Read Mandinka Yuuba 33 Bible Online

Yuuba 33 - Mandinka bible

Yuuba 33

¹Yuuba, i lamoyi n na diyaamoo la, i ye i hakiloo tu feŋ-wo-feŋ to, m be meŋ fo la.

²Ŋa n daa yele le, n neŋo be pareeriŋ ka kumoolu seyinkaŋ.

³M fokumoolu be ke la kuma tilindiŋo le ti, aduŋ ŋa meŋ loŋ, n neŋo ka loo wo le kaŋ tooñaa siloo la.

⁴Alla Tallaa la Nooroo le ye n daa, a ye niyo meŋ duŋ n kono, wo le ye baluwo dii n na.

⁵Niŋ i si a noo, i la balandaalu yitandi. Ì fintindi naŋ, ŋà ǹ ñaa tiliŋ ñoo la.

⁶Nte niŋ ite bee mu kiliŋo le ti Alla ñaa koto, m fanaa daata niŋ potoo le la.

⁷Nte la kuwo kana silaŋ kuu samba naŋ i kaŋ, nte la kuwo maŋ ñaŋ na ke la i bulu duni kuliŋ baa ti.

⁸Ŋa i fokumoolu moyi le, aduŋ hani saayiŋ ì maŋ bo n kono foloo.

⁹I ko, ite maŋ sootaari soto, aduŋ i maŋ junube kuu ke, i seneyaata, aduŋ i maŋ boyi kuu ke.

¹⁰I ko, hani wo bee Alla ye siloo soto ka boyidaa je i la karoo la, a ye i muta ko a jawoo.

¹¹A ye i kada, wo ñaa-wo-ñaa i ye simfaa-wo-simfaa taa, a ka tara i koroosi kaŋ ne.

¹²Bari m be a fo la i ye ko, i maŋ tooñaa fo i la ñiŋ kumoo foo to. Alla le warata ka tambi hadamadiŋo la.

¹³Muŋ ne ye a tinna i ye Alla tuumi, kaatu a maŋ i la ñininkaaroolu jaabi?

¹⁴Alla ka diyaamu hadamadiŋo ye le waati niŋ waati, bari hadamadiŋo buka a la diyaamoo hakilitu.

¹⁵A ka diyaamu a ye niŋ siiboo kono la, jeroo kono, a ka diyaamu a ye suutoo, niŋ siinoo baa ye a muta, niŋ a be jinkoo la a la laaraŋo kaŋ.

¹⁶A si a moyirindi kumoolu la, ì si a masilandi ka ke a ye dandalaaroo ti.

¹⁷A ka ñiŋ ke le ka a fatandi kuu jawu kewo ma, ka fata faŋ waroo ma,

¹⁸ka a kanandi kaburu dinkoo ma, aniŋ ka tanka saayaa ma.

¹⁹Alla ka moo dandalaa le fanaa ka dimoo jaraboo laa a kaŋ, a kuloo si tara a teyi kaŋ doroŋ.

²⁰A si ñewuŋ domoroo la, hani a lafinna domoroo, a te lafi la a la.

²¹A si jaa ko koloma jaaroo, a karakuloolu bee ye finti naŋ banta.

²²A ka tara sutiyaa kaŋ kaburu dinkoo le la, saayaa be a batu kaŋ.

²³Tumandoo, malaayikoo si tara noo Alla la malaayika wuliwuloolu kono le, ka tara a niŋ hadamadiŋolu teema, meŋ be hadamadiŋo yaamari la kuu kendoo la.

²⁴A si ke noo, wo malaayikoo ye balafaa soto a ye, a ye yamfoo daani a ye Alla bulu, ka kana kaburu dinkoo ma. A si a fo Alla ye ko, “A kanandiraŋ kumakaaraŋo fele.”

²⁵Bituŋ a baloo si seyi a ñaama ko dindiŋ mereŋo, a baloo si ke ko a la fondinkeeyaa waatoo la.

²⁶Bituŋ a si Alla daani, Alla si hiina a la, a seewooriŋo si naa noo Alla ñaatiliŋo la, Alla si a murundi a ñaama, ka ke moo tilindiŋo ti.

²⁷Wo moo siifaa si a fo noo a mooñoolu ye le ko, “Nte ŋa junube kuwo le baara, ŋa tooñaa nakari, bari a maŋ joo n to.

²⁸Alla ye n tanka le ka duŋ kaburu dinkoo kono, m be baluwo to le hani saayiŋ.”

²⁹Alla si ñiŋ bee ke noo hadamadiŋ-wo-hadamadiŋ ye le waati niŋ waati.

³⁰A si a tanka kaburu dinkoo ma, fo a si tenteŋ ka a la baluwo diyaa nene.

³¹Yuuba, i hakiloo tu i ye i lamoyi m ma. I deyi, ŋa naa diyaamu.

³²N jaabi, niŋ i ye feŋ soto i be meŋ fo la, diyaamu, n lafita le ka i la kuwo tooñaayandi.

³³Niŋ i te diyaamu la, wo to i lamoyi m ma, i deyi, ŋa naa i karandi ñaameŋo siloo la.