Read Mandinka Yuuba 10 Bible Online

Yuuba 10 - Mandinka bible

Yuuba 10

¹N ñewunta n na baluwo faŋo le la. Wo kamma la, n te n deyi la n na bataa kuwo saatoo la. Meŋ ye a tinna n na baluwo be kuniyaa la m bulu, a ñanta finti la le.

²M be a fo la Alla ye le: Kana n halaki. A fo n ye, daliiloo meŋ ye a tinna, i be n tuumi la.

³Nte batandoo ye muŋ nafaa le soto ite ye? Muŋ ne ye a tinna i be balaŋ na feŋo to, ite faŋo ye meŋ daa? Muŋ ne ye a tinna, i be kuruŋolu bula la, ì la feere kuwolu be ñaatotaa soto la?

⁴Fo ite fanaa ka kuwolu juubee niŋ hadamadiŋ siloo le la baŋ? Fo i la ì fahaamuñaa ka ke le ko ntolu baŋ?

⁵Fo ite baluu tiloolu be dooyaariŋ ne baŋ, ko hadamadiŋolu taa be dooyaariŋ ñaameŋ? Fo i baluu saŋolu be dooyaariŋ ne baŋ, ko hadamadiŋolu taa be dooyaariŋ ñaameŋ?

⁶Fo wo le ye a tinna baŋ, i be korontoriŋ ka n na boyidaa ñini, aniŋ ka n na junube kuwo kisikisi?

⁷Ite ye a loŋ ne ko, nte maŋ boyi, aduŋ ko, moo te n tanka noo la ite bulu.

⁸Ite faŋo le ye nte daa, ite le ye m muluŋo ke n na, saayiŋ, ite le fanaa naata n kasaara.

⁹A loŋ ko, ite le ye n daa komeŋ potoo kitiŋo. Saayiŋ, fo i be m murundi la bankumunkoo ti le baŋ?

¹⁰Ite le ye n woyi ko keekewo, i ye n simbindi ko feenewo.

¹¹I naata n kuloolu sunkuru ñoo bala, niŋ fasoolu la, i ye ì muuri suboo la, aniŋ balajaatoo.

¹²I ye baluwo dii n na, i naata kanu bambaloo yitandi n na, aduŋ i la n na kuwo hakilituwo, wo le ye a tinna n tarata baluwo to.

¹³Bari ñiŋ kuwolu tarata maaboriŋ i kono le, aduŋ ŋa a loŋ ne ko, wo waatoo bee la ñiŋ ne be i hamoo to:

¹⁴I tarata n koroosi kaŋ ne, fo m be junube kuu ke la, niŋ i ye wo je, i te yamfa la n na junube kuwo la.

¹⁵Niŋ a ye a tara m boyita le, wo to kooroo boyita n kaŋ ne! Bari hani niŋ m boloota le fanaa, n te n sañoo wulindi noo la. Kaatu n dunta malu kuwo le kono, n tarata niitooroo kono.

¹⁶Niŋ ŋa n sañoo wulindi, i ye tara n deema kaŋ komeŋ jatoo, i ye n toorandi kotenke i sembe kaawakuwo la.

¹⁷I ye tu la seede kutoolu kii la n kaŋ, i la kamfaa n kamma ye lafaa kotenke, i ye naa bataa kuwo laa n ye ñoo kaŋ, komeŋ kelediŋolu ka ñoo faliŋ-faliŋ ñaameŋ.

¹⁸Muŋ ne ye a tinna i ye nte fintindi ka bo wuluuñaŋo kono? Nte ñanta faa la le, janniŋ ñaakesoo ka boyi n kaŋ.

¹⁹Ka bo wuluuñaŋo kono doroŋ, ì ye n tentendi kaburoo kono. A ye ke ko n nene maŋ soto.

²⁰Fo nte baluu tiloolu maŋ ke dantaŋ doroŋ ne ti baŋ? M bula m faŋ ma, ŋa niiseewoo soto waatoo kono, meŋ too tuta n siyo to.

²¹A te mee la, m be taa fureeduu, daameŋ dibi baa be jee, daameŋ moo buka bo jee, ka muru naŋ jaŋ kotenke.

²²Ñiŋ dulaa to, maloo nene buka soto jee. Ñiŋ dulaa to, diboo doroŋ ne ka tara jee, aniŋ jaakaloo.