Read Mandinka Yuuba 15 Bible Online

Yuuba 15 - Mandinka bible

Yuuba 15

¹Bituŋ Elifasi Temaninkoo naata jaabiroo ke ko:

²Yuuba, fo moo ñaamendiŋo si jaabiroo ke niŋ kuma kenseŋolu la baŋ, ka i daakumoolu ke foño baa kenseŋo ti?

³Muŋ ne ye a tinna i be i faŋ sansaŋ na niŋ kuma kenseŋolu la? I la kumakaŋolu maŋ nafaa soto.

⁴I ka Alla ñaasilaŋo kuwo le jindi, aniŋ i ka Alla batoo la kuwo yomfandi.

⁵I maŋ tara sila tilindiŋo kaŋ, wo le ye a tinna i ka diyaamu teŋ. Bituŋ i ka a dendendi niŋ feere kumoolu la.

⁶I faŋo fokumoolu le ye i boyindi, nte te. I faŋo daa le ye i duŋ.

⁷Fo ite le mu hadamadiŋ foloo ti baŋ, meŋ wuluuta? Fo ite le foloo fintita konkoolu ñaa baŋ?

⁸Fo i nene maabeeta Alla la beŋo to le baŋ? Fo ñaameŋo kuwo danta ite doroŋ ne la baŋ?

⁹Ite ye muŋ ne loŋ, ntolu maŋ meŋ loŋ? Ite ye muŋ kuu le fahaamu, meŋ maŋ seneyaa ntolu ma?

¹⁰Keebaa kuntiña koyoolu, mennu siyaata i faa ti, wolu le ye ntolu karandi ñaameŋo la.

¹¹Fo ñiŋ maŋ kaañaŋ i fee baŋ, Alla faŋo ye naa ka i jusoo ñabu? Ntolu tarata diyaamu kaŋ i ye mooyaa kono niŋ ate le tooyaa la.

¹²Bari i hakiloo le ye i jamfaa. Muŋ ne ye a tinna i be i ñaa kuyaa la?

¹³Muŋ ne ye a tinna i be kamfaa la Alla kamma, ka ñiŋ kuma siifaalu bondi i daa kono?

¹⁴Hadamadiŋo mu muŋ ne ti, fo meŋ be a tinna la a be seneyaa la, musoo ye meŋ wuluu, fo meŋ be a tinna la wo be tiliŋ na?

¹⁵Alla maŋ laa hani a la malaayikoolu faŋolu le la, aduŋ hani saŋ fatoolu maŋ seneyaa a ñaa koto,

¹⁶sako hadamadiŋo meŋ be ñewundiŋ, a be tiñaariŋ, a ka tu kuu kuruŋ kewo la, ko a ka jiyo miŋ ñaameŋ.

¹⁷I lamoyi ŋa kumoo koyindi i ma, m batu ŋa a fo i ye, ŋa meŋ je.

¹⁸Moo ñaamendiŋolu le ye nte karandi, aduŋ wolu ye a soto ì mumuñolu le bulu.

¹⁹Alla le ye bankoo dii ñiŋ alifaalu dammaa la, aduŋ luntaŋ maŋ tara ì kono ka ì la yaa faliŋ.

²⁰Moo kuruŋo ka a baluu tiloo bee ke niitooroo le kono, fitinamoo ka a la baluwo bee ke bataa le kono.

²¹Silaŋ kumoolu doroŋ ne ka tara a tuloolu kono, aduŋ hani niŋ kayiroo be keriŋ, ate ka tara i yillaariŋ boyinkandiroo le la.

²²A te ñiŋ lannoo soto noo la ko, a si kana noo maasiiboo ma le, a ye ñiŋ ne loŋ ko, hawusaroo* le be a faa la.

²³A hakiloo ka tara ñiŋ ne kaŋ ko, duwoolu le be a furewo batu kaŋ. A koyita a ma le ko, a la kasaaroo baayiñaa te wo la.

²⁴Mantooroo niŋ niikuyaa le ka a kijabo. Ì ka a boyinkaŋ ne, ko mansakewo ka boyinkandiroo ke ñaameŋ.

²⁵Hadamadiŋo la kuwo be laariŋ teŋ ne, meŋ ye kurupeñoo dadaa Alla Tallaa kamma, ka haañi i loo laa Alla fee.

²⁶A boriŋ-borintoo ye Alla waliŋ fitinoo la, a niŋ koteeri* bambandiŋo.

²⁷A be nunkuriŋ fo a kaaraalu bee fintita, a tewo be kufukufuriŋ.

²⁸A be tara la sabatiriŋ tumbuŋ saatewolu le to, buŋolu kono, moo maŋ ñaŋ na tara la mennu to, buŋolu mennu loota kasaaroo kamma.

²⁹Ñiŋ moo siifaa te tu noo la fankoo kono, a la fankoo te labaŋ noo la, a la fankoo te janjaŋ noo la bankoo bee kaŋ.

³⁰Aduŋ a te kana noo la saayaa ma. A la kuwo be muluŋ na le komeŋ yiroo, dimbaa ye meŋ buloolu buruburu, foñoo ye a firoolu bee konkoŋ a bala.

³¹A kana a faŋ neenee ka laa feŋ kenseŋo la, nafaa te tara la a ye meŋ to.

³²A be a la joo soto la le, janniŋ a ka faa. A la kuwo be muluŋ na le komeŋ yiribulu jaaroo, meŋ te soroŋ noo la kotenke.

³³A be muluŋ na le komeŋ wayini* yiroo, meŋ diŋolu bee jolonta, janniŋ ì moo waatoo ka sii, olifu* yiroo meŋ ye a firoolu bee joloŋ.

³⁴Moo kuruŋ kafoo te jiidi noo la, dimbaa le be ì yaalu jani la, ì ye mennu loo dukufeŋolu la.

³⁵Ì ka tara konomaariŋ feere kuruŋolu le la, ì ye taa maasiiba jawoo wuluu. Jamfaa kuwo doroŋ ne ka naa finti ì la karoo la.