Read Mandinka Yuuba 40 Bible Online

Yuuba 40 - Mandinka bible

Yuuba 40

¹Yaawe* ye Yuuba ñininkaa ko,

²“I niŋ nte Alla Tallaa le be ñoo saba la baŋ? I lafita n soosoo la le baŋ? Wo to n jaabi.”

³Bituŋ Yuuba ye Yaawe jaabi ko,

⁴“Nte maŋ jari feŋ na. Nte be i jaabi noo la muŋ ne la? N te kuma fo la kotenke.

⁵Ŋa landatambi diyaamoo le ke, bari a be daŋ na wo le la.”

⁶Bituŋ Yaawe la kumakaŋo naata Yuuba kaŋ ka bo foño baa kono ko:

⁷I tewo siti ko kewo, m be i ñininkaa la le, aduŋ i si n jaabi.

⁸Ite si a fo noo baŋ, nte maŋ tiliŋ, i be nte le jalayi la baŋ, ka i faŋo la kuwo tooñaayandi?

⁹Fo i ye semboo soto le baŋ ko nte Alla, fo i si diyaamu noo baŋ ko nte Alla, komeŋ saŋ feteŋo?

¹⁰Waroo niŋ kuliyaa dii i faŋ na, semboo niŋ horomoo dendikoo duŋ i faŋ na.

¹¹Faŋ wara moolu juubee, i la kamfaa fijoo ye jii ì kaŋ, i ye ì la kuwo jindi.

¹²Moo juubee meŋ ka a faŋ wara, i ye a la kuwo jindi. Moo jawoolu kasaara waati kiliŋ.

¹³Ì bee baadee ñoo la bankoo kono, i ye ì maabo laakira.

¹⁴Niŋ i si wo ke noo, wo to nte faŋo le be kaawa la i ma, kaatu i ye semboo soto a ñaama le ka i faŋ tanka.

¹⁵Ñiŋ daafeŋo juubee, Behemoti,[11] ŋa meŋ daa ko ŋa i daa ñaameŋ, a ka ñaamoo le ñimi komeŋ ninsoo.

¹⁶A juubee, a semboo bee be a tewo le to, aniŋ a kono fasoolu.

¹⁷A ka a feñoo jandi le kat, a ye tiliŋ pet komeŋ sedari* yiroo, a wutu fasoolu be karariŋ ñoo bala le.

¹⁸A kuloolu be bambandiŋ ne komeŋ jaawaloo, a siŋolu ka munta le komeŋ nee baaroo.

¹⁹A ñoŋ daafeŋ baa te n na daafeŋolu kono. Nte Alla meŋ mu a Daamansoo ti, nte doroŋ ne si a faa noo.

²⁰A la domoroo ka faliŋ konkoolu le kaŋ, daameŋ wulakono daafeŋolu bee ka tara feeyaa la jee.

²¹A ka tara laariŋ ŋaniŋ kuroolu le kono, a ye tara maaboriŋ baakintoolu kono potoo kono.

²²A ka tara maaboriŋ ŋaniŋ kuroolu le dubeŋo la, baa daala yiroolu ye a kuru.

²³Hani niŋ baa faata le tep, a buka dewuŋ, hani niŋ Yoridani waameta fo a futata a daafaroo ma.

²⁴Fo moo si a feere noo baŋ, i ye a muta? Fo moo si juloo duŋ noo a nuŋo la baŋ?