Read Mandinka 2 Musa 24 Bible Online

2 Musa 24 - Mandinka bible

2 Musa 24

¹Bituŋ Yaawe* ko Musa ye ko, “I niŋ Haaruna si taa nte yaa, aniŋ Nadabu, Abihu, aniŋ Banisirayila alifaa taŋ woorowula. Ali ñanta baturoo ke la dulaa jaŋ ne to,

²bari Musa, ite dammaa le ñanta kata la nte Yaawe la, toomaalu maŋ ñaŋ na kata la n na. Banisirayilankoolu maŋ ñaŋ na futa la konkoo santo.”

³Kabiriŋ Musa taata, ka Yaawe la kumoo niŋ a la luwaalu bee sindi moolu ma, ì bee denta kaŋ kiliŋ ne la. Ì ko, “Yaawe ye feŋ-wo-feŋ fo, m̀ be a ke la le.”

⁴Wo to le Yaawe ye feŋ-wo-feŋ fo, Musa ye a bee safee. A saamoo soomandaa a wulita juuna, a ye sadaabodulaa* loo konkosiŋo to. A ye bere samasiŋ taŋ niŋ fula le ke jee, ka Banisirayila lasili taŋ niŋ fuloo yitandi.

⁵Bituŋ a ye Banisirayila fondinkewolu kii, ì ye jani sadaalu* bo Yaawe ye, aniŋ tuuraariŋ sadaalu, ka ì ke kayira sabatindiraŋ sadaalu ti.

⁶Musa ye yeloo kara kiliŋo taa, a ye a ke booloolu kono, kara doo, a ye wo sari sadaabodulaa kaŋ.

⁷A naata Kambeŋ Kitaaboo* taa, a ye a karaŋ moolu ye. Ì ye a jaabi ñiŋ ne la ko, “Yaawe ye feŋ-wo-feŋ fo, m̀ be a ke la le. M̀ be a horoma la le.”

⁸Musa ye yeloo kara doo taa wo le ñaama, a ye a sari moolu kaŋ, a ko, “Ñiŋ ne mu kambeŋo yeloo ti, Yaawe niŋ ali ye meŋ siti, aniŋ a la yaamaroolu.”

⁹Musa niŋ Haaruna, Nadabu niŋ Abihu, aniŋ Banisirayila alifaa taŋ woorowuloo taata konkoo santo,

¹⁰aduŋ ì ye Banisirayilankoolu la Alla je le. A siŋo koto ka muluŋ ne ko dulaa, meŋ teruta niŋ safiiri beroo[15] la, meŋ be seneyaariŋ ko saŋo baloo.

¹¹Bari Alla maŋ kuu ke Banisirayilankoolu la alifaalu ñinnu la, ì ye Alla je le, aduŋ ì ye domoroo niŋ miŋo ke.

¹²Yaawe ko Musa ye ko, “Naa fo m be daameŋ konkoo santo, i ye sabati jee fo waati. M be berewalaalu dii la i la le, aduŋ ŋa luwaalu niŋ yaamaroolu safee jee le, fo moolu si a karaŋ.”

¹³Bituŋ Musa niŋ a la maakoyilaa Yosuwa ye i paree. Musa taata Alla la konkoo santo.

¹⁴A ko alifaalu ye ko, “Ali m̀ batu jaŋ, fo niŋ m̀ muruta naŋ ali kaŋ. Haaruna niŋ Huri be tara la ali fee le, niŋ moo-wo-moo ye sonka kuu soto, ali si taa ì yaa.”

¹⁵Kabiriŋ Musa taata konkoo santo, minaayoo ye a muuri,

¹⁶aduŋ Yaawe la kallankeeyaa* tarata Sinayi Konkoo kaŋ ne. Minaayoo ye konkoo muuri le fo tili wooro, aduŋ tili woorowulanjaŋ luŋo la, Yaawe ye Musa kumandi ka bo minaayoo kono.

¹⁷Yaawe la kallankeeyaa meŋ be konkoo santo, mulunta Banisirayilankoolu ye le komeŋ dimbaa meŋ ka kasaaraloo ke.

¹⁸Bituŋ Musa dunta minaayoo kono, biriŋ a taata konkoo santo. A sabatita konkoo santo le fo tili taŋ naani aniŋ suuto taŋ naani.