Read Mandinka Yuuba 27 Bible Online

Yuuba 27 - Mandinka bible

Yuuba 27

¹Yuuba tententa diyaamoo la a ko:

²A be koyiriŋ ñaameŋ ko Alla be baluuriŋ ne, ate le maŋ n na kuwo tooñaa londi, aduŋ ate le ye n niyo kuyandi, bari m be n kali la ñiŋ na ko:

³Niŋ n niyo wo be m bala, Alla ye n tu baluwo to,

⁴kasi-wo-kasi te bo la n daa kono, aduŋ n neŋo te faniyaa kumoo fo la.

⁵Bari n niŋ wo teemoo ye jamfa ñoo la, ka soŋ ko alitolu le be tooñaa kaŋ, aduŋ m be taa le fo ŋa faa, n te bo la tooñaa kaŋ.

⁶M be n na tooñaa le muta la, a ye bambaŋ kat, n te a bula la muk. N sondomoo nene maŋ n jalayi dooto m baluu tiloolu kono.

⁷Allamaa n jawoo ke la ko kuruŋo ka labaŋ ñaameŋ, n konnantewo ye ke ko moo jenkeriŋo ka labaŋ ñaameŋ.

⁸Muŋ jiki le si tara Alla ñaasilambaloo ye, niŋ Alla ye a niyo taa, a ye a siyo daŋ?

⁹Fo Alla si a la woosiyo danku baŋ, niŋ maasiiba kuwo naata a kaŋ?

¹⁰Fo a si seewoo ñini Alla Tallaa bulu baŋ? Fo a be tara la Alla too kumandi la le waati-wo-waati?

¹¹M be ali karandi la Alla la mansabaayaa semboo la le, n te Alla Tallaa la siloolu nukuŋ na ali ma.

¹²Ali bee ye ñiŋ je le, wo to saayiŋ muŋ ne ye ali duŋ ñiŋ kuma kenseŋ foo to?

¹³Kuwo fele Alla ye meŋ landi moo kuruŋo la kuwo kunnatoo la, ka ke keetaafeŋo ti fitinamoo ye, Alla Tallaa la karoo la:

¹⁴A diŋolu si siyaa ñaa-wo-ñaa, ì bee be faa la kele wuloo le kono, aduŋ a koomoo nene te bo la konkoo kono muk.

¹⁵Moo-wo-moo baluuta a diŋolu kono, kuuraŋo maasiiboo le be wo faa la, aduŋ hani ì la furuyaamusoolu te ì la saŋo woosii la.

¹⁶Moo kuruŋo si kodiforo buutoo soto, aniŋ duŋ feŋ jamaa, ka tambi a la suuloo la,

¹⁷bari moo kendoolu le be naa wo feŋolu duŋ na, aduŋ moo tilindiŋolu le fanaa be naa wo kodiforoolu talaa la ñoo teema.

¹⁸A ye buŋo meŋ loo, a be le ko taaliŋ jaloo, waraŋ kantarilaŋ jembereŋo.

¹⁹A niŋ fankoo si i laa, ñaa biti niŋ ñaa yele teema, a la fankoo bee ye yeemaŋ.

²⁰Kijafaroo si a taki ko waamoo. Suuto foño baa le be a tindi la jana.

²¹Tilibo foño baa si a sika santo, a ye a tindi jana, ka bo a la koridaa kono.

²²Foñoo ñiŋ si a taki, balafaa te meŋ to. A si a kata ka kana a semboo ma.

²³Foñoo si sonka a ma, a ye foofooroo kumandi a ma.