Read Mandinka Yuuba 38 Bible Online

Yuuba 38 - Mandinka bible

Yuuba 38

¹Bituŋ Yaawe* ye Yuuba jaabi ka bo foño baa kono ko:

²Ite ye i faŋ miira jumaa le ti, i be diyaamu la, londi te i bulu, ka sika n na feere landiriŋolu la?

³I tewo siti ko kewo, m be i ñininkaa la, aduŋ i si n jaabi.

⁴I be miŋ, kabiriŋ m be duniyaa daa la? A fo n ye, niŋ i ye fahaamuru ke a kuwo la.

⁵Jumaa le ye a la sumandiroo ke, waraŋ jumaa le ye a nuunewo saba? Tooñaa-tooñaa, ite le ye a loŋ.

⁶A fondamaŋolu be looriŋ muŋ ne kaŋ, waraŋ jumaa le ye a tonkoŋ na beroolu laa,

⁷tumoo meŋ, subaalooloolu ye suukuwo laa ñoo la, aniŋ malaayikoolu bee seewootoo wuurita?

⁸Jumaa le ye naanewolu ke baa la, kabiriŋ a fintita naŋ duniyaa kono?

⁹Nte le ye baa muuri saŋ tawaloolu la, ŋa a moromoro dibi fiŋ baa kono.

¹⁰Ŋa dandulaa ke a la, ka a soroŋ kuuke, a kana waame bankoo kaŋ.

¹¹Ŋa a yaamari ka loodulaa soto, a kana tambi jee la, aniŋ ŋa dandulaa ke a baliŋ sembemaalu la.

¹²I nene ka fanoo kendi noo le baŋ, aniŋ ka tiloo la boo saabu noo,

¹³a ye futa duniyaa karoo bee la ka moo kuruŋolu koora jana?

¹⁴Soomandaa la maloo ka duniyaa faramansandi le komeŋ tampuraŋo ka faramansa potoo bala ñaameŋ, konkoolu finifinoolu ye finti naŋ komeŋ waramboo lampiri kuloolu.

¹⁵Niŋ tiloo la maloo fintita, moo kuruŋolu buka dibi soto kotenke, ì la kuruŋyaa kuu taamandoo semboo ka dubeŋ ne.

¹⁶I nene ka duŋ fankaasoo duuma le baŋ, a ka jiyo fintindi naŋ daameŋ, waraŋ ka taama baa teroo to?

¹⁷I nene ka laakira dundaŋ daa je le baŋ, daameŋ ka tara dibiriŋ ne fo fawu?

¹⁸I ye duniyaa la waroo daŋo loŋ ne baŋ? A fo, niŋ i ye a loŋ.

¹⁹Maloo dulaa siloo be mintoo le, aniŋ diboo dulaa mu mintoo le ti?

²⁰I si ì samba noo ì ñanta tara la dulaalu mennu to baŋ, i ye ì murundi ì noo to?

²¹Tooñaa, ite ye ñinnu bee loŋ ne, kaatu ì daa waatoo, wo ye a tara le i wuluuta, aduŋ a ye a tara le i keebaayaata.

²²Fo i nene ka duŋ dulaa to le baŋ, n ka kalaasi dunkuliŋ feemaa maabo daameŋ, waraŋ fo i nene ka dulaa je le baŋ, n ka saŋ beroolu maabo daameŋ?

²³N ka ì maabo mantoora waatoo le kamma, ì ye tara pareeriŋ keloo niŋ fitina waatoo ye.

²⁴Maloo janjaŋ dulaa siloo mu mintoo le ti, waraŋ tilibo foñoo ka janjaŋ daameŋ duniyaa kono?

²⁵Jumaa le ka jiibori dinkoo siŋ samaajiyo ye, aniŋ ka siloo yele saŋ feteŋo ye?

²⁶Jumaa le ka samaajiyo ke dulaalu to, moo te sabatiriŋ daamennu to, aniŋ keñewuloolu* kono,

²⁷ka wula kenseŋo jiiboŋ, aniŋ ka ñaamoo fintindi bankoo kono?

²⁸Fo samaajiyo ye faa le soto baŋ, aniŋ jumaa le ye komboo wuluu meŋ ka joloŋ?

²⁹Jumaa le mu jii kalaasoo baamaa ti? Jumaa le ye jii dunkuliŋo wuluu ka bo saŋo santo,

³⁰waatoo meŋ jiyo ka jaa komeŋ beroo, aniŋ baajiyo kunkaŋolu ka yelema kalaasoo ti?

³¹Fo i si Sanjaani Benteŋ Looloolu siti noo ñoo bala baŋ, waraŋ ka Mfaalii Looloolu firiŋ noo ñoo bala?

³²I si looloolu yaamari noo baŋ, ì ye finti ì waatoo la, waraŋ ka Siisee Dimbaa Looloo mara?

³³I ye saŋo malafeŋolu marañaa loŋ ne baŋ? I si a tinna noo wo siifaa ye ke duniyaa kono baŋ?

³⁴Fo i si yaamaroo dii noo saŋ tawaloolu la baŋ, ka jiyo jindi naŋ, a ye i kunuŋ komeŋ waamoo?

³⁵Fo i si saŋ ŋalasoolu jindi noo naŋ baŋ, ì ye naa ka a fo i ye ko, “M̀ fele jaŋ”?

³⁶Jumaa le ye ñaameŋo dii sondomoo la, waraŋ ka fahaamuroo dii hakiloo la?[10]

³⁷Jumaa le ye ñaameŋo soto ka saŋ tawaloolu yaatewo loŋ noo? Jumaa le ka samaajiyo yelema ì kono naŋ ko jiibindaa,

³⁸samaajiyo ka bankumunkoo denkuŋ ñoo kaŋ ne ko beroo, banku kuloolu ye ñoo muta?

³⁹Fo i si deemoo ke noo jatamusoo ye baŋ, ka domoroo dii jata diŋolu la ka ì konoo fandi,

⁴⁰niŋ ì be laariŋ koloolu kono, waraŋ ì be baturoo la ñunkoo kono?

⁴¹Jumaa le ka domoroo dii kaanaa kunoo la, niŋ a diŋolu kumboota Alla ye, aniŋ niŋ ì be domori kuu muruŋ-muruŋo la?