Read Mandinka Yuuba 13 Bible Online

Yuuba 13 - Mandinka bible

Yuuba 13

¹Ŋa meŋ bee fo teŋ, m faŋo le ye a je n ñaa la. Ŋa a moyi n tuloo la, aduŋ ŋa a fahaamu le.

²Ali ye meŋ loŋ, m fanaa ye wo le loŋ, aduŋ ali maŋ fisiyaa n ti.

³Bari nte be diyaamu la Alla Tallaa le ye, aduŋ m be lafi la le n niŋ a ye n na kuwo kiitii ñoo kaŋ.

⁴Alitolu ye ali la lombaliyaa dendendi faniyaa kumoolu le la. Ali ye ali faŋ ke jaaralilaa ti, ali te hani moo jaara noo la.

⁵Niŋ ali tuta deyiriŋ nuŋ, wo le mu ali la ñaameŋo ti.

⁶Ali i lamoyi famfaŋ n na daliiloo la, niŋ m be n na kuwo keñaa yitandi kaŋ.

⁷Ali si faniyaa kumoo fo noo Alla too la baŋ, ali ye neeneeri kumoo fo a tooyaa la?

⁸Ali be ñiŋ ne kata kaŋ baŋ ka loo a ye? Alitolu le be loo la a ye kiitii kenoo to baŋ?

⁹Fo a si beteyaa alitolu faŋo la karoo la baŋ, niŋ a ye ali la kuwo kisikisi? Ali si ate feere noo baŋ, ko ali si hadamadiŋolu feere noo ñaameŋ?

¹⁰A be alitolu le faŋo jalayi la, niŋ ali ye moo faasaa kulloo kono.

¹¹Fo a la mansabaayaa waroo te ali silandi la baŋ, a la kuwo silaŋo ye duŋ ali la?

¹²Ali la kuma kotoomaalu mu foño kenseŋo le ti. Ali la faŋ koto bambaŋ kumoolu maŋ bambaŋ.

¹³Ali i deyi, m fanaa ye diyaamu. Kuwo meŋ be naa ke la n na, a ye ke.

¹⁴M be n ñimmakiŋ na muŋ ne la? M pareeta le ka n niyo laa m buluteetewo kono.

¹⁵Jiki te n na kuwo to, a be m faa la le, bari fo ŋa n na kuwo laa a ñaa koto.[6]

¹⁶Niŋ n loota a ñaatiliŋo la, wo le be ke la n na kiisoo ti, kaatu moo kuruŋo buka loo noo a ñaatiliŋo la.

¹⁷Ali ali tuloo loo n na kumakaŋolu la, a ye duŋ ali tuloo kono.

¹⁸Fo ali maŋ a je, m pareeta le ka n na kuwo keñaa yitandi. A koyita m ma le ko, m be boloo la le.

¹⁹Jumaa le si soŋ fo noo nte ma? Niŋ wo si soto, wo to nte be n deyi la le, ŋa faa.

²⁰N te m faŋ maabo la ite Alla ma, niŋ i ye ñiŋ kuu fuloo ke n ye:

²¹I buloo jamfandi n na fereŋ, aniŋ i ye i dahaa ka n silandi.

²²Wo to i foloo ye diyaamu, nte si naa i jaabi, waraŋ i ye m foloo bula ŋa diyaamu, i si naa n jaabi.

²³Ŋa boyidaa nankamu aniŋ junube nankamu jelu le ke? N na junuboo niŋ n na tooñeeridaa yitandi n na.

²⁴Muŋ ne ye a tinna i ye i ñaa kaasi n na, i ye m muta ko i jawoo?

²⁵Fo i ka nte jamba kenseŋo le silandi baŋ, foñoo ka meŋ tindi? I ka fuufulewo le bayindi baŋ?

²⁶Ite le ye kuu jawoolu safee n kunto. I ye n joo n na fondinkeeyaa junube kuu baaroolu le la.

²⁷I ye n kada, wo ñaa-wo-ñaa ŋa simfaa-wo-simfaa taa i ka tara n koroosi kaŋ, hani n siŋ noolu i ka tara ì koroosi kaŋ ne.

²⁸Wo le ye a tinna m be tiñaa kaŋ, n keta komeŋ babara toliŋo. N keta komeŋ bayoo, tumboolu dunta meŋ na.