Read Mandinka Yuuba 21 Bible Online

Yuuba 21 - Mandinka bible

Yuuba 21

¹Bituŋ Yuuba ye jaabiroo ke ko:

²Ali ali tuloo loo n na kumakaŋolu la kendeke, ali si n sabarindi noo ñiŋ dammaa le la.

³Ali ali faŋ muta, niŋ m be diyaamu la. Niŋ n diyaamuta fokabaŋ, ali si naa n ñaawali.

⁴Fo nte ye n na kuwo dunoo laa hadamadiŋ ne kaŋ baŋ? Hanii! Ŋa daliila koyoo le soto ka muñabaliyaa.

⁵Ali n juubee, ali ye kaawa, ali ye ali buloo ke ali daa to.

⁶Niŋ ŋa m miira ñiŋ na, silaŋo le ka duŋ n na, m baloo bee ye jarajara.

⁷Muŋ ne ye a tinna moo kuruŋolu ka baluu noo, ì ye taa fo ì ye keebaayaa, aduŋ ì semboo ka tara lafaa kaŋ?

⁸Ì diŋolu la kayira kuwolu ka ke ì ñaa la, ì ka ì mamariŋolu je.

⁹Ì ka tara kayiroo kono ì la koridaa kono, aduŋ ì buka silandaa kuu soto. Alla la busoo buka naa ì kaŋ.

¹⁰Ì la ninsituuraalu ka kosiroo ke, ì la ninsimusoolu ka konoo taa, ì konoo buka bo.

¹¹Ì ka ì diŋolu bula ì ka tara tuluŋ kaŋ ko saajiiriŋolu. Ì ka tara sawuŋ-sawuŋ kaŋ ì daala.

¹²Itolu ñiŋ moo kuruŋolu ka tara denkili laa la, tambuuru kosoo, aniŋ kontiŋ kosoo. Ì ka tara ì faŋ seewondi kaŋ footaŋo kumakaŋo la.

¹³Ì ka ì la baluu tiloolu bee ke niidiyaa le kono, ì ñiimaa ye taa kaburoo kono.

¹⁴Hani wo bee, ì ka a fo Alla ye le ko, “M̀ bula m̀ faŋ ma! Ntolu maŋ tara lafiriŋ ka i la siloolu loŋ.

¹⁵Jumaa le mu Alla Tallaa ti, fo meŋ be a tinna la ntolu be a batu la? Ntolu la a daanoo be muŋ nafaa le soto la ǹ ye?”

¹⁶Ñiŋ moo kuruŋolu ye ñiŋ ne muta ko, ì la firiŋo be ì faŋo le bulu, bari nte maŋ haaji soto wo miira siifaa to.

¹⁷Fo moo kuruŋolu ka kerefaa le baŋ? Fo maasiiba kuu le nene ka boyi ì kaŋ baŋ? Fo Alla nene ka a la jaraboo jindi naŋ ì kaŋ ne baŋ, a la kamfaa waatoo kono?

¹⁸Fo foñoo nene ka ì fee le ko siimaŋ kaloo baŋ, waraŋ foño baa ye ì samba ko fuufulewo?

¹⁹Alitolu le ko, Alla buka jaraboo laa moo kuruŋolu kaŋ ì la junube kuwo kamma la, a ka a laa ì diŋolu le kaŋ. Bari Allamaa Alla ye ì la juloo joo ì faŋolu to, ì si a loŋ, ì ye meŋ baara.

²⁰Allamaa ì faŋo ñaakesoolu ye loo ì la kasaaroo kaŋ, ì ye Alla Tallaa la kamfaa jiimaa miŋ.

²¹Niŋ ì la waatoo banta, ì diŋolu la kuu buka bula ì kono kotenke.

²²Fo moo si soto noo baŋ, meŋ si Alla karandi noo londoo keñaa la, ate meŋ ka hani malaayikoolu kiitindi?

²³Moo doolu taata le fo ì faata, ì balajaatoo be kereyaariŋ. Ì maŋ silandaa kuu-wo-kuu soto.

²⁴Ì balajaatoolu be faariŋ tep, ì kuloolu be bambandiŋ kat.

²⁵Doolu faata niitooroo kono, ì nene maŋ niidiyaa kuu nene.

²⁶Bari ì bee ye ì laa ñoo kaŋ kaburoo kono le, tumboolu muurita ì bee la.

²⁷Ŋa ali la miiroolu loŋ ne saayiŋ, aniŋ ali la feeroolu ka n tiñaa.

²⁸Ali kumata le ko, wo moo baa la buŋo be mintoo le, aniŋ tiriliisoo* meŋ, moo kuruŋolu tarata sabatiriŋ a kono?

²⁹Fo ali nene ka moolu ñininkaa le baŋ, mennu taamata? Ali ye ali hakiloo tu ì fokumoolu to le baŋ?

³⁰Alla la kamfaa luŋo la, aniŋ a la jarabiroo luŋo la, mennu ka kana, tana buka ke ì la, wolu le mu moo kuruŋolu ti.

³¹Jumaa le ka haañi ka ì la kuruŋyaa kuwo waañaari ì ye ì ñaatiliŋo la? Jumaa le ka ì joo ì kebaaroo la?

³²Niŋ ì taata ì dandaŋ kaburoo to, ì ka tara ì la kaburoolu kanta kaŋ ne.

³³Kafu baa si bula ì furewo nooma, aduŋ moolu mennu ka tara ñaato, wolu fanaa buka yaatee noo. Hani kaburoo faŋo be sooneeyaa la ì ye le.

³⁴Alitolu si nte jusoo sumayandi noo ñaadii le ali niŋ ali la kuma kenseŋolu? Feŋ maŋ tara ali la jaabiroolu kono fo faniyaa!