Read Mandinka 1 Taarika 27 Bible Online

1 Taarika 27 - Mandinka bible

1 Taarika 27

¹Ñinnu le mu kaabiila ñaatonkoolu ti, aniŋ ñaatonkoolu mennu marata wuli kiliŋ kafoolu niŋ keme kiliŋ kafoolu ma, aniŋ kuntiyolu mennu marata bankoo dookuu kuwolu ma. Ñiŋ ñaatonkoolu le tombonta ka mara kafoolu ma, mennu ka ñoo faliŋ-faliŋ dookuwo la kari-wo-kari. Kafu-wo-kafu kee wuli muwaŋ niŋ naani le be jee.

²Ñinnu le mu ñaatonkoolu ti mennu marata kari-wo-kari dookuu siŋo ma: Kari foloo, Yasobeyamu Sabudiyeli dinkewo le marata kafu foloo ma. A la kafoo kono, moo wuli muwaŋ niŋ naani le be jee.

³A mu Peresi koomalankoo le ti, aduŋ kari foloo la kelediŋ ñaatonkoolu la kuntiyo le mu a ti.

⁴Dodayi Ahohi koomalankoo le marata kari fulanjaŋo ma, a ye Mikiloti ke a la kafoo ñaatonkoo ti. A la kafoo kono, moo wuli muwaŋ niŋ naani le be jee.

⁵Ñaatonka sabanjaŋo meŋ marata kari sabanjaŋo ma, mu Benaya le ti, Piriisi* Yehoyada dinkewo. A la kafoo kono, moo wuli muwaŋ niŋ naani le be jee.

⁶Ñiŋ ne mu wo Benaya ti meŋ be wo kelejawara taŋ saboo[29] kono, aduŋ ate le ye ì ñaatonkayaa, bari a dinkewo Ammisabadi le be marariŋ a la kafoo ma.

⁷Ñaatonka naaninjaŋo meŋ marata kari naaninjaŋo ma, mu Asaheli le ti, Yowabu doomaa, aduŋ a dinkewo Sebadiya le ye a noo taa. A la kafoo kono, moo wuli muwaŋ niŋ naani le be jee.

⁸Ñaatonka luulunjaŋo meŋ marata kari luulunjaŋo ma, mu Samuhuti le ti, Isari koomalankoo. A la kafoo kono, moo wuli muwaŋ niŋ naani le be jee.

⁹Ñaatonka wooronjaŋo meŋ marata kari wooronjaŋo ma, mu Ira le ti, Ikesi Tekowankoo dinkewo. A la kafoo kono, moo wuli muwaŋ niŋ naani le be jee.

¹⁰Ñaatonka woorowulanjaŋo meŋ marata kari woorowulanjaŋo ma, mu Helesi le ti, Peloninkoo, Efurayimu* koomalankoo. A la kafoo kono, moo wuli muwaŋ niŋ naani le be jee.

¹¹Ñaatonka seyinjaŋo meŋ marata kari seyinjaŋo ma, mu Sibekayi le ti, Husankoo, Sera koomalankoo. A la kafoo kono, moo wuli muwaŋ niŋ naani le be jee.

¹²Ñaatonka konontonjaŋo meŋ marata kari konontonjaŋo ma, mu Abiyesa le ti, Anatotinkoo, Benjamini koomalankoo. A la kafoo kono, moo wuli muwaŋ niŋ naani le be jee.

¹³Ñaatonka tanjaŋo meŋ marata kari tanjaŋo ma, mu Maharayi le ti, Netofankoo, Sera koomalankoo. A la kafoo kono, moo wuli muwaŋ niŋ naani le be jee.

¹⁴Ñaatonka taŋ niŋ kilinjaŋo meŋ marata kari taŋ niŋ kilinjaŋo ma, mu Benaya le ti, Piratoninkoo, Efurayimu koomalankoo. A la kafoo kono, moo wuli muwaŋ niŋ naani le be jee.

¹⁵Ñaatonka taŋ niŋ fulanjaŋo meŋ marata kari taŋ niŋ fulanjaŋo ma, mu Helidayi le ti, Netofankoo, Otiniyeli koomalankoo. A la kafoo kono, moo wuli muwaŋ niŋ naani le be jee.

