Read Mandinka Nehemiya 3 Bible Online

Nehemiya 3 - Mandinka bible

Nehemiya 3

¹Piriisi* kuntiyo Eliyasibu niŋ a piriisiñoolu wulita dookuwo la, aduŋ ì ye Saajii Dundaŋ Daa seyinkaŋ loo le. Ì ye a kerekere le, aniŋ ì ye daa tawundaŋolu ke a la. Ì ye a kerekere le ka taa fo Keme Tata Jaŋo to, aniŋ ka taa fo Hananeli Tata Jaŋo to.

²Ka bo ì daala, Yeriko kewolu ye doo coki a bala. Itolu daala, Imuri dinkewo Sakuri le ye looroo ke.

³Hasenaa dinkewolu le ye Ñee Dundaŋ Daa loo. Ì ye babara biliyolu laa, aniŋ ì ye daa tawundaŋolu ke a la, sorondaŋolu, aniŋ bantambiloolu.

⁴Uriya dinkewo Meremoti, Hakosi mamariŋo le ye a coki ka bo itolu bala. Ate bala, Berekiya dinkewo Mesullamu, Mesesabeli mamariŋo le ye cokiroo ke. Wo bala, Baana dinkewo Sadoki le ye seyinkaŋ looroo ke.

⁵Wo bala, Tekowankoolu le ye seyinkaŋ looroo ke. Bari itolu la ñaatonkoolu maŋ soŋ jimi la ka dookuwo ke ì maariikee ye.

⁶Paseya dinkewo Yoyada niŋ Besodeya dinkewo Mesullamu le ye Yesana Dundaŋ Daa seyinkaŋ loo. Ì ye babara biliyolu laa le, aniŋ ì ye daa tawundaŋolu ke a la, sorondaŋolu, aniŋ bantambiloolu.

⁷Itolu bala, Melatiya, meŋ bota Kibeyoni, kewo doolu mennu fanaa bota Kibeyoni niŋ Misipa, aniŋ Yadoni meŋ bota Meronoti, le ye seyinkaŋ looroo ke. Yufurati Baakoo kumandaŋo le ye ñiŋ dulaalu mara.

⁸Itolu bala, Harihaya dinkewo Usiyeli, meŋ tarata sani numoolu kono, le ye seyinkaŋ looroo ke. Wo bala, Hananiya, meŋ tarata seerandi feŋ dadaalaalu kono, le ye seyinkaŋ dadaaroo ke. Aduŋ ì ye Yerusalaamu dadaakuu le ka taa fo Sansaŋ Tata Fanuŋo to.

⁹Itolu bala, Huri dinkewo Refaya, Yerusalaamu kumandaŋ bankoo talantewo maralaa, le ye seyinkaŋ dadaaroo ke.

¹⁰Ate bala, Harumafi dinkewo Yedaya, le ye dadaaroo ke a la buŋo ñaatiliŋo la. Ate bala, Hasabuneya dinkewo Hatusi le ye seyinkaŋ dadaaroo ke.

¹¹Harimu dinkewo Malikiya niŋ Pahati-Mowabi dinkewo Hasubu ye kara doo seyinkaŋ dadaa, aniŋ Fuuroolu Tata Jaŋo.

¹²Itolu bala, Hallohesi dinkewo Sallumu, Yerusalaamu kumandaŋ bankoo talantewo maralaa, le ye kara doo seyinkaŋ dadaa, a niŋ a dimmusoolu.

¹³Hanuni niŋ Sanowa moolu le ye Wulumbanto Dundaŋ Daa dadaa. Ì ye a seyinkaŋ loo le, ka daa tawundaŋolu ke a la, sorondaŋolu, aniŋ bantambiloolu. Aduŋ ì ye simfaañaa wuli kiliŋ niŋ keme luulu le dadaa tata sansaŋo to, ka taa fo Suntukunto Dundaŋ Daa to.

¹⁴Rekabu dinkewo Malikiya, Beti-Hakeremu kumandaŋ bankoo maralaa, le ye Suntukunto Dundaŋ Daa seyinkaŋ dadaa. A ye a loo le, ka daa tawundaŋo ke a la, sorondaŋolu, aniŋ bantambiloolu.

¹⁵Koli-Hose dinkewo Salluni, Misipa kumandaŋ bankoo maralaa, le ye Woyito Dundaŋ Daa seyinkaŋ dadaa. A ye a loo le, a ye a santo kuyaŋ, ka daa tawundaŋolu ke a la, sorondaŋolu, aniŋ bantambiloolu. A ye tata sansaŋo fanaa seyinkaŋ loo Silowamu Daloo to le, meŋ be Mansa Kankaŋo daala, aniŋ ka taa fo teputepoolu to, mennu jiita ka bo Dawuda la Saatewo* bala.

