Read Mandinka Yuuba 28 Bible Online

Yuuba 28 - Mandinka bible

Yuuba 28

¹A be koyiriŋ ne lewu ko, kodiforoo sindulaa be keriŋ ne, aduŋ sanoo yelundidulaa be sotoriŋ ne.

²Newo ka bo bankoo le kono, aduŋ jaawaloo ka yelundi beroo le bala.

³Sindirilaalu ka diboo le fara ka ñinindiroo ke bankoo duuma-duuma fo ì dandulaa, ka beroo ñini dibi fiŋ baa kono.

⁴Ì ka dinka diinondiŋolu siŋ, daameŋ niŋ moolu taradulaa jamfata ñoo la, moo siŋ buka futa daameŋ, daameŋ, ì dammaalu le ka tara dookuwo la jee. Juloo le ka tara sitiriŋ ì bala, ka tara yondiŋ dinkoo kono.

⁵Bankoo kaŋ santo, wo ka fintindiri ke siimaŋ feŋolu le la, bari bankoo kono duuma, kuwolu ka yelema le komeŋ niŋ a keta niŋ dimbaa le la.

⁶Safiiri bere ñiimaa ka bo jee beroolu le bala, aduŋ sanoo ka soto a bankumunkoo le kono.

⁷Wo siloo, hani seeliŋ kiliŋ maŋ a loŋ, aduŋ duwaforo ñaa maŋ loo a kaŋ.

⁸Wulakono daafeŋ sembemaa nene maŋ loo a kaŋ, jata fanaa nene maŋ tambi a kaŋ.

⁹Sindirilaalu ka bere jaara baalu buntaŋ, ka konkoolu fatafata fo ì teroolu to.

¹⁰Ì ka duuma siloolu siŋ beroolu kono, ka ñiŋ bere ñiimaalu je noo.

¹¹Ì ka boloŋ feñoolu to siŋ, ka duuma feŋolu wañakati naŋ.

¹²Bari ñaameŋo, wo sotodulaa be tara la mintoo le, aniŋ fahaamuroo dulaa be mintoo le?

¹³Hadamadiŋo maŋ a taaraŋ siloo loŋ, aduŋ a buka soto duniyaa kono.

¹⁴Diinoŋo ko, a maŋ tara ate kono, fankaasoo fanaa ko, a maŋ tara ate bulu.

¹⁵Sanoo te a soto noo la, aduŋ kodiforoo fanaa te sumaŋ noo la a daa ti.

¹⁶A daa te sumaŋ noo la Ofiri tundoo sanoolu to. Bere ñiimaalu, komeŋ onisi waraŋ safiiri niŋ a te kaañaŋ noo la.

¹⁷A niŋ sani niŋ weeri ñiimaa te laa noo la, sako a si faliŋ noo saniforo ñarandi feŋ na.

¹⁸Korali bere ñiimaalu niŋ bere ñeliñelilaalu, hani niŋ wolu la kuma maŋ fo. Ñaameŋo daa, wo le koleyaata ka tambi luuluwo la.

¹⁹Kusi* topasi bere ñiimaalu, a niŋ wolu te laa la, sako a niŋ saniforoo si laa noo.

²⁰Wo to ñaameŋo, a ka bo naŋ mintoo le, fahaamuroo dulaa be mintoo le?

²¹A la kuwo be niilamaa feŋo bee le ye kumpoo to, hani kunu yaayoolaalu faŋo buka a je noo.

²²Laakira niŋ saayaa ko, itolu ka a kibaaroo moyilaa-moyi ì tuloolu le la.

²³Alla doroŋ ne ye a taaraŋ siloo loŋ, aduŋ ate le fanaa ye a dulaa loŋ.

²⁴Kaatu ate le ka jeroo ke ka futa duniyaa daŋo ma, a ka jeroo ke feŋ-wo-feŋ na, saŋo niŋ bankoo teema.

²⁵Kabiriŋ Alla ye semboo dii foñoo la, a ye jiyo sumaŋ, a ye dandulaa ke a la,

²⁶a ye siloo dii samaajiyo la naŋ duniyaa kono, a ye keñaa ke samaa kumoo la.

²⁷Wo waatoo le mu, a naata ñaameŋo la kuwo juubee, a ye a kisikisi, a ye a la kuwo londi, a naata a kibaari.

²⁸Bituŋ a naata a fo hadamadiŋolu ye ko, “Tooñaa-tooñaa, nte Maariyo ñaasilaŋo, wo le mu ñaameŋo ti, aniŋ ka fata kuu jawu kewo ma, wo le mu fahaamuroo ti.”