Read Mandinka Yuuba 32 Bible Online

Yuuba 32 - Mandinka bible

Yuuba 32

¹Wo le to ñiŋ kee saboo naata i dahaa ka diyaamu Yuuba ye, kaatu itolu ye ñiŋ ne je ko, ate ye a faŋ muta moo tilindiŋo le ti.

²Bituŋ Elihu, Barakeli Businkoo dinkewo, meŋ bota Ramu la dimbaayaa moolu kono, naata kamfaa. A kamfaata Yuuba kamma baake, kaatu a ye a je le ko, a ye a faŋo la kuwo le tooñaayandi ka tambi Alla la.

³A kamfaata Yuuba teeri saboo fanaa kamma le, kaatu ì maŋ sila je ka Yuuba la boyidaa yitandi, bari hani wo bee ì be a jalayi kaŋ.

⁴Elihu ye itolu le batu foloo, janniŋ ate ka diyaamu Yuuba ye, kaatu itolu le mu keebaa ti.

⁵Kabiriŋ Elihu ye a je ko ñiŋ kee saboo maŋ feŋ soto ì daa kotenke ì be meŋ fo la, a jusoo bota.

⁶Bituŋ a naata a la diyaamoo dati, a ko: Nte le mu ali bee kono dindiŋo ti, alitolu le mu keebaa ti. Wo le ye a tinna n silata, m maŋ haañi ka n hakiloo fayi ali kaŋ.

⁷Nte ye a miira ko, keebaalu le foloo ñanta ka diyaamu, siimaalu ye ñaameŋo kuwo karandi.

⁸Bari meŋ ye hakiloo dii hadamadiŋo la, ka fahaamuroo ke, aniŋ meŋ ye niyo dii a la, wo mu Alla Tallaa le ti.

⁹Ka ñaameŋo soto, aniŋ ka fahaamuroo soto, ka a loŋ meŋ tilinta, wo maŋ tara dindiŋyaa niŋ keebaayaa bala.

¹⁰Wo kamma la, ali i lamoyi m ma. M fanaa ye meŋ loŋ, ŋa a fo ali ye.

¹¹M be ali la diyaamoo le batu kaŋ, m be n lamoyi kaŋ ali la fahaamuroo keñaa le la, ñiŋ kuwo laañaa to.

¹²N hakiloo bee tarata looriŋ alitolu le kaŋ, bari moo maŋ Yuuba la boyidaa yitandi noo a la. Moo te ali kono, meŋ ye a la kumoolu jaabi noo.

¹³Ali kana a fo ko, ali ye ñaameŋo soto le, aniŋ ko Alla doroŋ ne si Yuuba la boyidaa yitandi noo a la, a te ke noo la hadamadiŋo ti.

¹⁴Yuuba maŋ kuma fo nte ma, nte te a jaabi noo la, ko alitolu ye a jaabi ñaameŋ.

¹⁵Yuuba, ñiŋ moolu jikilateyita le, ì maŋ kuma soto ì be meŋ fo la, fokumoo banta ì daa le.

¹⁶Fo nte ñanta tara la ì batu kaŋ ne baŋ, niŋ ì be deyiriŋ, ì maŋ kuma fo, ì be looriŋ, ì maŋ jaabiri kuma soto noo?

¹⁷Meŋ be m fanaa daa, m be a fo la le, m fanaa be n hakiloo daŋo yitandi la le.

¹⁸N daa be faariŋ kumoo la le tep, n kono be mooriŋ kumakaŋolu le la, wo le ye m forisee ka diyaamu.

¹⁹M be le ko dolobata fuusariŋo, m be feteŋ na le, niŋ m maŋ diyaamu.

²⁰Fo ŋa diyaamu doroŋ, ka ñinnu fintindi n kono, fo ŋa n daa yele ka kumoolu jaabi.

²¹Nte te laa la moo kaŋ, aduŋ n te moo falikulu tentu la.

²²Niŋ n daajikoo mu falikulu tentoo le ti, wo to n Daamansoo si n siyo daŋ saayiŋ.