¹⁶Ate bala, Asibuki dinkewo Nehemiya, Beti-Suri kumandaŋ bankoo talantewo maralaa, le ye dulaa seyinkaŋ dadaa ka bo Dawuda la baadeekoo ñaatiliŋo la, ka taa fo dala dadaariŋo to, aniŋ Kelejawaroolu la Buŋo to.

¹⁷Ate bala, Lewi lasiloo le ye seyinkaŋ dadaaroo ke Bani dinkewo Rehumu koto. Ate bala, Hasabiya, Keyila kumandaŋ bankoo talantewo maralaa, le ye seyinkaŋ dadaaroo ke a la kumandaŋ bankoo ye.

¹⁸Ate bala, a baadiŋolu le ye seyinkaŋ dadaaroo ke Henadadi dinkewo Binnuyi koto, Keyila kumandaŋ bankoo talantee doo maralaa.

¹⁹Ate bala, Yesuwa dinkewo Eseri, Misipa maralaa, le ye dulaa doo seyinkaŋ dadaa. A ye a taa naŋ ka bo kelejooraŋ maabodulaa tintiñaa to le, ka taa fo ŋoojiŋo to.

²⁰Ate bala, Sabayi dinkewo Baruku le ye kara doo dadaa niŋ soobeeyaa la, ka bo ŋoojiŋo to ka taa fo piriisi kuntiyo Eliyasibu la buŋo daa to.

²¹Ate bala, Uriya dinkewo Meremoti, Hakosi mamariŋo, le ye kara doo fanaa seyinkaŋ dadaa, ka bo Eliyasibu la buŋo daa to ka taa fo a daŋo to.

²²Ate bala, piriisoolu mennu bota dandanna tundoo kaŋ, wolu le ye seyinkaŋ dadaaroo ke.

²³Itolu bala, Benjamini niŋ Hasubu, ye ì faŋolu la buŋo ñaatiliŋo la le seyinkaŋ dadaa. Itolu bala, Maaseya dinkewo Asariya, Ananiya mamariŋo, ye a faŋo la buŋo maafaŋ ne seyinkaŋ dadaa.

²⁴Ate bala, Henadadi dinkewo Binnuyi, le ye kara doo fanaa seyinkaŋ dadaa, ka bo Asariya la buŋo to ka taa fo ŋoojiŋo to, aniŋ tonkoŋo to.

²⁵Usayi dinkewo Palali le ye seyinkaŋ dadaaroo ke ŋoojiŋo ñaatiliŋo la, mansa buŋ santonkoo tata jaŋ baa bala. Wo to be mansa kantalaalu la luwo daala le. Ate bala, Parosi dinkewo Pedaya le ye seyinkaŋ dadaaroo ke.

²⁶Batudulaa Buŋo* to dookuulaalu, mennu be siiriŋ Ofeli Konkoo kaŋ, ye seyinkaŋ dadaaroo ke le ka taa fo Jii Dundaŋ Daa ñaatiliŋo la tilibo maafaŋo la, aniŋ tata jaŋ baa bala.

²⁷Itolu bala, Tekowankoolu le ye kara doo fanaa seyinkaŋ dadaa, ka bo tata jaŋ sooroori baa to, ka taa fo Ofeli Konkoo tatoo to.

²⁸Tintiñaa meŋ be Suu Dundaŋ Daa bala, piriisoolu le ye seyinkaŋ dadaaroo ke wo to, moo-wo-moo a faŋo la buŋo ñaatiliŋo la.

²⁹Itolu bala, Immeri dinkewo Sadoki le ye a faŋo la buŋo ñaatiliŋo seyinkaŋ dadaa. Ate bala, Sekaniya dinkewo Semaya, Tiliboo Dundaŋ Daa kantalaa, le ye seyinkaŋ dadaaroo ke.

³⁰Ate bala, Selemiya dinkewo Hananiya niŋ Salafi dinkee wooronjaŋo Hanuni, ye dulaa doo fanaa seyinkaŋ dadaa. Itolu bala, Berekiya dinkewo Mesullamu, ye a faŋo la buŋo ñaatiliŋo la le dadaa.

³¹Itolu bala, Malikiya, meŋ tarata sani numoolu kono, le ye seyinkaŋ dadaaroo ke. A ye a samba le fo Alla Batudulaa to dookuulaalu la buŋo to, a niŋ waafirilaalu, mennu be Kumbeŋ Dundaŋ Daa ñaatiliŋo la, aniŋ ka taa fo buŋ santonkoo to, tonkoŋo la.

³²Bituŋ buŋ santonkoo meŋ be tonkoŋo la, a niŋ Saajii Dundaŋ Daa teema, sani numoolu niŋ waafirilaalu le ye seyinkaŋ dadaaroo ke wo to.