Read Mandinka Yuuba 22 Bible Online

Yuuba 22 - Mandinka bible

Yuuba 22

¹Bituŋ Elifasi Temaninkoo ye jaabiroo ke ko:

²Hadamadiŋo si muŋ nafaa le soto noo Alla ye? Hani a ñaamendiŋ baa ye muŋ nafaa le soto a ye?

³Niŋ i keta moo tilindiŋo ti, wo be muŋ jusulaa kuu le dii la Alla Tallaa la, waraŋ niŋ i taaraŋ siloolu maŋ sootaari soto, wo be muŋ tinee le dii la a la?

⁴Fo i ye a miira le ko, i la Alla ñaasilaŋo wo le ye a tinna a ye jaraboo laa i kaŋ ka i samba kiitiyo ñaatiliŋo la?

⁵Hanii, i la kuu kuruŋolu le siyaajawuta, aduŋ i la junube kuwolu maŋ dandulaa soto.

⁶I ka sankoo kaniŋ i baadiŋolu bulu, a buka ke daliila kaŋ ti. I ka kewolu la duŋ feŋolu wura ì la, i ye ì kenseŋo bula.

⁷I buka jii dii moo bataariŋolu la ka i miŋ, i ka konkotoolu bali domoroo la.

⁸I ye i la semboo taa, aniŋ i la makaamoo ka bankoo kenoo bee taa.

⁹I ka furuyaamusoolu bayi ì bulu kenseŋo, i ka aliyatiimoolu la jikiraŋo tiñaa.

¹⁰Wo le ye a tinna kutindiŋolu be laariŋ i ye karoo bee la, silaŋ baa dunta i la waati kiliŋ.

¹¹Dibi baa naata duŋ fo i buka i je noo, waamoo ye i kunuŋ.

¹²Fo Alla maŋ tara Arijana kono baŋ? Looloolu juubee doroŋ, ì jamfabaata santo ñaameŋ!

¹³Fo wo le ye a tinna baŋ i kumata ko, “Alla ye muŋ ne loŋ? A si kiitindiroo noo ñaadii le minaayi dibiŋolu kono,

¹⁴mennu ye a muuri, fo a te jeroo ke noo la, niŋ a be taamoo la saŋo kara jenjeŋo la?”

¹⁵Fo i be tu la taama la niŋ wo sila kotoolu le la baŋ, moo kuruŋolu ka tara mennu nooma?

¹⁶Ì ye ì ñafu, janniŋ ì la waatoo ka sii, ì ye ì koosa, komeŋ niŋ waamoo ye buŋo fondamaŋo koosa.

¹⁷Ì ka a fo Alla ye ko, “Ntolu bula m̀ faŋ bulu! Alla Tallaa si muŋ ne ke noo ntolu la?”

¹⁸Bari hani wo bee, ate Alla le ye ì la buŋolu kono fandi neemafeŋolu la. Moo kuruŋolu la feeroolu, nte niŋ wolu teemoo jamfata ñoo la le.

¹⁹Moo tilindiŋolu ñaa ka boyi itolu kuruŋolu la kasaaroo kaŋ ne, ì ye kontaani, sootaaribaloolu ye jele ì la, ka a fo ko,

²⁰“Tooñaa-tooñaa, ǹ jawoolu kasaarata le, aduŋ ì ye meŋ tu, dimbaa ye wo fanaa domo le.”

²¹Tuubiseyi Alla ma, i niŋ a ye tara diyaariŋ, ñaatotaa be naa i kaŋ niŋ ñiŋ siloo doroŋ ne la.

²²M batu ate Alla faŋo ye i kawandi, i ye a la kumakaŋolu muta i sondomoo kono.

²³Niŋ i ye i faŋ seyi Alla Tallaa ma, i be muru la i ñaama le. Tilimbaliyaa kuwolu bee bondi i yaa.

²⁴I la sanoo fayi buutoo kono, i la sanoo meŋ bota Ofiri tundoo kaŋ, a fayi bolondiŋo kono, beroolu be daameŋ.

²⁵Alla Tallaa ye ke i la sanoo ti, aniŋ i la kodiforo ñiimaa.

²⁶Ate Alla Tallaa le be naa ke la i la seewoo sababoo ti, aduŋ i te malu la a ñaatiliŋo la.

²⁷I be a daani la le, aduŋ a be i moyi la le, aduŋ i be i la laahidoolu timmandi la le.

²⁸I ye meŋ hame, a be ke la i ye le, aduŋ i taaraŋ siloolu si mala.

²⁹Ate Alla le ka faŋ wara moolu la kuwo jindi, a ye fammajiilaalu maakoyi.

³⁰A be moo tanka la le, hani meŋ faŋo ye sootaaroo soto. Moo buloo la seneyaa, wo le be i maarii kanandi la.