŋo kaŋ,

⁴⁸aduŋ a duwaata ko, ‘Ali ŋà Yaawe tentu, Banisirayila la Alla, meŋ ye n koomalankoolu kiliŋ sindi n noo to ka ke mansa ti bii, aduŋ a ye nte siimaayandi fo n ñaa ye a je!’ ”

⁴⁹Bituŋ Adoniya la luntaŋolu bee wulita ì silandiŋo, ì janjanta, moo-wo-moo ye a fansuŋ siloo taa.

⁵⁰Adoniya faŋo, Sulemani la kuwo silaŋo kamma la, a wulita kataba kiliŋ, a taata miniŋ sadaajanidulaa* binoolu la.

⁵¹Bituŋ ì naata ñiŋ fo Sulemani ye ko, “Adoniya silata ite le la, a hayinaŋ minindiŋ sadaajanidulaa binoolu la. A lafita le i ye i kali ko i te a faa la hawusaroo* la.”

⁵²Bituŋ Sulemani ko, “Niŋ Adoniya maŋ mantoora kuu ke, nte te a mantoora la. Bari niŋ a ye a ke, m be a faa la le.”

⁵³Bituŋ a ye moo kii sadaajanidulaa to ka taa Adoniya kamma naŋ. Bituŋ Adoniya naata a sujudita Mansa Sulemani ye, aduŋ Sulemani ko a ye ko, “Taa i la suwo kono.”