Read Mandinka Yuuba 29 Bible Online

Yuuba 29 - Mandinka bible

Yuuba 29

¹Yuuba tententa a la diyaamoo la ko:

²M be lafi la n na kuwo ye tara, ko a be nuŋ ñaameŋ, waatoo meŋ na, Alla tarata n na kuwo hatiriŋ,

³waatoo meŋ, a la neemoo tarata malariŋ n kaŋ, niŋ diboo dunta, a la maloo le ka n tambindi,

⁴waatoo meŋ, m be bambandiŋ, waatoo meŋ, Alla ye n na koridaa neemandi a faŋo la kafuñooyaa la,

⁵waatoo meŋ, Alla Tallaa be m fee, n diŋolu be n dandaŋo la,

⁶nonoo be siyaariŋ m bulu, fo labaŋo n si n kuu noo a kono. Hani n na olifu* yiroolu tuloo ka soronto naŋ berehuwo la le ko baajiyo,

⁷waatoo meŋ, n niŋ saatee alifaalu ka beŋ, n ka sii ì teema,

⁸waatoo meŋ, fondinkewolu ka wuli n ye, keebaalu ka loo ka buuñaa dii n na,

⁹ñaatonkoolu ka i deyi diyaamoo la, ì ka ì daalu muta,

¹⁰hani moo kummaalu kaŋ buka moyi, ì neŋolu ka tara sorondiŋ ì daalu kono.

¹¹Moo-wo-moo ye n na kuwo moyi wo waatoo la, a ka n kumandi neema moo le la. Moo-wo-moo ñaa boyita n kaŋ, a ka kuma kendoo le fo m ma.

¹²Kaatu n ka fuwaaroolu le tankandi mennu ka woosii, aniŋ aliyatiimoolu mennu maŋ maakoyilaa soto.

¹³Moo bataariŋolu ka tara duwaa kaŋ n ye le, aduŋ n ka furuyaamusoolu jusulandi le.

¹⁴Tooñaa dendikamaa le ka tara dundiŋ n na, aniŋ tiliŋo warambamaa niŋ a naafamaa.

¹⁵Nte le keta finkintewolu ñaa ti, n keta lanjuurutoolu siŋolu ti.

¹⁶Nte le keta fentaŋolu faa ti, n keta tooñaa londilaa ti tumarankewolu ye.

¹⁷Nte le ye moo jawoolu ŋaaŋaa kuloolu kati, ŋa feŋolu tanka, ì ñiŋolu be sorondiŋ mennu fee.

¹⁸Wo to nte ye a miira, n ñanta siimaayaa la le ko duwaforoo, ŋa naa faa ñaŋo kono.

¹⁹N na kuwo ka muluŋ ne komeŋ yiroo, meŋ suloolu be janjandiŋ jiyo kono, komboo ka jii a buloolu kaŋ suuto-wo-suuto.

²⁰Moolu la m buuñaa keñaa buka talaa, aduŋ n na beñoo ka tu kutayaariŋ ne.

²¹Niŋ m be yaamaroo dii kaŋ, moolu ka tara deyiriŋ ne, ì ye tara i lamoyi kaŋ m fokumoo la.

²²Ì buka kuma laa m fokumoo kaŋ, m fokumoo ka ì kontaani le ko neemajiyo.

²³Ì ka tara m batu kaŋ ne ko samaajiyo. Ì ka tara hameriŋ m fokumoolu la le ko samaajii labaŋo.

²⁴N ka tara muyi la ì ye le, niŋ ì maŋ jiki soto ì faŋ to, n ñaatoŋo la diyaa le ka ì jikindi ì faŋ to.

²⁵Nte le mu ì la kuu laañaa folaa ti, ka ì la kuwo ñaatonkayaa, ko mansakewo ka a la kelediŋolu ñaatonkayaa ñaameŋ. Niŋ moo niyo kuyaata, nte le ka a jusoo ñabu.