Read Mandinka Yuuba 16 Bible Online

Yuuba 16 - Mandinka bible

Yuuba 16

¹Bituŋ Yuuba ye jaabiroo ke ko:

²Ŋa ñiŋ siifaa jamaa le moyi. Ali ko, ali naata n sabarindi le, bari alitolu bee mu moo niitoorandilaa doroŋ ne ti.

³Fo alitolu la kuma kenseŋ foo, wo buka dandulaa soto baŋ? Muŋ ne laata ali kaŋ, ka tara diyaamu kaŋ doroŋ?

⁴Meŋ be laariŋ n kaŋ, niŋ a be laariŋ alitolu le kaŋ, ali ka diyaamu teŋ ñaameŋ, m fanaa si diyaamu noo wo ñaama le. N si kumoolu tembendi noo le, ka ì fo ali ma, ŋa n kuŋo fitifiti ali ye.

⁵N daakumoo si ali wakiilindi noo le, n neŋo kumoo la diyaa ye dimoo bo ali kaŋ.

⁶Niŋ n diyaamuta, wo te n na dimoo sika la n kaŋ, aduŋ niŋ n tuta deyiriŋ, wo fanaa te a jaara la.

⁷Tooñaa-tooñaa, Alla le ye n korindi, a ye n na moolu bee kasaara.

⁸A ye m balajaatoo fasandi, m baloo bee banta. Moolu ka ì la kumoo dendendi niŋ ñiŋ ne la ko, ŋa junube kuwo le ke.

⁹A ye n teleŋ-teleŋ ñoo bala kamfaa kono, a ye a jusoo kandindi n kamma, a ye a ñaa loo n kaŋ konnanteeyaa le kono.

¹⁰Moolu ka naa ñoo bendi n kamma, ka ì daalu yele ka kuma fo m ma, ì ye n tamoo fadi ka n ñaawali.

¹¹Alla ye nte duŋ moo jawoolu le bulu, a ye n duŋ moo kuruŋolu la maroo koto.

¹²N na kuwo bee le be beteyaariŋ nuŋ, bari ate le ye n tiñaa. A ye m muta n toŋo le to, a ye n kasaara. Nte le keta moo ti, a ye a ñaa loo meŋ kaŋ.

¹³A la kalabeñoolu ye n kuru karoo bee la, a ye n kookiloo soo, a ye n kunaŋ-kunaŋo boŋ bankoo to, wo maŋ hani a balafaa.

¹⁴A ye n teleŋ-teleŋ, a kirimbaasita n kaŋ komeŋ kelejawaroo.

¹⁵Ŋa booto funtoolu duŋ ka woosii, n dooyaa moomaa be siiriŋ bankoo to.

¹⁶N kumboota fo n ñaasiŋolu yiibuta, fo n ñaakesoolu dunta konoto.

¹⁷M maŋ fitina kuu-wo-kuu le ke, aduŋ n na Alla batoo seneyaata le.

¹⁸Bankoo, dukaree kana n yeloo maabo! Allamaa n woosiikaŋo kana nukuŋ.

¹⁹A be koyiriŋ ne saayiŋ ko, n seedoo be Arijana le kono, a si n seedeyaa santo jee.

²⁰N teeroolu ye n tooñee, n ñaajiitoo ye n ñaa tiliŋ Alla la ka m maakoyi.

²¹N seedoo ye loo n ye Alla ñaatiliŋo la, ko moo ka loo a teeri ye ñaameŋ.

²²Sanji dantaŋ ñaato, m be taa niŋ siloo le la, aduŋ n te muru la naŋ kotenke.