Read Mandinka Yuuba 39 Bible Online

Yuuba 39 - Mandinka bible

Yuuba 39

¹I ye konkotoŋo la wuluu waatoo loŋ ne baŋ, i ka minaŋo la tiŋo waatoo koroosi le baŋ?

²I ye a loŋ ne baŋ, ì la konomaayaa ka kari yaatewo meŋ taa, aniŋ fo i ye ì wuluu waatoo loŋ ne baŋ?

³Ì be ñoyi la doroŋ ka wuluu, ì diŋolu be joloŋ na naŋ.

⁴Ì diŋolu si bambaŋ waati kiliŋ, ì ye meŋ wuloo kono. Ì si taa, ì te muru la ì kaŋ kotenke.

⁵Jumaa le ye wulakono faloo bula ka tara a faŋ ma? Jumaa le ka a bula ka yaayiŋ-yaayiŋ?

⁶Nte le ye wula kenseŋo bula a ye, ka ke a yaa ti, aniŋ lewolu kono ka sabati jee.

⁷A ka tara jamfariŋ saatewo maakaŋ baa la le, aduŋ a tuloo buka bayirilaa la sari kaŋ moyi.

⁸A ka tara boriŋ-boriŋ na konkoolu le kaŋ domori ñinoo la, ka tara ñaama kitiŋ ñinoo la doroŋ.

⁹Fo tuuraa saŋaroo si paree baŋ ka senoo ke i ye? Fo a si suutoo laa i la beeyaŋ buŋo kono baŋ?

¹⁰Fo i si juloo duŋ noo a nuŋo la baŋ, ka daboo saba i ye? A si baliŋo fara i ye i la kunkoo to baŋ?

¹¹Fo i jikoo si tara looriŋ noo a semboo kaŋ baŋ? Fo a si dookuwo ke noo i ye baŋ?

¹²I si lannoo soto a la murunaŋo to baŋ, a ye i la siimaŋ kesoo yoronna i ye toñonkari dulaa to?

¹³Suruntukunoo kufantoo ka a dampaŋolu kosi le, bari fo a ka tii noo ì la le baŋ ko jimoo?

¹⁴A ka a la kiloolu laa bankoo le to, a ye ì bula, bankoo kandoo ye sele ì la.

¹⁵Bari a hakiloo buka ñiŋ je noo ko, siŋo si dori noo ì kaŋ ne, aniŋ wulakono daafeŋolu tambitoo si dori noo ì kaŋ ne, ì ye teyi.

¹⁶A ka a diŋolu jarabi le komeŋ ì maŋ ke a diŋ ti. Hani niŋ a la kili laa keta a ye kenseŋo ti, a buka dewuŋ.

¹⁷Kaatu nte Alla le maŋ a so ñaameŋo la, aniŋ hakili kendoo n na talaaroo waatoo la.

¹⁸Bari niŋ a wututa boroo la, a jeletoo le ka suwoo niŋ a borindilaa fili kooma.

¹⁹Fo ite le ye semboo dii suwoo la baŋ? Fo ite le ye a toŋo ñarandi niŋ tiyolu la baŋ?

²⁰Ite le ka a baamendi noo baŋ, komeŋ kuntiŋo ka sawuŋ ñaameŋ, ka moolu silandi a la ka bo niŋ a la nuŋ feeñaa la?

²¹Suwoo korontotoo ka bankoo siŋ ne, ka kufaŋ a semboo la, a ye kirimbaasi, a niŋ kelejooraŋolu ye beŋ.

²²Silaŋo mu a fee jelefeŋyaa le ti, a buka sila, a buka bori ka a koo dii keloo la.

²³A borindilaa la kalabeñoolu ka tara kuma kaŋ ì laa kono le, a la tamba kesoo niŋ tamba muroo ye tara falasi kaŋ tiloo la.

²⁴A jusubendiŋo niŋ a kontaanitoo le ka bori katabake. Niŋ kelebinoo feeta, a buka loo noo, a ye tenkuŋ.

²⁵Niŋ binoo kumata, a fanaa ka kuma le. A ka keloo nooroo taa dulaa jaŋ ne to, a ka kelekuntiyo la saroo moyi dulaa jaŋ ne to.

²⁶Fo i la feeroo le ka seeliŋo tindi santo baŋ, ka a dampaŋo werendende ka taa bulubaa maafaŋo la?

²⁷Fo seeliŋo ka tii santo i la yaamaroo le kaŋ baŋ, a ye a la ñaŋo laa santo?

²⁸A ka a yaa ke konkobere jaŋolu le kaŋ santo, daameŋ bere faroolu teema le ka tankoo dii a la komeŋ tatoo.

²⁹A ñaa ka tara muruŋ-muruŋ kaŋ a la deema suboo la wo le to, a ñaa si tara a la, ka bo dulaa jaŋ.

³⁰Furewo be daa-wo-daa, a ka tara jee le, a diŋolu ka i daañini yeloo le la.