Read Mandinka 1 Taarika 16 Bible Online

1 Taarika 16 - Mandinka bible

1 Taarika 16

¹Ì ye Alla la Kambeŋ Kunewo* samba naŋ, ì ye a londi tiriliisoo* koto, Dawuda ye meŋ loo a ye. Bituŋ ì ye jani sadaalu* niŋ kayira sabatindiraŋ sadaalu bondi Alla ñaatiliŋo la.

²Kabiriŋ Dawuda pareeta jani sadaalu niŋ kayira sabatindiraŋ sadaalu bondi la, a ye neemoo daani moolu ye ka bo niŋ Yaawe* too la.

³Bituŋ a ye mbuuru kuŋo, subu janiriŋo aniŋ wayini* yiridiŋ jaaroo doo dii Banisirayila kewolu niŋ musoolu bee kiliŋ-kiliŋ naa la.

⁴Wo koolaa a ye Lewi lasiloo moo doolu tomboŋ ka ke dookuulaalu ti Yaawe la Kambeŋ Kunewo ñaatiliŋo la, ka Yaawe Banisirayila la Alla batu, ka a tentu aniŋ ka a jayi.

⁵Asafu le mu ñaatonkoo ti, Jakariya ye wo nooma, Yeyeli, Semiramoti, Yehiyeli, Matitiya, Eliyabu, Benaya, Obedi-Edomu aniŋ Yeyeli. Wolu le ka kontiŋolu niŋ kooraalu kosi, Asafu le ka jaawali palaatoolu kosi.

⁶Bituŋ piriisoolu* Benaya niŋ Yahasiyeli le ka footaŋolu fee waati-wo-waati Alla la Kambeŋ Kunewo ñaatiliŋo la.

⁷Wo luŋo le mu luŋ foloo ti, Dawuda ye Asafu niŋ a mooñoo Lewi lasiloo moolu tomboŋ ka tenturu suukuwo laa Yaawe ye.

⁸Ali tenturoo dii Yaawe la. Ali ye a batu a too la. Ali a fo bantala banku* moolu ye a ye kuwolu mennu ke.

⁹Ali suukuwo laa a ye ka a jayi, ali a fo, a ye kaawakuwolu mennu ke.

¹⁰Ali kidimandiroo ke a too senuŋo la. Moolu mennu ka Yaawe ñini, ì ye jusulaa.

¹¹Ali ñinindiri ke Yaawe la, a niŋ a la semboo, ali a ñini ka tara a ñaatiliŋo la waati-wo-waati.

¹²Alitolu Isirayila,[23] Alla la dookuulaa koomalankoolu, Yaakuba koomalankoolu, Yaawe ye mennu tomboŋ, ali i miira kuu baalu la, a ye mennu ke, aniŋ a ye kaawakuwolu niŋ kiitiiteyoolu mennu taamandi.

¹⁴Ate Yaawe le mu ǹ na Alla ti, a la kiitiiteyoo le ka taama duniyaa bee kono.

¹⁵Ali ali hakiloo tu a la kambeŋo to fo abadaa, a la yaamaroo, hani fo jamaani wuliwuloolu la.

¹⁶A ye kambeŋo meŋ siti a niŋ Iburayima teema, a kalita wo laahidoo la Isiyaaka le ye.

¹⁷A ye a londi luwaa le ti, ka wo laahidoo bambandi Yaakuba ma, kambeŋo meŋ laahidoo be tu la a niŋ Isirayila teema fo abadaa.

¹⁸A ko, “M be Kanaani bankoo dii la i la le, a ye ke i koomalankoolu la keetaafeŋo ti.”

¹⁹Tuma meŋ ì yaatewo be dooyaariŋ, ì moo dantaŋ doroŋ ne mu, aduŋ tumarankewolu le mu ì ti nuŋ Kanaani bankoo kaŋ.

²⁰Ì tarata yaayi la le ka bo banku ka taa banku, ka bo mansamarali banku ka taa doo to.

²¹Alla maŋ hani moo kiliŋ bula a ye ì mantoora. A ye mansoolu dandalaa ì la kuwo la le.

²²A ko, “Ali kana n na tomboŋ moolu maa, sako ka kuu ke n na annabiyomoolu la.”

