Read Mandinka Yuuba 14 Bible Online

Yuuba 14 - Mandinka bible

Yuuba 14

¹Hadamadiŋo meŋ, a ka wuluu ka bo musoo le kono, a baluu tili maŋ siyaa, a bee be faariŋ nambaroo la.

²A la kuwo be le komeŋ firoo ka finti ñaameŋ, a ye naa noro. A ka yeemaŋ ne komeŋ niiniyo, a buka tu keriŋ.

³Feŋo meŋ be ko teŋ, fo ite Alla be i ñaa loo la wo kaŋ ne baŋ? Fo i be n samba la kiitiyo la le baŋ?

⁴Hadamadiŋo maŋ seneyaa, feŋ senuŋ si bo noo a bala ñaadii le?

⁵Hadamadiŋo la baluwo ye dandulaa le soto. Ite Alla, ite le ye a baluu tiloo nankamoo loŋ, a te tambi noo la meŋ na.

⁶A bula, i ye a doroŋ fili a faŋ ma, a ye dahaa soto, komeŋ tili dookuulaa meŋ pareeta a la dookuwo la.

⁷Jikoo ka tara yiroo la kuwo to le, ì ye meŋ kuntu, a si baluu noo kotenke le, a ye soroŋ.

⁸Hani niŋ a suloolu kotoota bankoo kono, a kuntundaŋo be naa faa la bankoo kono,

⁹bari niŋ a ye hani jiyo domandiŋ soto doroŋ, a si soroŋ, a ye bulu kutoolu fintindi, komeŋ yiri faliŋ kutoo.

¹⁰Bari hadamadiŋo, niŋ a faata, a daŋo bee ka ke wo le ti. Wo to a ka tara mintoo le, niŋ a maŋ tara keriŋ?

¹¹Ko baajiyo ka jaa ñaameŋ, aniŋ boloŋo jiyo ka loo ñaameŋ, a ye jaa,

¹²hadamadiŋo la kuwo misaaloo be teŋ ne. Niŋ a faata, a te wuli la hani niŋ saŋ fatoolu bee yeemanta, a te wuli la saayaa kono kotenke.

¹³M be lafi la ñiŋ ne la, i ye n samba laakira, ŋa tara maaboriŋ jee, fo niŋ i la kamfaa banta. Bituŋ i ye naa waatoo londi, i be kali la n na kuwo kalamuta la meŋ na.

¹⁴Niŋ hadamadiŋo faata, fo a be wuli la le koteŋ baŋ? M be tara la muñariŋ n na bataa luŋolu bee kono le, fo janniŋ m firiŋ luŋo.

¹⁵I be n kumandi la le, aduŋ m be n danku la i ma le. N na kuwo be naa i meeyaa la le, ite meŋ ye n daa.

¹⁶Wo to, i be tara la n simfaañaalu yaatee kaŋ ne, bari i te tara la n na junube kuwolu koroosi la.

¹⁷N na junube kuwolu bee be kafu la ñoo ma bootoo le kono, i ye ñina ì la, i be n na baara jawoolu tuutuu la le.

¹⁸Hani konkoo, a ka boyi le, a ye janjaŋ, aduŋ bere baa fanaa ka bo noo a noo to le.

¹⁹Jiyo ka beroolu kunkaŋo koosa le, sanji baa ka bankoo kunkaŋo koosa, wo to, ite le ka hadamadiŋo la jikoo tiñaa.

²⁰Ite le ka a kasaara niŋ i semboo la, a ye taa yereŋ. Ite le ka a muluŋo faliŋ, i ye a la kuwo daŋ.

²¹A diŋolu si tara kuliyaa kono, ate te a loŋ noo la. Ì si tara noo dooyaa kono, ate te a kalamuta noo la.

²²Hadamadiŋo ka a faŋo la bala dimoo doroŋ ne kalamuta noo, aniŋ a faŋo niyo la kuyaa.