Read Mandinka Yuuba 4 Bible Online

Yuuba 4 - Mandinka bible

Yuuba 4

¹Bituŋ Elifasi Temaninkoo ye jaabiroo ke ko:

²Kori niŋ moo ye kuma fayi i kaŋ, a te i dimi la? N te n daakumoolu muta noo la n kono.

³A juubee, i ye yaamaroo dii jamaa le la, i ye moo bataariŋolu maakoyi.

⁴Niŋ moo lafita jenke la, i la kumakaŋolu le ka a tilindi. Niŋ moo maŋ loo noo ka bambaŋ, ite le ka a bambandi.

⁵Saayiŋ, bataa naata i faŋo kaŋ, i jikilateyita, a ye i maa, i jikoo taata.

⁶Fo i la Alla ñaasilaŋo maŋ dankeneyaa dii i la baŋ? I maañaa maŋ sootaari soto, fo wo maŋ ke i ye jikoo ti baŋ?

⁷Saayiŋ i hakiloo duŋ moo la baŋ, moo meŋ maŋ feŋ ke, a ye halaki? Moo tilindiŋo nene ka kasaara mintoo le?

⁸Nte ye kuwo je wo le ñaama: Moolu mennu ye kuu jawoo kunkoo sene, ì ye kataa fii jee, niŋ sanjaanoo siita, ì be wo kiliŋo le kati la jee.

⁹Alla ye a niijii ì kaŋ, ì faata, a la kamfaa ye ì fee jana komeŋ saafoñotoo.

¹⁰Moo kuruŋolu wiisata, ì bumbunta ko jatoo, bari Alla ye ì tenkundi le, a ye ì ñiŋolu kati.

¹¹Ì keta ko jatoo, meŋ maŋ feŋ soto, a be meŋ faa la ka a domo. Ì faata, ì diŋolu bee janjanta.

¹²Kiilaariyaa kumoo naata n kaŋ kulloo kono, ŋa a feresoo le moyi.

¹³M be siinoo baa le kono nuŋ, bari siiboo la kuwo naata m barandi.

¹⁴Kijafaroo niŋ silaŋo naata m muta, m baloo bee be jarajara kaŋ.

¹⁵Foñoo ye n ñaadaa fee, m balatiyo bee ye n taama silaŋo kamma la.

¹⁶Ŋa feŋ ne je looriŋ n ñaato, bari n te a fo noo la, muŋ feŋ ne mu. Deyoo be keriŋ, bituŋ n naata diyaamukaŋo moyi ko,

¹⁷“Fo hadamadiŋo si tiliŋ noo Alla ñaa koto baŋ? Hadamadiŋo si seneyaa noo a Daamansoo ñaatiliŋo la baŋ?

¹⁸Alla maŋ laa a faŋo la Arijana dookuulaalu la, a ye sootaaroo je hani a faŋo la malaayikoolu to le.

¹⁹Wo to i ye a miira, a si laa hadamadiŋo la, meŋ daata potoo la, meŋ daata ka bo bankoo bala, meŋ faa be sooneeyaariŋ ko tumboo?

²⁰Hadamadiŋo si tara baluwo to soomandaa, a ye faa wulaaroo ka yeemaŋ fo fawu, moolu maŋ a loŋ meŋ be keriŋ.

²¹Fo hadamadiŋo buka muluŋ ne ko tiriliisoo* baŋ? Niŋ a juloolu firinta, a ye boyi, hadamadiŋo niŋ ñaamembaliyaa be faa la le.”