Read Mandinka Yuuba 30 Bible Online

Yuuba 30 - Mandinka bible

Yuuba 30

¹Bari saayiŋ n siyaata mennu ti, ì bee le ka jele n na. Wolu faañolu tarata jutunnayaa daa le to, hani n te ì konti la n na saajii kanta wuloolu kono.

²Ì maŋ jari feŋ na ka dookuwo ke n ye, kaatu sembe te ì la.

³Fuwaareyaa niŋ konko jawoo kamma la, ì ka suloolu le domo ka bo banku jaaroo kono, aniŋ banku faariŋo.

⁴Ì ka tara yiri jamba kunaŋolu le tomboŋ kaŋ wuloo kono ka ì domo, aniŋ hani yirisuloolu.

⁵Moolu ye ì bayi jamaa kono, ì ka sari ì kaŋ ko ì ka sari suŋolu kaŋ ñaameŋ.

⁶Ì ka tara sabatiriŋ boloŋolu le daala, berehuwolu kono, aniŋ dinkoolu.

⁷Ì ka tara kuma kaŋ ne ko faloolu wuloo kono taariŋ, ka tara motomotoriŋ ŋaniŋolu kono.

⁸Ì moo kenseŋ kafoo, buuñaa te ì kaŋ. Ì ye ì buutee le, ka ì bayi bankoo kaŋ.

⁹Saayiŋ wolu le diŋolu ka n teeliŋ denkiloolu la, ka tara n ñaawali kaŋ. Nte le naata ke ì fee jelefeŋo ti.

¹⁰Ì jututa n na, ì ye ì koo dii n na, ì buka sila hani ka daajiyo fayi n kaŋ.

¹¹Alla le ye n na semboo taa m bulu, a ye m mondiŋyandi. Wo le ye a saabu ñinnu ka balafiriŋo tiliŋ n na.

¹²Ñiŋ kataatoolu, ì boyita n kaŋ niŋ sembe baa la, ì ye m borindi, ì ye siloolu ñini ka n tiñaa.

¹³Ì ye n na kanaraŋ siloo kuntuntee, ì ye n na kuwo jindi, moo maŋ soto ka ì bali a kewo la.

¹⁴Ì boyita n kaŋ, komeŋ niŋ kelediŋolu be tatoo teyi kaŋ, ka tara boyinkandiroo la.

¹⁵N kijoo bota, n na foroyaa bota komeŋ niŋ foñoo le ye a tindi, n na sotoo yeemanta komeŋ saŋ tawaloo.

¹⁶Saayiŋ n siyo maŋ jamfa, tili-wo-tili, a bee niŋ koleyaa jawoo.

¹⁷Suutoo, n kuloo kono bee le ka n teyi, dimoo ñiŋ buka dandulaa soto.

¹⁸Alla ye m muta n na waramboo to niŋ a semboo la, a ye n ñafu n na dendika kaŋo to.

¹⁹A ye m fayi potoo kono, m maŋ fisiyaa feŋ ti kotenke, ko bankumunku kenseŋo aniŋ seebuutoo.

²⁰Alla, n woosiita i ye, i maŋ n danku, n tarata looriŋ, bari i maŋ n hati.

²¹I yelemata n ye jawuyaa daa to, i ye i buloo laa n kaŋ ka n toorandi niŋ i semboo bee la.

²²I ye n duŋ foñoo kono ka tara n samba kaŋ, i ye m fayiŋ-fayiŋ turubaadi kumakaŋo kono.

²³Ŋa a loŋ ne ko, i be n samba kaŋ naŋ saayaa le kaŋ, dulaa, niilamaa bee be labaŋ na daameŋ.

²⁴A be koyiriŋ ne ko, moo buka balaŋ ka a buloo fayi moo kasaarariŋo kaŋ, niŋ a woosiita ka maakoyiroo ñini a la niikuyaa waatoo kono.

²⁵Fo nte maŋ kumboo moolu ye baŋ, mennu tarata koleyaa kono? Fo nte maŋ balafaa soto fuwaaroolu ye baŋ?

²⁶Ŋa n yillaa kayiroo le la, bari kooroo le naata n kaŋ. M be maloo ñinoo kaŋ, diboo naata n kaŋ.

²⁷N kijoo farata, n na kija faroo maŋ tenkuŋ. Luŋ-wo-luŋ, n ka niikuyaa kuwo le soto.

²⁸N niikuyaariŋo le ka taa, tiloo ka tara dibiriŋ m ma, n ka loo saatee bendulaa to ka deemaaroo ñini.

²⁹N woosiita ko kunkuwuloo ka woosii ñaameŋ, aniŋ ko kiikiyaŋo.

³⁰M balajaatoo finta, a bee wurata, m baloo kono kandita wit.

³¹N na kontiŋ kumoo yelemata woosiyo ti, n na footaŋ kumoo keta kumboo kaŋo ti.