Read Mandinka Yuuba 17 Bible Online

Yuuba 17 - Mandinka bible

Yuuba 17

¹N niyo korita, m baluu tiloolu be naa baŋo le la, kaburoo le ka m batu.

²Ñaawalilaalu ye n kuru, m faŋo ñaa le loota ì la jawuyaa kuwo kaŋ.

³Alla, ite faŋo le be nte sankayaa la. Jumaa le si nte sankayaa noo ite koolaa?

⁴Baawo ite faŋo le ye ì sondomeñaalu suki fo ì kana fahaamuroo ke noo, wo kamma la, i kana ì sawoo londi.

⁵Fo i be a ke kaŋ ne baŋ, ko kuma kotoomaa ye a fo ñaameŋ? Niŋ moo ye a teeroolu jamfaa tinewo kamma, a diŋolu ka toora le.

⁶Alla ye n ke jelefeŋo le ti moo bee ye, moo meŋ, moolu ka daajiyo fayi a ñaadaa kaŋ.

⁷Niitooroo ye n ñaalu dibindi, m baloo keta ko koloma jaaroo.

⁸Moolu mennu ye a miira ko, itolu tilinta le, aduŋ ì maŋ sootaari soto, wolu bee jaakalita ñiŋ kuwo la le, bituŋ ì ye a muta ko, nte mu moo kuruŋo le ti.

⁹Bari moo meŋ tilinta, wo be tu la a la siloo le kaŋ, aduŋ moo meŋ buloolu seneyaata, semboo be tu la wara la le doroŋ.

¹⁰Bari ali naa, ali bee, ali ye a kata kotenke! N te moo ñaamendiŋo tara la ali kono.

¹¹M baluu tiloolu banta, n na feeroolu janjanta, aniŋ n hame kuwolu.

¹²N teeroolu ko, suutoo mu tilibuloo le ti, maloo be jaŋ ne, a keta diboo ti ñaa-wo-ñaa.

¹³M maŋ jiki soto, fo kaburoo meŋ be naa ke la n yaa ti, daameŋ m be n na laaraŋo loo la jee diboo kono.

¹⁴M be kaburu dinkoo le kumandi la m faa ti, ŋa tumboolu kumandi m baa ti, aniŋ m baarimmusoolu.

¹⁵Nte la jikoo be tara la muŋ ne kaŋ? Jumaa le ye jiki koteŋ je nte la karoo la?

¹⁶Fo n niŋ jikoo ñiŋ be taa ñoo la kaburoo kono le baŋ? Fo n niŋ a be saareŋ na ñoo la le baŋ, ka ke bankumunkoo ti?