¹⁶Ñinnu le mu maralilaalu ti mennu marata Banisirayila lasiloolu moolu ma: Ka bo Rubeni lasiloo kono, Eliyesa Sikiri dinkewo le mu maralilaa ñaatonkoo ti. Ka bo Simeyoni lasiloo kono, Sefatiya Maaka dinkewo le mu.

¹⁷Ka bo Lewi lasiloo kono, Hasabiya Kemuweli dinkewo le mu. Ka bo Haaruna kaabiiloo kono, Sadoki le mu.

¹⁸Ka bo Yahuuda lasiloo kono, Elihu le mu, Dawuda kotoomaa. Ka bo Isakari lasiloo kono, Omuri Mikayeli dinkewo le mu.

¹⁹Ka bo Sebuluni lasiloo kono, Isimaya Obadiya dinkewo le mu. Ka bo Nafutali lasiloo kono, Yeremoti Asiriyeli dinkewo le mu.

²⁰Ka bo Efurayimu lasiloo kono, Hoseya Asasiya dinkewo le mu. Ka bo Manase lasili talanteemoo kono tilijii karoo la, Yoweli Pedaya dinkewo le mu.

²¹Ka bo Manase lasili talanteemoo kono tilibo karoo la Kileyadi tundoo kaŋ, Ido Jakariya dinkewo le mu. Ka bo Benjamini lasiloo kono, Yaasiyeli Abuna dinkewo le mu.

²²Ka bo Dani lasiloo kono, Asareli Yerohamu dinkewo le mu. Ñinnu le mu Banisirayila lasili maralilaa ñaatonkoolu ti.

²³Dawuda maŋ moolu yaatee mennu siyo be sanji muwaŋ ye duuma, Yaawe la laahidoo kaŋ ko, a be Banisirayilankoolu siyandi la le komeŋ looloolu.

²⁴Yowabu, Seruya dinkewo le ye a dati nuŋ ka ì yaatee, bari a maŋ a labaŋ. Alla la kamfaa baa jiita Banisirayila kaŋ, wo le ye a tinna ñiŋ yaatewo maŋ naa safee Mansa Dawuda la Taarika Kitaaboo kono.

²⁵Ñinnu le mu moolu ti mennu marata mansakundaa la fankoo ma: Asimaweti, Adiyeli dinkewo le marata mansa la naafulu maabodulaa ma meŋ be Yerusalaamu, Yonatani, Usiya dinkewo le marata bankoo naafulu maabodulaa ma, mennu be saatee baalu niŋ saateeriŋolu aniŋ tatoolu kono.

²⁶Esiri, Kelubu dinkewo le marata kunkukono dookuulaalu ma.

²⁷Simeyi Ramankoo, le marata wayini* yiri kankaŋolu ma. Sabudi Sefamunkoo, le marata dulaa ma, ì ka wayinoo maabo daameŋ to.

²⁸Baali-Hanani Kederinkoo, le marata olifu* yiroolu niŋ sooto yiroolu ma Sefela* konkotundoo* kaŋ. Yowasi le marata olifu tulu maabodulaa ma.

²⁹Sitirayi, Saroninkoo le marata koorewolu ma, mennu ka daañiniŋo ke Saroni tundoo kaŋ. Safati, Adulayi dinkewo le marata koorewolu ma, mennu be wulumbaŋolu kono.

³⁰Obili, Isimayila koomalankoo le marata ñonkomoolu ma. Yeedeya, Meronotinkoo le marata faloolu ma.

³¹Yasisi, Hajara koomalankoo le marata saajiyolu niŋ baalu ma. Ñinnu bee mu mansa la dookuulaalu le ti, mennu marata a la sotofeŋolu ma.

³²Yonatani, Dawuda bariŋ mu yaamarilaa le ti, a ye londoo soto baake, aduŋ a mu safeerilaa le ti. Yehiyeli, Hakimoni dinkewo le marata mansa dinkewolu la kuwolu ma.

³³Ahitofeli mu mansa la yaamarilaa le ti, aduŋ Husayi Arikinkoo mu mansa teerimaa le ti.

³⁴Yehoyada, Benaya dinkewo aniŋ Abiyata le seyita Ahitofeli noo to. Yowabu le mu mansa la kelediŋ ñaatonkoo ti.