Read Mandinka Yuuba 36 Bible Online

Yuuba 36 - Mandinka bible

Yuuba 36

¹Elihu tententa diyaamoo la, a ko:

²I lamoyi m ma domandiŋ, ŋa kumoo saata i ye. Hani saayiŋ kumoo be n daa le, m be meŋ fo la Alla la karoo la.

³N na londoo la fanoo ye a sii le, ka n Daamansoo la tiliŋo yitandi.

⁴Tooñaa-tooñaa, m fokumoolu maŋ ke faniyaa kuma ti, aduŋ i ñaa be moo le la teŋ meŋ na londoo koyita fer.

⁵Alla mu sembetiyo ti ñaa-wo-ñaa, bari a buka jutunnayaa kuu tiliŋ moo la. A semboo warata, aduŋ a la fahaamuroo warata.

⁶A buka moo kuruŋo siyo jamfandi, bari a ka moo bataariŋolu boloo dii ì la le.

⁷A buka ñina moo tilindiŋolu la muk, a ka ì ke le ko mansakewo meŋ tarata siiriŋ a la mansasiiraŋo kaŋ fo fawu, a niŋ kuliyaa.

⁸Hani niŋ a ye a tara ì ye ì siti joloo le la, koleyaa ye ì siti kat,

⁹a ka ke ñiŋ ne ti doroŋ, Alla be ì kekuwo le yitandi kaŋ ì la, ì la junube kuwolu niŋ ì la faŋ waroo.

¹⁰A si ì tuloolu yele, a la yaamaroolu ye duŋ ì kono, a ye naa ì kili ka tuubiseyi ì la kuu kuruŋolu la.

¹¹Niŋ ì ye a moyi, ì ye ì faŋ seyi ate Alla ma, ì baluu tiloo bee si ke kayiroo ti, aduŋ ì si ì siyo ke niiseewoo kono.

¹²Bari niŋ ì maŋ i lamoyi, hawusaroo* si ì faa, ì niŋ londintaŋyaa ye kasaara.

¹³Moolu mennu maŋ dankeneyaa Alla la ka tu jusuboo le kono. Hani niŋ Alla ye jarabi kuwo laa ì kaŋ, ì buka deemaaroo ñini a bulu.

¹⁴Ì ka faa ì la fondinkeeyaa waatoo le la, aduŋ ì siyo ka baŋ malu kuwo[9] le kono.

¹⁵Ate Alla le ka bataa laa moo kaŋ ka ke a ye kawandi ti, a ye naa a ñaa yelendi ka bo niŋ niitoora kuwo la, fo a si tankoo soto.

¹⁶Ate le ye i bondi niitooroo kono, a ye i samba dulaa kekuuriŋo to, niifitii te daameŋ. Domori diimaalu tarata fatafatariŋ i la taabuloo kaŋ.

¹⁷Bari hani wo bee, i tarata jalayiroo kaŋ ne ko moo kuruŋo, bituŋ kiitindiroo niŋ jaraboo laata i kaŋ saayiŋ.

¹⁸Kana soŋ kamfaa ye i duŋ tooñeeroo kono, kana soŋ dukoo kodi baa ye i jenkendi.

¹⁹Fo i ye ñiŋ ne miira baŋ ko, i la maakoyiroo kumboo, wo le be i bondi la niitooroo kono, waraŋ i la matimatoolu?

²⁰Kana koronto suutoo koto, waatoo meŋ, kasaaroo ka naa moolu kaŋ, ì ka yeemaŋ, ka bo ì taradulaalu to.

²¹I hakiloo tu, i kana muru kuu jawu kewo kaŋ. Jaraboo naata i kaŋ ka i fatandi ñiŋ ne ma.

²²A je ko, Alla la mansabaayaa warata le, jumaa le mu karandirilaa ti ko ate?

²³Jumaa le ka a la siloolu yitandi a la, waraŋ jumaa le si a fo noo a ye ko, “Alla, i ye ñiŋ meŋ ke teŋ, a maŋ tiliŋ”?

²⁴Kana ñina ka Alla tentu a la keroo la, hadamadiŋolu ka meŋ suukuu.

²⁵Moo bee le ñaa be looriŋ a kaŋ, bari hadamadiŋo ka a je ka bo dulaa jaŋ ne.

²⁶Ntolu la londoo maŋ futa ka Alla la waroo loŋ noo, aduŋ moo te a baluu saŋo yaatee noo la.

²⁷Ate le ka jiyo saba santo ka bo bankoo to, a ye naa a yelemandi samaajiyo ti ka bo tawaloolu bala.

²⁸Tawaloolu ye naa jiyo jindi naŋ, ì ye a jindi naŋ hadamadiŋo bee ye.

²⁹Jumaa le si a fahaamu noo a ka saŋ tawaloolu feenee ñaameŋ, a ka a tinna saŋ feteŋo ka ke ñaameŋ, ka bo a la mansabaayaa palaasoo to?

³⁰A ka saŋo baloo bee ŋalasindi, bari baa baalu duuma, wolu ka tu dibiriŋ ne.

³¹A ye hadamadiŋolu mara ñiŋ siloo le la, a ye domoroo dii ì la, a jamaa.

³²Saŋ ŋalasoo be a buloo le kono, a ye a yaamari daameŋ, a ka jii wo le to.

³³Saŋ feteŋo ka Alla la kuwo le kibaari, niŋ a kamfaabaata kuu kuruŋo la.