Read Mandinka Yuuba 19 Bible Online

Yuuba 19 - Mandinka bible

Yuuba 19

¹Bituŋ Yuuba naata jaabiroo ke ko:

²Alitolu be i dahaa la nte niyo toorandoo la waati jumaa le la, aniŋ ka tara n dimindi la kumakaŋolu la?

³Ko siiñaa taŋ, ali naata le ka n dooyaa. Ali te malu la baŋ ka tu la n neŋ na teŋ?

⁴Niŋ a ye a tara tooñaa le mu ko, nte maŋ tara sila kendoo kaŋ, n na jenkoo, wo tuta nte faŋo le bulu.

⁵Alitolu ye ali faŋolu ke le ko alitolu le fisiyaata nte ti, bituŋ ali ka n na malu kuwo taa ka n dooyaa a la.

⁶Fo ali maŋ ñiŋ loŋ ko, Alla faŋo le ye ñiŋ laa nte kaŋ? Ate faŋo le ye a la jaloo miniŋ n na.

⁷N woosiita, fitina kuwo meŋ laata n kaŋ, dankuru maŋ ke n na kuwo to. Ŋa deemaaroo ñini, bari tooñaa maŋ soto.

⁸Alla le ye siloo soroŋ, m maŋ tambi noo. A ye m fili diboo kono ka siloo ñini m faŋ ye.

⁹Ate le ye n na fankoo bee taa, a ye horomoo bondi n kaŋ.

¹⁰Ate le ye n jasi karoo bee la, fo m banta. A ye n na jikoo taa m bulu, komeŋ niŋ i ye yirisuŋo wutu.

¹¹A ye a la kamfaa jindi n kaŋ, ka m muta ko a jawoo.

¹²A ye a la kelediŋ kafoolu bendi ñoo kaŋ, ì ye sapoolu dadaa ka n suki, ka daakaa loo n na tiriliisoo* karoo bee la.

¹³A ye m baadiŋolu bee jamfandi n na, n lombaalu bee keta n ye luntaŋolu ti.

¹⁴N siiñoolu bee ye ì koo dii n na, n teeroolu bee ñinata n na.

¹⁵N na kumpaborilaalu, hani n na joŋ sunkutoolu bee le ye m muta komeŋ luntaŋo. N keta ì ñaa koto ko bantalankoo.

¹⁶Ŋa n na dookuulaa kumandi, a maŋ n danku, fo nte faŋo le muruta ka a daani.

¹⁷N niijiyo keta m musu ye tanoo ti, m baadiŋolu ñewunta n na.

¹⁸Hani dindiŋolu bee le ka jutu n na, niŋ m fintita naŋ, ì ye n ke jelefeŋo ti.

¹⁹N teeroolu bee jututa n na, n kanuntewolu yelemata n kaŋ jawuyaa siloo la.

²⁰M balajaatoo bee banta n kuloolu bala, domandiŋ ne ye m bali faa la.

²¹Ali balafaa soto n ye, n teeroolu, ali balafaa soto n ye, kaatu Alla faŋo buloo le laata n kaŋ.

²²Muŋ ne ye a tinna alitolu fanaalu be n nooma la teŋ, ko Alla tarata n nooma ñaameŋ? Fo n na dimoo bataa maŋ kaañaŋ ali fee baŋ?

²³Ñiŋ ne be diyaa la n ye, m fokumoolu ye tara safeeriŋ, moo ye soto ka ì safee kitaaboo kono.

²⁴A ye ì safee niŋ neekalaa la neefaataa bala, waraŋ berewalaa bala, ì ye tara jee fo fawu.

²⁵Bari nte ye a loŋ ne ko, n kiisandirilaa, wo be baluuriŋ ne, aduŋ ate le be loo la n ye kuwo labandulaa ñiŋ duniyaa kono jaŋ.

²⁶M balajaatoo tiñaata ñaa-wo-ñaa, m baloo bee banta ñaa-wo-ñaa, bari hani wo, m be Alla je la le.

²⁷M be a je la le, m faŋo ñaalu le be loo la a kaŋ. N te ke la a fee luntaŋ ti. Ñiŋ ne mu kuwo ti, n hakiloo be looriŋ meŋ kaŋ kat.

²⁸Niŋ ali ka a fo ko, “M̀ be a toorandi la le,” aniŋ ka a fo ko, “A faŋo le ye a saabu a faŋ ma,”

²⁹wo to ali fanaalu ye ali hakiloo tu, hawusaroo* kana ali fanaa maa. Kaatu ali la kamfaa kuwo ñiŋ mu junuboo le ti, meŋ jaraboo jarita hawusaroo la. Ali a loŋ ko, kiitiyo luŋo sotota le.