Read Mandinka Yuuba 12 Bible Online

Yuuba 12 - Mandinka bible

Yuuba 12

¹Bituŋ Yuuba naata jaabiroo ke ko:

²Ñiŋ maŋ m moonee, alitolu le hakiloo diyaata moolu ti, alitolu le niŋ ñaameŋo be faa la ñoo la.

³Bari m fanaa ka fahaamuroo ke le, ko ali ka a ke ñaameŋ. Ali maŋ fisiyaa n ti. Moo bee le ye ñiŋ kuwo loŋ teŋ, ko ali ye a fo ñaameŋ.

⁴N keta jelefeŋo ti n teeroolu ye, Alla ye i danku nuŋ nte meŋ na kiliroo la. Nte moo tilindiŋo meŋ maŋ sootaari soto, nte le keta jelefeŋo ti teŋ.

⁵Moolu mennu ka tara dahaa kono, ka jutu moo fala kuyaariŋo la le. Moo meŋ be naa duŋ na bataa kuwo kono, ì ka a dundi kuu a kono le.

⁶Suŋolu yaa ka tara sumayaariŋ ne, aduŋ Alla sookilaalu fanaa ka tara tankoo kono le. Ì ka tara jikiriŋ ì fansuŋ semboo le la ko i la Alla.

⁷Bari ali daafeŋolu ñininkaa, ì be ali so la londoo la le. Ali kunoolu ñininkaa, ì be a fo la ali ye le.

⁸Ali duniyaakono fiifeŋolu ñininkaa, ì be ali so la londoo la le, ali baakono ñewolu ñininkaa, ì be a fo la ali ye le.

⁹Wolu bee ye a loŋ ne ko, Yaawe* le mu ì Daamansoo ti.

¹⁰Niilamaa feŋo bee siyo be ate le bulu, aduŋ hadamadiŋo bee fanaa niyo be ate le bulu.

¹¹Fo tuloo buka kumoo moyi baŋ, ko neŋo ka domoroo nene ñaameŋ?

¹²Ì ko, ñaameŋo be keebaayaa le bulu, fahaamuroo be sii jaŋayaa bulu.

¹³Bari ñaameŋo niŋ semboo be Alla le bulu, ate le mu yaamaroo diilaa ti, aniŋ fahaamuroo.

¹⁴Niŋ a ye feŋo meŋ tiñaa, moo te a dadaa noo la. Niŋ a ye moo meŋ soroŋ, moo te a fintindi noo la.

¹⁵Niŋ a ye samaajiyo muta, feŋo bee si jaa. Niŋ a ye a buloo bo a koto, bankoo si kasaara.

¹⁶Semboo be ate le bulu, a buka kori kuu la, moo filiriŋo niŋ filindirilaa be ate le bulu.

¹⁷Ate le ka yaamarilaa ñaamendiŋo kenseŋyandi, a ye kiitindirilaa tooleeyandi.

¹⁸Ate le ka mansakewo la maraloo semboo taa a bulu, a ye a ke komeŋ joŋo.

¹⁹Ate le ka piriisoo* la piriisiyaa taa a bulu, a ye sembetiyo la semboo taa a bulu.

²⁰Ate le ka moo deyindi, jikoo be meŋ na kuwo to, a ye keebaa kotoo la ñaameŋo taa a bulu.

²¹Ate le ka kandaa malundi, a ye sembetiyo la semboo daŋ.

²²Ate le ka diboo la kuwolu lankenemayandi, a ye naa dibi baa ke maloo ti.

²³Ate le ka bankoo la kuwo warandi, a ye naa a la kuwo dooyandi. Ate le ka bankoo ke banku baa ti, a ye naa a moolu bee wudaayindi.

²⁴Ate le ka duniyaa mansoolu la ñaameŋo taa ì bulu, a ye ì yaayindi kenseŋ.

²⁵Ì ye tara moomooroo la diboo kono, ate le ka ì timili-tamalindi komeŋ dolomintoo.