²³Duniyaa moolu, ali suukuwo laa Yaawe ye, Ali kankulaaroo ke luŋ-wo-luŋ, a ye kiisandiroo ke ñaameŋ.

²⁴Ali a la semboo niŋ waroo kankulaa bankoolu bee kaŋ, aniŋ a la kaawakuu baalu duniyaa siyolu bee kono.

²⁵Yaawe warata le, aduŋ a ñanta tentu la le famfaŋ, ate le ñaasilaŋo ñanta wara la alloolu bee ti.

²⁶Kaatu moolu ye feŋolu mennu muta Alla ti, ì mu jalaŋ kenseŋolu le ti. Bari Yaawe le ye saŋ fatoolu daa.

²⁷Horomoo niŋ mansayaa waroo ye a murubeŋ ne, semboo niŋ jusulaa le be faariŋ a taradulaa to.

²⁸Duniyaa siyolu, ali Yaawe jayi a la waroo kaŋ. Ali a tentu a la semboo kaŋ.

²⁹Ali Yaawe too la waroo niŋ a la semboo fo, ka horomoo dii a la. Ali ali la sadaalu samba naŋ, ali naa a ñaatiliŋo la. Ali Yaawe batu a la seneyaa ñiimaa kono,

³⁰duniyaa moolu bee, ali jarajara a ñaatiliŋo la. A ye duniyaa londi le, a bambanta, a te wutu la a noo to.

³¹Saŋ fatoolu ye seewoo, bankoo ye kontaani. Ì ye a kankulaa duniyaa moolu kono ko, “Yaawe le mu Mansoo ti.”

³²Fankaasoo ye bumbuŋ, aniŋ feŋolu mennu bee be a kono. Kunkoolu ye seewoo, ì niŋ ì fiifeŋolu.

³³Wulakono yiroolu be wuuri la le, seewoo kamma la, ka suukuwo laa Yaawe ye, kaatu a be naa le, ka duniyaa kiitindi.

³⁴Ali Yaawe tentu, kaatu a beteyaata le, a la kanu bambaloo be tu la le fo abadaa.

³⁵Ali a fo ko, “Hee Yaawe, ǹ na kiisandirilaa, m̀ bondi mutoo kono, i ye ǹ kiisa ka ǹ seyindi ka bo banku koteŋolu kaŋ, fo ǹ si i tentu i too la kuliyaa kaŋ, aduŋ ǹ si jusulaa ka i jayi.”

³⁶Tenturoo be Yaawe ye, Banisirayila la Alla, ka bo saayiŋ na ka taa fo abadaa. Bituŋ moolu bee ko, “Amiin,” aduŋ ì ye Yaawe jayi.

³⁷Wo to le Dawuda ye Asafu niŋ a mooñoolu tu Yaawe la Kambeŋ Kunewo ñaatiliŋo la, ka luŋ-wo-luŋ baturoo topatoo,

³⁸aniŋ Obedi-Edomu niŋ a mooñoolu, ì moo taŋ wooro niŋ seyi. Wo ye a tara Obedi-Edomu, Yedutuni dinkewo aniŋ Hosa le be marariŋ dundaŋ daalu kantoo ma.

³⁹A ye Piriisi Sadoki niŋ a mooñoolu tu marariŋ Yaawe batudulaa tintiŋo* la meŋ be Kibeyoni,

⁴⁰ka jani sadaa bondi Yaawe ye sadaajanidulaa* to soomandaa-wo-soomandaa aniŋ wulaara-wo-wulaara, ko a safeeta ñaameŋ luwaa to, Yaawe ye Banisirayila yaamari meŋ na.

⁴¹Hemani niŋ Yedutuni be nuŋ ì fee le, aniŋ moo tombondiŋ toomaalu, ì ye mennu too yitandi ka tenturoo dii Yaawe la, kaatu a la kanu bambaloo be tu la le fo abadaa.

⁴²Hemani niŋ Yedutuni le marata footaŋolu niŋ jaawali palaatoolu la, aniŋ suukuu jooraŋ toomaalu. Yedutuni dinkewolu le tombonta ka mara dundaŋ daa ma.

⁴³Wo to le moolu bee seyita ì la suwolu kono, aduŋ Dawuda fanaa muruta a la suwo kono, ka neemoo daani a la dimbaayaa ye.