Read Mandinka Yuuba 26 Bible Online

Yuuba 26 - Mandinka bible

Yuuba 26

¹Bituŋ Yuuba ye jaabiroo ke ko:

²Ite ye muŋ maakoyi le ke nte la, nte meŋ maŋ sembe soto? Ite ye i buloo fayi nte sembentaŋo kaŋ ñaadii le?

³I ye muŋ yaamari le dii nte ñaamembaloo la, aniŋ i ye muŋ londi jamaa le dii n na?

⁴Jumaa le ye ite maakoyi ka ñiŋ kumakaŋ siifaalu fo? Jumaa le ye ite duŋ diyaamu la teŋ?

⁵Laakirankoolu ka tara jarajara kaŋ ne baajiyo duuma, Alla silaŋñaa kamma la.

⁶Laakira be lankenemayaariŋ Alla ñaa koto le, kumpa te a ye laakira la kuwo to.

⁷Ate le ye saŋo wanka alihawaa kono santo, a ye bankoo feenee, a maŋ tara feŋ kaŋ.

⁸A ye minaayoo ke samaajiyo ye keraŋo ti, hani niŋ a kuliyaata a kono ko muŋ, ì buka feteŋ a fee.

⁹A ye a la mansasiiraŋo loo minaayi dibiŋolu kono, ñaa te a je noo la.

¹⁰A ye ñaa daŋo ke fankaasoo la, ka waati ke tiloo maloo la, aniŋ suutoo diboo.

¹¹Niŋ a ye saŋo biliyolu maamandi, ì si jiijaa, ì ye jarajara, silaŋo kamma la.

¹²A la semboo le ye baajiyo mara, a la noo, a ye daafeŋ Rahabu[7] kasaara wo le la.

¹³Alla le ka saŋo baloo seneyandi niŋ a la foñoo la. A faŋo buloo le ye saa baa[8] faa, a tariyaata ñaa-wo-ñaa ka kana.

¹⁴Bari ñiŋ mu a la mansabaayaa kono kuundiŋ ne ti, ǹ ka domandiŋ doroŋ ne moyi. A semboo be le ko saŋ feteŋo, moo buka Alla la waroo daŋo loŋ noo.