Read Mandinka 2 Musa 15 Bible Online

2 Musa 15 - Mandinka bible

2 Musa 15

¹Bituŋ Musa niŋ Banisirayilankoolu ye ñiŋ suukuwo laa Yaawe* ye: “M be suukuwo laa la Yaawe ye le, kaatu a la semboo niŋ waroo yitandita le, a ye suwoolu niŋ ì borindilaalu bee fayi baa kono.

²N semboo ka bo Yaawe le bulu, n ka suukuwo laa ate le ye, a keta n tankandirilaa le ti. Ate le mu n na Alla ti, m be a jayi la le, m faamaa la Alla, m be a sikandi la le.

³Yaawe mu kelejawaroo le ti. Yaawe le mu a too ti.

⁴A ye Firawoona la kelediŋolu niŋ a la keleraŋ sareetoolu* bee fayi baa kono le. Firawoona la kelediŋ kende baalu tuta Kulunjumbe Baa kono.

⁵Baa diinoŋo ye ì muuri, ì tunenta diinoŋo to komeŋ beroo.

⁶Hee, Yaawe, i bulubaa buloo la sembe waroo! Hee, Yaawe! I bulubaa buloo la semboo le ye i jawoolu bee kasaara.

⁷I la mansayaa la waroo kaŋ, i ye i jawoolu bee faa. I ye i la kamfaa jawuyandi, a ye ì jani komeŋ siimaŋ kaloolu.

⁸I la niijiyo semboo ye baajiyo moolondi santo, a loota komeŋ sansaŋo, jiyolu mennu be baa dulaa diinondiŋ baa to, naata bambaŋ.

⁹“I jawoolu ye daa wara kumoolu fo ko, ‘M̀ be ì bayindi la, aduŋ m̀ be ì tarandi la le. M̀ be ì la naafuloo talaa la le, meŋ diyaata ǹ ye, m̀ be wo le taa la. M̀ be ǹ na hawusaroo* saba la, m̀ be ì bee kasaara la le.’

¹⁰Bari Yaawe, i la niijii kiliŋo meŋ bota i bala, wo le ye Misirankoolu bee tundi baa kono. Ì tunenta le komeŋ beroo, baa diinoŋo kono.

¹¹“Hee Yaawe! Jumaa le be alloolu kono, mennu niŋ ite mulunta? Jumaa le mulunta ko ite, i la mansayaa senuŋo, i la sembe waroo, i la kaawakuwolu?

¹²I ye i bulubaa buloo coodi, bankoo ye ì kunuŋ.

¹³“I la kanu bambaloo kaŋ, i ye i la moolu mennu tanka, i be i ñaatonkayaa la le. I la semboo kaŋ, i be ì kenkeŋ na le fo i la dinkiraa senuŋo to.

¹⁴Bankoolu be a moyi la le, ì be jarajara la, silaŋo be duŋ na Filisitinkoolu la le.

¹⁵Edomu alifaalu kijoolu be teyi la le, Mowabi ñaatonkoolu ye tu jarajaroo la, Kanaaninkoolu be jikilateyi la le,

¹⁶kija kuntoo aniŋ silaŋo le be boyi la ì kaŋ. Hee, Yaawe, kabiriŋ i la moolu be tambi kaŋ, i la moolu, i ye mennu bondi joŋyaa kono, ì jawoolu tuta tenkundiŋ ne komeŋ beroo.

¹⁷Hee Yaawe, i be i la moolu naati la le, aduŋ i be ì sabatindi la i la konkoo le kaŋ, dulaa meŋ, i ye a parendi ka ke i faŋo la dinkiraa ti, dulaa senuŋo meŋ, i faŋo le ye a dadaa.

¹⁸Yaawe be maraloo ke la le ka bo saayiŋ fo abadaa.”

¹⁹Kabiriŋ Firawoona la suwoolu, keleraŋ sareetoolu aniŋ suuborindilaalu dunta baa kono, Yaawe ye baajiyo murundi ì kaŋ, bari Banisirayilankoolu taamata banku jaaroo le kaŋ baa kono.

²⁰Bituŋ Miriyaamu, annabiyomu musoo, meŋ keta Haaruna baarimmusoo ti, ye tambuuroo taa, musoolu bee bulata a nooma, ì niŋ tambuuroolu niŋ doŋo.

²¹Miriyaamu ka ñiŋ ne laa ì ye: “Ali suukuwo laa Yaawe ye, kaatu a la semboo niŋ waroo yitandita le, a ye suwoolu niŋ ì borindilaalu bee fayi baa kono.”

²²Wo to le Musa ye Banisirayilankoolu ñaatonkayaa ka ì bondi Kulunjumbe Baa maafaŋo la ka duŋ Suri Keñewuloo kono. Ì taamata keñewuloo* kono le fo tili saba, bari ì maŋ jiyo je ì ñaa la.

²³Bituŋ ì taata fo dulaa to, ì ka a fo daameŋ ye Mara. Bari jiyo meŋ be jee, a kuyaata le fo moo maŋ a miŋ noo. Ñiŋ ne ye a tinna, ì ye a toolaa Mara[9] la.

²⁴Moolu woosiita Musa ye ko, “M̀ be muŋ ne miŋ na?”

²⁵Wo to le Musa kumboota Yaawe ye, aduŋ Yaawe ye babara telendaŋo yitandi a la. A ye a fayi jiyo kono, bituŋ jiyo naata diyaa. Yaawe ye yaamaroo ke, bituŋ a ye luwaa londi ì ye jee. Aduŋ a ye ì kotobo jee le fanaa to.

²⁶A ko, “Niŋ ali ye ali hakiloo tu nte Yaawe ali la Alla la ñiŋ kumoo to, kuwo meŋ tilinta, ali ye wo ke n ñaa koto, aniŋ ali ye n na yaamaroolu muta, ka n na luwaalu bee ke a ñaama, n te hani kuuraŋ kiliŋ ne naati la ali kaŋ ko ŋa meŋ ke Misirankoolu la. Kaatu nte le mu Yaawe ti, meŋ ka ali jaara.”

²⁷Bituŋ ì taata Elimu, daameŋ woyi taŋ niŋ fula aniŋ tamaree suŋ taŋ woorowula tarata jee. Ì daakaata jiyo daala jee.