Read Mandinka Yuuba 5 Bible Online

Yuuba 5 - Mandinka bible

Yuuba 5

¹Yuuba, saayiŋ deemaaroo woosii baŋ, fo moo le be soto la, meŋ be i danku la i ma? I be i la kuwo dunoo laa la malaayika jumaa le kaŋ?

²Kamfaa ka toolewo kasaara le, kiiliyaa ka hakilintaŋo faa.

³Ŋa toolewolu je le ì ye suloo duŋ, bari kataba kiliŋ dankoo boyita ì la suwolu kaŋ.

⁴Ì diŋolu niŋ tankoo jamfata ñoo la. Ì ye ì kiitindi tilimbaliyaa kono, moo maŋ soto, meŋ si ì kiisa a kono.

⁵Konkotoolu ye ì la katirifeŋolu domo, hani mennu falinta ŋaniŋolu kono. Hadumentuŋolu ye ì la fankoo kasaara.

⁶Kuu jawoo buka fii noo bankoo kono, sako kataa si faliŋ noo a kaŋ.

⁷Bari hadamadiŋo wuluuta le bataa kuwo kono, komeŋ dimbaa feremetoo ka tii santo ñaameŋ.

⁸Niŋ nte mu ite ti, m be m faŋ seyi la Alla ma le, ŋa n na kuwo laa a ñaa koto.

⁹Ate le mu kaawakuu baalu kelaa ti, mennu buka tara loŋo daa to, aniŋ jaakali kuwolu mennu buka yaatee noo.

¹⁰Ate le ka jiyo jindi bankoo kaŋ, ate le ka kunkoolu jiiboŋ.

¹¹Ate le ka fammajiilaa la kuwo selendi santo, ate le ka seewoo dii niikuyaatoo la.

¹²Ate le ka feerentuŋolu la feeroolu janjaŋ, fo ì kana kututeyi.

¹³Ate le ka moo ñaamendiŋo muta ì faŋolu la ñaameŋ kuwolu kono. A ye neeneerilaalu la neeneeri yaamaroolu daŋ.

¹⁴Hani tiloo ñaama, itolu ka tara diboo le kono. Ì ka moomooroo ke tilibuloo ko ì be suutoo le kono.

¹⁵Bari ate Alla, fuwaaroolu, a ka wolu tanka moo jawoolu neŋ jawoo ma le. Ate le ka moolu tanka, mennu be suuloo kono ka bo sembemaalu bulu.

¹⁶Wo ñaama, fuwaaroolu si jikoo soto, tilimbaloo ye a daa soroŋ ñoo bala.

¹⁷Seewoo be moo la kuwo to, Alla ye meŋ londi sila tilindiŋo kaŋ. Wo kamma la, niŋ Alla Tallaa be i so kaŋ kuluwo la, kana balaŋ a la.

¹⁸Ate le ka dimoo ke, a ye a jaara. Ate le ka baramoo ke, a ye a kendeyandi.

¹⁹Ate le be i tanka la maasiiba kuwo ma waatoo bee la, kataa kuu te boyi la i kaŋ fereŋ.

²⁰Niŋ konko jawoo naata, ate le be i balundi la, aniŋ keloo waatoo la, ate le be i tanka la saayaa ma.

²¹Alla le be i tanka la koomakumaroo ma, aduŋ a te jari la ñiŋ na, i ye silaŋ kuu soto, niŋ kasaara kuwo naata.

²²Kasaaroo waatoo niŋ konko jawoo kono, i be tara la jele kaŋ ne. I te sila la wulakono daafeŋolu la.

²³I be tankoo soto la kene fanuŋolu to le, kayiroo le be tara la ì niŋ wulakono daafeŋolu teema.

²⁴I si ñiŋ dankeneyaa soto ko, i la dimbaayaa be tara la kayiroo le kono. Niŋ i ye i la beeyaŋolu yaatee, feŋ te dasa la kooma.

²⁵I si ñiŋ loŋ ko, i diŋolu be siyaa la le. I koomalankoolu be siyaa la le, ì be siyaa la duniyaa kono le komeŋ ñaamoo.

²⁶I be faa la i kotooriŋo le la, komeŋ siimaŋ muroo ka kati siimaŋ kaloo bala ñaameŋ, niŋ a moo waatoo siita.

²⁷Ŋà kisikisiroo ke ñiŋ kuwo la le, tooñaa le mu. Lamoyiri ke kuwo ñiŋ na, i ye a muta i faŋ fee.